ସୁକିନ୍ଦା, ୯/୬: ଅନୁଗୁଳ ସୁକିନ୍ଦା ରେଳପଥର ମଙ୍ଗଳପୁର ଗ୍ରାମ ନିକଟରେ ରେଳ ଦୁର୍ଘଟଣାରେ ଜଣେ ବେସାହାରା ଯୁବକର ମୃତ୍ୟୁ ଘଟିଥିବା ଜଣାପଡିଛି। ମୃତ ଯୁବକ ସୁକିନ୍ଦା ଥାନା ଅନ୍ତର୍ଗତ ଦାମୋଦରପୁର ଗ୍ରାମର ବିନୟ ବେହେରା ବୋଲି ଜଣାପଡିଛି। ଦୁର୍ଘଟଣା ଗତ ରବିବାର ସନ୍ଧ୍ୟାରେ ଘଟିଥିବା ସନ୍ଦେହ କରାଯାଉଛି। ରାତିରେ କିଛି ସ୍ଥାନୀୟ ଗ୍ରାମବାସୀ ଶୌଚ ପାଇଁ ସେହି ଅଞ୍ଚଳକୁ ଯାଉଥିବା ବେଳେ ଏକ ମୃତଦେହ ପଡ଼ିଥିବା ଦେଖିଥିଲେ। ସଂପୃକ୍ତ ଯୁବକର କେହି ନିଜଲୋକ ନଥିବାରୁ ରେଳ କର୍ମଚାରୀଙ୍କୁ ସୂଚନା ଦେଇଥିଲେ।
ଦୀର୍ଘ ସମୟ ଧରି ମୃତଦେହ ନିକଟକୁ କେହି ନଆସିବାରୁ ବେସାହାରା ଯୁବକର ଶେଷକୃତ୍ୟ କରିବାକୁ ଉଚିତ୍ ମଣିଥିଲେ କିଛି ଗ୍ରାମବାସୀ । ଶେଷରେ ଗ୍ରାମ ମଶାଣିରେ ଶେଷକୃତ୍ୟ ସଂପନ୍ନ ହୋଇଥିଲା। ତେବେ ଏହି ଘଟଣାରେ ରେଳ ବିଭାଗ କିମ୍ବା ସ୍ଥାନୀୟ ପୋଲିସଙ୍କ ଦାୟିତ୍ଵହୀନତା ସାଧାରଣରେ ଚର୍ଚ୍ଚାର ବିଷୟ ହୋଇଛି।
