ଭୁବନେଶ୍ୱର, ୧୮/୦୩: ରାଜ୍ୟରେ ବଢୁଛି ଏଚ୍ଆଇଭି ସଂକ୍ରମିତ ରୋଗୀଙ୍କ ସଂଖ୍ୟା । ୨୦୨୧-୨୨ରେ ୨୩୪୧ ଏଚଆଇଭି ରୋଗୀ ଚିହ୍ନଟ ହୋଇଥିବା ବେଳେ ୨୦୨୨-୨୩ରେ ୩୨୩୨ ଜଣ ଏବଂ ୨୦୨୩-୨୪ ବର୍ଷରେ ୩୪୩୬ଜଣ ଏଚଆଇଭି ସଂକ୍ରମିତ ରୋଗୀ ଚିହ୍ନଟ ହୋଇଛନ୍ତି ।
ଡିସେମ୍ବର ୨୦୨୪ ସୁଦ୍ଧା ରାଜ୍ୟରେ ମୋଟ ୬୩,୭୪୨ ଏଚଆଇଭି ରୋଗୀ ଚିହ୍ନଟ ହୋଇଛନ୍ତି । ଅର୍ଥାତ୍ ବିଗତ ତିନି ବର୍ଷରେ ୯ହଜାର ୯ଜଣ ଏଚଆଇଭି ସଂକ୍ରମିତଙ୍କୁ ଚିହ୍ନଟ କରାଯାଇଛି । ସୋମବାର ବିଧାନସଭାରେ ବିଧାୟକ ଓମ୍ ପ୍ରକାଶ ମିଶ୍ରଙ୍କ ଅଣତାରକା ପ୍ରଶ୍ନର ଉତ୍ତରରେ ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରୀ ଡ. ମୁକେଶ ମହାଲିଙ୍ଗ ଏହି ତଥ୍ୟ ପ୍ରଦାନ କରିଛନ୍ତି ।
ମନ୍ତ୍ରୀଙ୍କ ପ୍ରଦତ୍ତ ତଥ୍ୟ ଅନୁଯାୟୀ, ରାଜ୍ୟରେ ଏଚ୍ଆଇଭି ସଂକ୍ରମଣ ରୋକିବା ଲାଗି ମୋଟ ୧୬୭ଟି ସ୍ୱତନ୍ତ୍ର ପରାମର୍ଶ ଓ ପରୀକ୍ଷା କେନ୍ଦ୍ର, ୭ଟି ବେସରକାରୀ ସହଭାଗିତା କେନ୍ଦ୍ର ଓ ୧୨୩୨ଟି ସୁବିଧା ପରାମର୍ଶ ଓ ପରୀକ୍ଷା କେନ୍ଦ୍ର କାର୍ଯ୍ୟକାରୀ କରୁଛି । ସଂକ୍ରମିତ ରୋଗୀଙ୍କ ଚିକିତ୍ସା ତଥା ସଂକ୍ରମଣ ହାରକୁ ପ୍ରଶମିତ କରିବା ପାଇଁ ମୋଟ ୨୦ଟି ଆର୍ଟ କେନ୍ଦ୍ର, ୧୭ଟି ଲିଙ୍କ୍ ଆର୍ଟ ତଥା ୧୨ଟି ଗୋଷ୍ଠୀ ସେବା କେନ୍ଦ୍ର କାର୍ଯ୍ୟ କରୁଛି ।
ସେହିପରି ଆଶଙ୍କା ପ୍ରବଣ ଗୋଷ୍ଠୀଙ୍କ ମଧ୍ୟରେ ଏଚଆଇଭି ସଂକ୍ରମଣ ହାରକୁ ରୋକିବା ପାଇଁ ରାଜ୍ୟରେ ୫୨ଟି ଲକ୍ଷ୍ୟଭେଦି ପ୍ରକଳ୍ପ ଓ ୮୦୦ ଗ୍ରାମରେ ୭ଟି ଲିଙ୍କ୍ ୱାର୍କର ଯୋଜନା କାର୍ଯ୍ୟକାରୀ କରୁଛି । ରାଜ୍ୟରେ ପ୍ରବାସୀ ଶ୍ରମିକଙ୍କ ମଧ୍ୟରେ ଏଚ୍ଆଇଭି ସଂକ୍ରମଣ ହାରକୁ ରୋକିବା ପାଇଁ ୧୧ଟି ରେଳ ଷ୍ଟେସନ ଓ ବସଷ୍ଟାଣ୍ଡରେ ବିଭିନ୍ନ ସଚେତନତା କାର୍ଯ୍ୟକ୍ରମ କରାଯାଉଛି ।
ଏଚଆଇଭି ସଂକ୍ରମଣ ରୋକିବା ପାଇଁ ସୂଚନା, ଶିକ୍ଷା ଓ ପ୍ରସାରଣ କାର୍ଯ୍ୟକ୍ରମ ଦ୍ୱାରା ବିଭିନ୍ନ ବିଦ୍ୟାଳୟ ଓ ମହାବିଦ୍ୟାଳୟରେ ୬୪୦ଟି ରେଡ୍ ରିବନ୍ କ୍ଲବ ଖୋଲାଯାଇ ଯୁବ ଗୋଷ୍ଠୀଙ୍କ ମଧ୍ୟରେ ସଚେତନତା ସୃଷ୍ଟି କରାଯିବା ସହ ପ୍ରିଣ୍ଟ, ଇଲେକ୍ଟ୍ରୋନିକ୍ ମିଡିଆ ମାଧ୍ୟମରେ ସର୍ବସାଧାରଣଙ୍କ ମଧ୍ୟରେ ସଚେତନତା ସୃଷ୍ଟି କରାଯାଉଛି । ଏଥିସହ ଏଚଆଇଭି ସଂକ୍ରମିତ ଗର୍ଭବତୀଙ୍କର ସରକାରୀ ସ୍ୱାସ୍ଥ୍ୟକେନ୍ଦ୍ରରେ ପ୍ରସବ କରାଇବା ନିମନ୍ତେ ଆଶା କର୍ମୀଙ୍କୁ ୫୦୦ ଟଙ୍କା ଏବଂ ଗର୍ଭବତୀଙ୍କୁ ୫୦୦ ଟଙ୍କା ପ୍ରୋତ୍ସାହନ ରାଶି ପ୍ରଦାନ କରାଯାଉଛି ।
