ନୂଆଦିଲ୍ଲୀ,୦୪/୦୫: ରାଜ୍ୟରେ ବିପର୍ଯ୍ୟସ୍ତ ଅବସ୍ଥାରେ ହୋମିଓପାଥିକ ପିଜି ପାଠ୍ୟକ୍ରମ । ଦୀର୍ଘ ବର୍ଷ ଧରି ପିଜି ସିଟ୍ ବଢ଼ୁନଥିବା ଓ ଅଧ୍ୟାପକ ନିଯୁକ୍ତି ହେଉନଥିବାରୁ ଛାତ୍ରଛାତ୍ରୀ ପିଜି ପଢିପାରୁନାହାନ୍ତି । ପିଜି ପାସ୍ କରିଥିବା ଛାତ୍ରଛାତ୍ରୀ ବେକାର ହୋଇବସିଛନ୍ତି । ଅନ୍ୟପକ୍ଷରେ ପିଜି ପଢ଼ାଇବା ପାଇଁ କାମଚଳା ଭାବେ ଅବସରପ୍ରାପ୍ତ ଅଧ୍ୟାପକଙ୍କୁ ଠିକାରେ ନିଯୁକ୍ତି ଦିଆଯାଉଛି । ରାଜ୍ୟରେ ଆୟୁର୍ବେଦିକ ମହାବିଦ୍ୟାଳୟରେ ୩୩ଟି ପିଜି ସିଟ୍ ରହିଛି । ହେଲେ ହୋମିଓପାଥିକ ସ୍ନାତକ ଶିକ୍ଷା ଓ ସ୍ନାତକୋତ୍ତର ଶିକ୍ଷା ବ୍ୟବସ୍ଥାରେ ଅବନତି ଦେଖାଦେଇଛି । କାରଣ ଭୁବନେଶ୍ୱରରେ ଅଭିନ୍ନ ଚନ୍ଦ୍ର ହୋମିଓପାଥିକ ଭେଷଜ ମହାବିଦ୍ୟାଳୟରେ ମାତ୍ର ୪ଟି ପିଜି ସିଟ୍ ଅଛି ।
ବ୍ରହ୍ମପୁର, ସମ୍ବଲପୁର ଓ ରାଉରକେଲା ହୋମିଓପାଥିକ କଲେଜରେ ପିଜି ସିଟ୍ ନାହିଁ । ଅଭିନ୍ନଚନ୍ଦ୍ରରେ ପୂର୍ବରୁ ୫ଟି ବିଭାଗରେ ୧୪ଟି ସିଟ୍ରେ ପିଜି ଥିଲା । ଏହା ୨୦୧୩ ମସିହା ପର୍ଯ୍ୟନ୍ତ ଚାଲୁ ରହିଥିଲା । କାଳକ୍ରମେ ଏହା ବନ୍ଦ ହୋଇ ଏବେ ଗୋଟିଏ ବିଭାଗ ମେଟେରିଆ ମେଡିକାରେ ମାତ୍ର ୪ଟି ସିଟ୍ ରହିଛି । ଅଭିନ୍ନ ଚନ୍ଦ୍ର କଲେଜକୁ ରାଜ୍ୟ ସରକାର ‘ସେଣ୍ଟର୍ ଫର୍ ଏକ୍ସଲେନ୍ସ’ ଘୋଷଣା କରିଥିଲେ । ହେଲେ ଏବର କଲେଜ୍ ଅବସ୍ଥାକୁ ଦେଖିଲେ ରାଜ୍ୟ ସରକାର ହୋମିଓପାଥିକ ଶିକ୍ଷାକୁ କେତେ ଗୁରୁତ୍ୱ ଦେଉଛନ୍ତି ତାହା ସ୍ପଷ୍ଟ ବାରି ହୋଇପଡୁଛି ।
ଏବେ ୪ଟି ହୋମିଓପାଥିକ କଲେଜରେ ୩୦ଟି ପ୍ରଫେସର ପଦବି ରହିଛି । ପ୍ରତି କଲେଜରୁ ୪ଜଣ ଲେଖାଏଁ ଅଧ୍ୟାପକ ଅବସର ନେବା ପରେ ଅସ୍ଥାୟୀ ଭାବେ ଶିକ୍ଷାଦାନ କରୁଛନ୍ତି । ବାକି ୧୪ଟି ପଦବି ଫାଙ୍କା ପଡିଛି । ହେଲେ ପିଜି ପାସ କରିଥିବା ପ୍ରାୟ ୪୦ ଜଣ ବେକାର ହୋଇବସିଛନ୍ତି । ଏହାଛଡ଼ା ଓଡ଼ିଶା ବାହାରୁ ପିଜି ପାସ କରିଥିବା ୧୧୦ ପିଜି ପାସ୍ କରିଥିବା ଛାତ୍ରଛାତ୍ରୀ ମଧ୍ୟ ନିଯୁକ୍ତି ଅପେକ୍ଷାରେ ଥିବା ନିଖିଳ ଓଡ଼ିଶା ଆୟୁଷ ଛାତ୍ର ସଂଗଠନ ଅଭିଯୋଗ କରିଛି । ତେଣୁ ହୋମିଓପାଥିକ ଶିକ୍ଷାର ମାନ ବୃଦ୍ଧି ପାଇଁ ପିଜି ସିଟ୍ ବଢ଼ାଇବା ଏବଂ ଅଧ୍ୟାପକ ନିଯୁକ୍ତି ଦେବାକୁ ସଂଗଠନ ଦାବି କରିଛି ।
