ନୂଆଦିଲ୍ଲୀ, ୧୨/୦୭ : ୬୦-୭୦ ଦଶକର ଜଣେ ଦିଗଜ କଳାକାର... ଲୋକପ୍ରିୟ ଅଭିନେତା... ବାପାଙ୍କ ଘଣ୍ଟା ବିକି ଭାଗ୍ୟ ପରୀକ୍ଷା କରିବାକୁ ଆସିଥିଲେ ମାୟାନଗରୀ। ପକେଟ୍ରେ ଥିଲା ମାତ୍ର ୫୦ ଟଙ୍କା। କଠୋର ସଙ୍ଘର୍ଷ, ପରିଶ୍ରମ ଏବଂ ପ୍ରତିଭା ବଳରେ ରଚିଲେ ଇତିହାସ। ବଲିଉଡରେ ପାଲଟିଗଲେ ଜୁବଲି କୁମାର। କ୍ୟାରିଅରରେ କରିଛନ୍ତି ୮୦ ରୁ ଉର୍ଦ୍ଧ୍ଵ ସିନେମା। ଆମେ କହୁଛୁ ଅଭିନେତା ରାଜେନ୍ଦ୍ର କୁମାରଙ୍କ କଥା। ସେ ଏବେ ଆଉ ଏ ଦୁନିଆରେ ନାହାଁନ୍ତି ସତ, କିନ୍ତୁ ତାଙ୍କର କାଳଜୟୀ ସିନେମା ଆଜିବି ଦର୍ଶକଙ୍କ ମଧ୍ୟରେ ଅମର କରି ରଖିଛି।
୧୯୨୭ ଜୁଲାଇ ୨୦ରେ ପଞ୍ଚାବ ପ୍ରାନ୍ତର ସିୟାଲକୋଟ ସହରରେ ହୋଇଥିଲା ରାଜେନ୍ଦ୍ର କୁମାରଙ୍କ ଜନ୍ମ। ଯାହାକି ଏବେ ପାକିସ୍ତାନରେ ରହିଛି। ଦେଶ ବିଭାଜନ ପରେ ରାଜେନ୍ଦ୍ରଙ୍କ ପରିବାର ଭାରତ ଚାଲିଆସିଥିଲା। ତାଙ୍କ ପିତା ଭାରତରେ କପଡ଼ା ବ୍ୟବସାୟ ଆରମ୍ଭ କଲେ। ହେଲେ ରାଜେନ୍ଦ୍ରଙ୍କର ରୁଚି ସିନେମାରେ ଥିଲେ। ଏଥିପାଇଁ ସେ ଫିଲ୍ମ ଦୁନିଆରେ ନିଜ ଭାଗ୍ୟ ପରୀକ୍ଷା କରିବାକୁ ନିଷ୍ପତ୍ତି ନେଲେ। ବାପାଙ୍କ ଘଣ୍ଟା ବିକି ମୁମ୍ଵାଇ ଚାଲିଆସିଲେ। ସେତେବେଳେ ପକେଟ୍ରେ ଥିଲା ମାତ୍ର ୫୦ ଟଙ୍କା।
ମୁମ୍ଵାଇ ଆସିବା ପରେ ରାଜେନ୍ଦ୍ର ନିର୍ଦ୍ଦେଶକ ଏଚଏସ ରୱେଲଙ୍କ ସହାୟକ ରୂପରେ କାମ କଲେ। ସେତେବେଳେ ତାଙ୍କୁ ୧୫୦ ଟଙ୍କା ପାରିଶ୍ରମିକ ମିଳୁଥିଲା। ଏହି ସଙ୍ଘର୍ଷପୂର୍ଣ୍ଣ ଜୀବନ ମଧ୍ୟରେ ସେ ତାଙ୍କର ସ୍ଵପ୍ନକୁ ଭୁଲି ନଥିଲେ। ସିନେମାରେ କାମ କରିବା ଶିଖୁଥିଲେ। ୧୯୫୦ରେ ତାଙ୍କର ପ୍ରଥମ ଫିଲ୍ମ ଯୋଗନ ରିଲିଜ୍ ହୋଇଥିଲା। ହେଲେ ନାଁ କରିବା ପାଇଁ ରାଜେନ୍ଦ୍ରଙ୍କୁ ଆହୁରି ସମୟ ଲାଗିଥିଲା। ୧୯୫୭ରେ ବଲିଉଡରେ ରିଲିଜ୍ ହୋଇଥିବା ଆଇକନିକ ଫିଲ୍ମ ମଦର ଇଣ୍ଡିଆରେ ତାଙ୍କୁ ଲୋକପ୍ରିୟତା ମିଳିଥିଲା। ଫିଲ୍ମରେ ସେ ନରଗିସଙ୍କ ବଡ଼ ପୁଅ ରାମୁ ଭୂମିକାରେ ଅଭିନୟ କରିଥିଲେ।
ଏହାପରେ ରାଜେନ୍ଦ୍ର ସଫଳତାର ଗୋଟିଏ ପରେ ଗୋଟିଏ ସିଡ଼ି ଚଢିଥିଲେ। ପିଲ୍ମ ଗୁଞ୍ଜ ଉଠି ସେହନାଇ, ଧୁଲ କା ଫୁଲ, ମେରେ ମେହବୁବ, ଆଇ ମିଲନ କି ବେଲା, ସଙ୍ଗମ, ଆରଜୁ, ସୁରଜ ଭଳି ବ୍ୟାକ୍ ଟୁ ବ୍ୟାକ୍ ହିଟ୍ ଫିଲ୍ମ ଦେଇଚାଲିଥିଲେ। ଗୁଞ୍ଜ ଉଠି ସେହନାଇ ଫିଲ୍ମ ୨୫ ସପ୍ତାହ ଯାଏଁ ହଲ୍ରେ ଧମାଲ୍ କରିଥିଲା। ଏହି ଫିଲ୍ମରୁ ତାଙ୍କୁ ଜୁବଲି କୁମାର ନାମ ମିଳିଥିଲା। ତେବେ ବଲିଉଡରେ ରାଜେଶ ଖନ୍ନାଙ୍କ ଏଣ୍ଟ୍ରି ପରେ ରାଜେନ୍ଦ୍ରଙ୍କ ଦବଦବା କମିଥିଲା। ସେ ଗଭୀର ଆର୍ଥିକ ସଙ୍କଟ ଦେଇ ଗତି କଲେ। ଯେଉଁଥିପାଇଁ ସେ ତାଙ୍କ ଲକି ଘର ବିକ୍ରି କରିବାକୁ ବାଧ୍ୟ ହେଲେ। ୧୯୯୯ ଜୁଲାଇ ୧୨ରେ ତାଙ୍କର ନିଧନ ହୋଇଥିଲା। ପୁଅ କୁମାର ଗୌରବଙ୍କ ଜନ୍ମଦିନର ଗୋଟିଏ ଦିନ ପୂର୍ବରୁ ସେ ଦୁନିଆରୁ ବିଦାୟ ନେଇଥିଲେ।
