ଭୁବନେଶ୍ୱର/ରାଉରକେଲା,୧୧/୦୧: ବେଙ୍ଗଲ ଟାଇଗର୍ସକୁ ପରାଜିତ କରି ତାମିଲନାଡୁ ଡ୍ରାଗନ୍ସ ଏଚ୍ଆଇଏଲ୍ ପଏଣ୍ଟ ଟେବୁଲର ଶୀର୍ଷ ସ୍ଥାନରେ ପହଞ୍ଚିଛି । ଡ୍ରାଗନ୍ସ ଆଜି ଏକ ସଂଘର୍ଷପୂର୍ଣ୍ଣ ମ୍ୟାଚ୍ରେ ୨-୧ ଗୋଲରେ ବିଜୟୀ ହୋଇଥିଲା ।
ପ୍ରଥମ କ୍ୱାର୍ଟର ଖେଳ ଗୋଲଶୂନ୍ୟ ରହିଥିଲା । ଦ୍ୱିତୀୟ କ୍ୱାର୍ଟରର ଆରମ୍ଭରୁ ଡ୍ରାଗନ୍ସ ଗୋଲ ଖାତା ଖୋଲିଥିଲା । ୧୬ ମିନିଟରେ ଏହି ଗୋଲ୍ ଦେଇଥିଲେ ସେଲଭମ କାର୍ଥି । ୩୫ ମିନିଟରେ (ରୁପିନ୍ଦର ପାଲ ସିଂ) ଏହି ଗୋଲ୍ ପରିଶୋଧ କରିଥିଲା ବେଙ୍ଗଲ ଟାଇଗର୍ସ ।ଏହାର ୨ ମିନିଟରେ ମଧ୍ୟରେ ଡ୍ରାଗନ୍ସ ଦ୍ୱିତୀୟ ଗୋଲ୍ ଦେଇ ପୁଣି ୨-୧ରେ ଅଗ୍ରଣୀ ଲାଭ କରିଥିଲା । ଉତ୍ତମ ସିଂ ୩୭ ମିନିଟରେ ଏହି ଗୋଲ୍ ଦେଇଥିଲେ । ପରବର୍ତ୍ତୀ ସମୟ ଖେଳ ସଂଘର୍ଷପୂର୍ଣ୍ଣ ରହିଥିଲା । ବହୁ ପ୍ରୟାସ ସତ୍ତେ୍ୱ ଟାଇଗର୍ସ ମ୍ୟାଚ୍କୁ ଫେରିବାର ସୁଯୋଗ ନପାଇ ଶେଷରେ ଗୋଟିଏ ଗୋଲ ପଛରେ ରହି ପରାଜିତ ହୋଇଥିଲା ।
ସର୍ବାଧିକ ୧୨ ପଏଣ୍ଟ ସହ ଡ୍ରାଗନ୍ସ ଟେବୁଲରେ ପ୍ରଥମ ସ୍ଥାନରେ ରହିଛି । ସେହିପରି ୯ ପଏଣ୍ଟ ସହ ଟାଇଗର୍ସ ଦ୍ୱିତୀୟ, ୭ ପଏଣ୍ଟ ସହ କଳିଙ୍ଗ ଲାନସର୍ସ ତୃତୀୟ ଏବଂ ସୁରମା ହକି କ୍ଲବ ସମାନ ପଏଣ୍ଟ ପାଇ ଚତୁର୍ଥ ସ୍ଥାନରେ ରହିଛି ।
