ନୂଆଦିଲ୍ଲୀ: ମଣିପୁରରେ ଜାରି ରହିଥିବା ଅଣାୟତ୍ତ ପରିସ୍ଥିତିକୁ ନେଇ ଆଜି (ସୋମବାର) ରାଜଧାନୀ ଦିଲ୍ଲୀରେ ସୁରକ୍ଷା ଏଜେନ୍ସିର ଅଧିକାରୀଙ୍କ ସହ କେନ୍ଦ୍ର ଗୃହମନ୍ତ୍ରୀ ଅମିତ ଶାହା ଏକ ଗୁରୁତ୍ୱପୂର୍ଣ୍ଣ ବୈଠକ କରିଛନ୍ତି। ଏହି ବୈଠକରେ ମଣିପୁରରେ କେନ୍ଦ୍ରୀୟ ପାରାମିଲିଟାରୀ ଫୋର୍ସ ନିୟୋଜନ ସମ୍ପର୍କରେ ଅନେକ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନିଆଯାଇଛି, ଯାହାଫଳରେ ରାଜ୍ୟରେ ଶାନ୍ତି ଫେରାଇ ଆଣିବା ପ୍ରକ୍ରିୟା ତ୍ୱରାନ୍ୱିତ ହୋଇପାରିବ।

ସୂଚନାନୁସାରେ, ମଣିପୁରର ପରିସ୍ଥିତିକୁ ନିୟନ୍ତ୍ରଣ କରିବା ପାଇଁ ୫୦ ଅତିରିକ୍ତ କମ୍ପାନୀ ନିୟୋଜିତ କରାଯିବ ବୋଲି ବୈଠକରେ ନିଷ୍ପତ୍ତି ନିଆଯାଇଛି। ଏହି ୫୦ଟି କମ୍ପାନୀରେ ସମୁଦାୟ ୫ ହଜାର ସୈନିକ ସାମିଲ ହେବେ । ଏହି ନିୟୋଜନ ହେବା ଦ୍ବାରା ମଣିପୁରରେ ସୁରକ୍ଷା ଦୃଢ ହେବ । ମଣିପୁରରେ ବର୍ତ୍ତମାନ ପର୍ଯ୍ୟନ୍ତ କେନ୍ଦ୍ରୀୟ ପାରାମିଲିଟାରୀ ଫୋର୍ସ ସଂଖ୍ୟା ୨୭ ହଜାରକୁ ବୃଦ୍ଧି ପାଇଛି । ଏହା ରାଜ୍ୟରେ ଶାନ୍ତି ଫେରାଇବାର ପ୍ରକ୍ରିୟାକୁ ତ୍ୱରାନ୍ୱିତ କରିବାର ସମ୍ଭାବନା ରହିଛି।

ମଣିପୁରରେ ଶାନ୍ତି ଫେରାଇ ଆଣିବା ପ୍ରକ୍ରିୟାରେ ପ୍ରାଥମିକତା ଦେବାକୁ କେନ୍ଦ୍ର ଗୃହମନ୍ତ୍ରୀ ଅମିତ ଶାହା ଅଧିକାରୀମାନଙ୍କୁ ନିର୍ଦ୍ଦେଶ ଦେଇଛନ୍ତି। ରାଜ୍ୟର ପରିସ୍ଥିତି ଶୀଘ୍ର ସ୍ୱାଭାବିକ ଅବସ୍ଥାକୁ ଫେରିବା ପାଇଁ ସେ ସମସ୍ତ ଏଜେନ୍ସିକୁ କହିଛନ୍ତି । ଏହା ପୂର୍ବରୁ କେନ୍ଦ୍ର ଗୃହ ମନ୍ତ୍ରଣାଳୟ ମଣିପୁରର ୬ ଟି ପୋଲିସ ଷ୍ଟେସନ ଅଞ୍ଚଳରେ AFSPA ଲାଗୁ କରିଥିଲା।

ତେବେ ମଣିପୁରର ଏକ ରିଲିଫ କ୍ୟାମ୍ପରେ ନିଖୋଜ ମହିଳା ଓ ଶିଶୁଙ୍କ ମୃତଦେହ ମିଳିବା ପରେ ହିଂସା ବ୍ୟାପିଛି । ଏହି ହିଂସା ସମୟରେ ମୁଖ୍ୟମନ୍ତ୍ରୀ ବିରେନ ସିଂଙ୍କ ଜ୍ୱାଇଁଙ୍କ ସମେତ ୬ଜଣ ବିଧାୟକଙ୍କ ଘରେ ଭଙ୍ଗାରୁଜା ହୋଇଛି ।