ନୂଆଦିଲ୍ଲୀ,୨୫/୦୯: ହକି ଇଣ୍ଡିଆ ଲିଗ (ଏଚ୍ଆଇଏଲ)ର ଆଗାମୀ ସଂସ୍କରଣ ପାଇଁ ନୂଆଦିଲ୍ଲୀରେ ମିନି ନିଲାମୀ ସରିଛି। ଉଭୟ ପୁରୁଷ ଓ ମହିଳା ବର୍ଗରେ ଖେଳାଳି ବିକ୍ରି ହୋଇଥିଲେ । ଓଡ଼ିଆ ଗୋଲକିପର ବିବେକ ଲାକ୍ରା ୨୩ ଲକ୍ଷ ଏବଂ ମିଡଫିଲ୍ଡର ଆଦ୍ରୋହିତ ଏକ୍କା ୧୧ ଲକ୍ଷ ଟଙ୍କାରେ ବିକ୍ରି ହୋଇଥିଲେ । ଏହି ଦୁଇ ଜୁନିୟର ଖେଳାଳି ଭାରତୀୟ ଜୁନିୟର ସୁଲତାନ ଜୋହର କପ୍ ଦଳରେ ସ୍ଥାନ ପାଇଛନ୍ତି । ପୁରୁଷ ବର୍ଗରେ ଲାଏନ ହେଣ୍ଡରସନ୍ ଏବଂ ମହିଳାରେ ଅଗଷ୍ଟିନା ଗୋର୍ଜେଲାନି ଏଥର ସବୁଠୁ ଦାମୀ ଖେଳାଳି ସାବ୍ୟସ୍ତ ହୋଇଛନ୍ତି । ସେମାନେ ୪୨ ଲକ୍ଷ ଟଙ୍କାରେ ବିକ୍ରି ହୋଇଛନ୍ତି ।
ମହିଳାରେ ଅଗଷ୍ଟିନାଙ୍କୁ ୪୨ ଲକ୍ଷରେ ବେଙ୍ଗଲ ଟାଇଗର୍ସ, ଗ୍ରାନାଟୋ ମାରିଆ ଜୋସଙ୍କୁ ସୁରମା ହକି କ୍ଲବ୍ ୩୪ ଲକ୍ଷରେ ଏବଂ ଭାଲେଣ୍ଟିନା ରାପୋସୋ ରୁଇଜଙ୍କୁ ବେଙ୍ଗଲ ଟାଇଗର୍ସ ୩୦ ଲକ୍ଷ ଟଙ୍କାରେ କ୍ରୟ କରିଛନ୍ତି । ପୁରୁଷରେ ହେଣ୍ଡରସନଙ୍କୁ ୪୨ ଲକ୍ଷରେ ବେଦାନ୍ତ କଳିଙ୍ଗ ଲାନସର୍ସ, ସାନ୍ଦର ଡି ୱିଜନଙ୍କୁ ତାମିଲନାଡୁ ୩୬ ଲକ୍ଷରେ ଏବଂ ଥିଏସ ପ୍ରିଞ୍ଜ ଏସ୍ଆଇଏଲ୍ ଗଭର୍ଣ୍ଣିଂ କାଉନସିଲ କ୍ରୟ କରିଛି ।
୨୦୨୪-୨୫ ସଂସ୍କରଣରେ ପୁରୁଷ ବର୍ଗରେ ୮ଟି ଦଳ ସାମିଲ ହୋଇଥିଲେ । ଦଳ ଗୁଡ଼ିକ ହେଲେ ବେଙ୍ଗଲ ଟାଇଗର୍ସ, ସୁରମା ହକି, ହାଇଦ୍ରାବାଦ ତୋଫାନ, ତାମିଲନାଡୁ ଡ୍ରାଗନ୍ସ, ୟୁପି ରୁଦ୍ରାସ, କଳିଙ୍ଗ ଲାନସର୍ସ, ଟିମ ଗୋନାଶିକା ଓ ଏସ୍ଜି ପାଇପର୍ସ । ମାତ୍ର ୟୁପି ରୁଦ୍ରାସ ଓ ଟିମ୍ ଗୋନାଶିକା ଏଥର ଓହରି ଯାଇଥିଲେ । ସେମାନଙ୍କ ସ୍ଥାନରେ ରାଞ୍ଚି ରୟାଲ୍ସ ଓ ଏଚ୍ଆଇଏଲ୍ ଗଭର୍ଣ୍ଣିଂ କାଉନସିଲ ଦଳ ସ୍ଥାନ ପାଇଛନ୍ତି ।
ଅଷ୍ଟ୍ରେଲିଆର କୁପର ବର୍ଣ୍ଣସଙ୍କୁ କଲିଙ୍ଗ ଲାନସର୍ସ ୩୪.୫୦ ଲକ୍ଷରେ ଓ ରୁପିନ୍ଦର ପାଲ ସିଂଙ୍କୁ ଏସ୍ଜି ପାଇପର୍ସ ୧୨ ଲକ୍ଷରେ କ୍ରୟ କରିଛି । ହାଇଦ୍ରାବାଦ ତା’ର ପୂର୍ବ ଦଳ ବଜାୟ ରଖିଛି । ତେଣୁ ଏଥର ଜଣେ ହେଲେ ବି ଖେଳାଳି କ୍ରୟ କରି ନାହିଁ । ୧୪ ବର୍ଷୀୟ କେତନ ଖୁସୱାଙ୍କୁ ୨.୫ ଲକ୍ଷରେ ବେଙ୍ଗଲ ଟାଇଗର୍ସ କିଣିଛି ।
କଳିଙ୍ଗ ଲାନସର୍ସ ୭ ଜଣ ନୂଆ ଖେଳାଳିଙ୍କୁ କିଣିଛି । ସେମାନେ ହେଲେ ଲିଆମ ହେଣ୍ଡରସନ (୪୨ ଲକ୍ଷ), ଅମିତ ଟପ୍ପୋ (୨ ଲକ୍ଷ), ସୁନୀଲ (୨ ଲକ୍ଷ), ବବି ସିଂ ଧାନି (୧୦ ଲକ୍ଷ), କୁପର ବର୍ଣ୍ଣସ (୩୪.୫୦ ଲକ୍ଷ) ଏବଂ କ୍ରାଗ୍ ମାରାଇସ (୧୦ ଲକ୍ଷ) ।
ମହିଳାରେ ମିଡ୍ଫିଲ୍ଡର ମୋନିକା ଗତ ସଂସ୍କରଣରେ ବିକ୍ରି ହୋଇ ନଥିଲେ । ଏଥର ତାଙ୍କୁ ୧୫ ଲକ୍ଷ ଟଙ୍କାରେ ଏସ୍ଜି ପାଇପର୍ସ କିଣିଛି । ଉଦିତା ଗତ ଥର ସବୁଠୁ ମହଙ୍ଗା ଖେଳାଳି ଥିଲେ । କିନ୍ତୁ ଏଥର ପାଇପର୍ସ ତାଙ୍କୁ ୧୦ ଲକ୍ଷରେ କିଣିଛି ।
