ନୂଆଦିଲ୍ଲୀ,୧୦/୩: ହୋଲିକୁ ଏବେ ୫ ଦିନ ବାକି ରହିଛି । ଦେଶର ଭିନ୍ନ ଭିନ୍ନ ପ୍ରାନ୍ତରେ ଏବେ ହୋଲିକୁ ନେଇ ପ୍ରବଳ ଉତ୍ସାହ । ହୋଲି ରଙ୍ଗ, ପିଚକାରୀ ଏବଂ ସ୍ୱାଦିଷ୍ଟ ମିଠାକୁ ନେଇ ଏବେ ବଜାର ପ୍ରସ୍ତୁତ । ବିଭିନ୍ନ ସ୍ଥାନରେ ଆୟୋଜିତ ହେଉଛି ହୋଲି କାର୍ଯ୍ୟକ୍ରମ । ଲୋକେ ହୋଲି ଗୀତରେ ଜମେଇକି ନାଚୁଛନ୍ତି । ହୋଲିର ଏହି ମାହୋଲ ବଜାର ଉପରେ ସିଧାସଳଖ ଦେଖାଯାଇଛି । ଚଳିତ ବର୍ଷ ହୋଲିରେ ସାରା ଦେଶରେ ୬୦ ହଜାର କୋଟି ଟଙ୍କାର କାରବାର ହେବା ନେଇ ଆକଳନ କରିଛି ସର୍ବଭାରତୀୟ ବ୍ୟବସାୟୀ ମହାସଂଘ (ସିଏଆଇଟି) ।
ସିଏଆଇଟିର ରାଷ୍ଟ୍ରୀୟ ସମ୍ପାଦକ ପ୍ରବୀଣ ଖଣ୍ଡେଲୱାଲ କହିଛନ୍ତି, ହୋଲିକୁ ନେଇ ଏଥର ବଜାର ବେଶ ଉତ୍ସାହିତ ରହିଛି । ଚୀନରେ ପ୍ରସ୍ତୁତ ହୋଲି ରଙ୍ଗ ଏବଂ ଅବିରକୁ ଲୋକେ ଏବଂ ବ୍ୟବସାୟୀ ମାନେ ବର୍ଜନ କରିଛନ୍ତି । ଦେଶରେ ପ୍ରସ୍ତୁତ ହର୍ବାଲ ରଙ୍ଗ ଏବଂ ଅବିର ସହ ପିଚକାରୀ, ବେଲୁନ, ଚନ୍ଦନ, ପୂଜା ସାମଗ୍ରୀ ପରିଧାନ ସହ ଅନ୍ୟ ସାମଗ୍ରୀ କିଣୁଛନ୍ତି । ଏହା ଦ୍ୱାରା ଭାରତୀୟ ସାମଗ୍ରୀର ବିକ୍ରି ବଢ଼ିବା ସହ ବ୍ୟବସାୟୀଙ୍କୁ ବେଶ ଭଲ ଲାଭ ମିଳୁଛି ।
ଏବେ ବଜାରରେ ହର୍ବାଲ ରଙ୍ଗର ଟ୍ରେଣ୍ଡ୍ ରହିଛି । ଲୋକେ ଭାରତୀୟ କମ୍ପାନିଗୁଡ଼ିକର ଉତ୍ପାଦକୁ ବେଶ ପ୍ରାଥମିକତା ପ୍ରଦାନ କରୁଛନ୍ତି । ରଙ୍ଗ, ପିଚକାରୀ, ଅବିର, ବେଲୁନ, ମିଠା ସହ ହୋଲି ଲାଗି ସ୍ୱତନ୍ତ୍ର ପୋଷାକ ଚାହିଦା ବଢ଼ିଛି । ଏବେ ବଜାରରେ ଭିଡ ଆଗାମୀ ଦିନରେ ନବରାତ୍ରୀ ଯାଏ ରହିବ ବୋଲି ଆକଳନ କରାଯାଇଛି । ସିଏଆଇଟି ମୁତାବକ, ଏ ବର୍ଷ ବେପାର ୬୦ ହଜାର କୋଟି ଟଙ୍କା ଟପିବାରେ ଢ଼େର ସମ୍ଭାବନା ରହିଛି । ଯାହା ଗତ ବର୍ଷ ତୁଳନାରେ ୨୦% ଅଧିକ । ଗତ ବର୍ଷ ବଜାର ପ୍ରଭାବିତ ରହିବା ଯୋଗୁ ହୋଲିରେ ୫୦ ହଜାର କୋଟିର କାରବାର ହୋଇଥିଲା । ଚଳିତ ବର୍ଷ ଦିଲ୍ଲୀରେ କେବଳ ୮ ହଜାର କୋଟିର କାରବାର ହେବା ନେଇ ଆକଳନ କରାଯାଇଛି ।
ଚଳିତ ବର୍ଷ ବଜାରରେ ଉଭୟ ପରମ୍ପରା ଏବଂ ଅଭିନବ ଉତ୍ପାଦ ଗୁଡ଼ିକ ଟ୍ରେଣ୍ଡ କରୁଛି । ଏଥିରେ ପରିବେଶ ଉପଯୋଗୀ, ଡିଜିଟାଲ ଏବଂ ପରିକ୍ଷାମୂଳକ ସେଲିବ୍ରେଶନକୁ ଲୋକେ ପ୍ରାଥମିକତା ଦେଉଛନ୍ତି । ହୋଲି ଯେଭଳି ସୁରକ୍ଷିତ ଏବଂ ଆନନ୍ଦଦାୟକ ହେବ ତାକୁ ନଜରରେ ରଖାଯାଇଛି । ଗ୍ରାହକଙ୍କ ଚାହିଦା ଆଧାରରେ ମଧ୍ୟ ବଜାର ପ୍ରସ୍ତୁତ ହୋଇଛି ।
ପରିବେଶ ଏବଂ ଶରୀରକୁ ନଜରରେ ରଖି ଇକୋଫ୍ରେଣ୍ଡଲି ହୋଲିକୁ ଲୋକେ ଆପଣାଉଛନ୍ତି । ଏଥିରେ ଅର୍ଗାନିକ, ହର୍ବାଲ, ସହଜରେ ମାଟିରେ ମିଶିଯାଉଥିବା ରଙ୍ଗର ଚାହିଦା ବଢ଼ିଛି । ବ୍ରାଣ୍ଡ୍ ଗୁଡ଼ିକ ପ୍ରାକୃତିକ ରଙ୍ଗକୁ ପ୍ରୋତ୍ସାହିତ କରୁଛନ୍ତି । ସେହିଭଳି ବେଶି ଜଳ ଯେଭଳି ଅପଚୟ ନ ହେବ ତାକୁ ନଜରରେ ରଖି ଡ୍ରାଏ ହୋଲିକୁ ମଧ୍ୟ ଗୁରୁତ୍ୱ ମିଳୁଛି ।
ଡିଜିଟାଲ ପ୍ଲାଟଫର୍ମ ଗୁଡ଼ିକରେ ସ୍ୱତନ୍ତ୍ର ହୋଲି ରିହାତି, କମ୍ବୋ ଡିଲ୍, ଏକ୍ସପ୍ରେସ ଡେଲିଭରି ବିକଳ୍ପ ମିଳୁଛି । ଭର୍ଚୁଆଲ ହୋଲି ପାର୍ଟିରେ ଅନଲାଇନରେ ସେଲିବ୍ରେଶନ, ମ୍ୟୁଜିକ ପ୍ଲେ ଲିଷ୍ଟ ଏବଂ ଡିଜିଟାଲ ହୋଲି ଥିମ୍ ବିଶିଷ୍ଟ ଫିଲ୍ଟର ବନ୍ଧୁ ପରିଜନଙ୍କ ସହ ଯୋଡି ହେବାକୁ ବ୍ୟବହାର ହେଉଛି ।
ଲୋକେ ହୋଲି କାର୍ଣ୍ଣିଭାଲ, ମ୍ୟୁଜିକ ଫେଷ୍ଟିଭାଲ, ରିସର୍ଟ ଭିତ୍ତିକ ସେଲିବ୍ରେଶନ କରୁଛନ୍ତି । ବୃନ୍ଦାବନ, ମଥୁରା ଏବଂ ଜୟପୁର ଭଳି ସ୍ଥାନଗୁଡ଼ିକରେ ଏବେ ପର୍ଯ୍ୟଟକ ବଢ଼ିଛନ୍ତି ।ଖାଦ୍ୟ ଏବଂ ପାନୀୟ ଶିଳ୍ପରେ ମଧ୍ୟ ହୋଲିକୁ ନେଇ ଉତ୍ସାହ ଦେଖାଯାଇଛି । ରେଷ୍ଟୁରାଣ୍ଟ ଗୁଡ଼ିକରେ ହୋଲି ସ୍ପେଶାଲ ମେନୁ ପ୍ରସ୍ତୁତ ହୋଇଛି ।
