ନୂଆଦିଲ୍ଳୀ ୦୧/୧୧: ଏକ ନିର୍ଦ୍ଧିଷ୍ଟ ବୟସ ପରେ ଘରର ବରିଷ୍ଠମାନଙ୍କ ବ୍ୟବହାରରେ ପରିବର୍ତ୍ତନ ଆସିଥାଏ । ଏପରିକି ସେମାନେ ଚିଡ୍ଚିଡା ହୋଇଯାଇଥାନ୍ତି, ଏପରିକି ସେମାନଙ୍କୁ ବୁଝିବା ମଧ୍ୟ କଷ୍ଟକର ହୋଇପଡିଥାଏ । ଯଦି ଆପଣଙ୍କ ଘରେ ଏମିତି ସ୍ଥିତି ଉପୁଜିଥାଏ, ତେବେ ଚାଲନ୍ତୁ ଜାଣିବା ଘରେ ଥିବା ବୟସ୍କମାନଙ୍କୁ କେମିତି ନିୟନ୍ତ୍ରିତ କରିପାରିବେ । ଏକ ନିର୍ଦ୍ଧିଷ୍ଟ ବୟସ ବିତିବା ପରେ ସମସ୍ତଙ୍କୁ ବୟସ୍କର ଆଖ୍ୟା ଦିଆଯାଇଥାଏ । ସେମାନେ ଜୀବନରେ ବହୁ ଉତ୍ଥାନ-ପତ୍ତନ ଦେଖି ଦେଖି ସେହି ସ୍ଥାନରେ ପହଞ୍ଚିଥାନ୍ତି । ବୟସ ବଢିବା ସହ ସେମାନଙ୍କ ଭିତରେ ଜିଦି ଓ ରାଗ ଏକାଠି ହୋଇ ଧୀରେ ଧୀରେ ବଢିଥାଏ । ତେଣୁ ସେମାନଙ୍କୁ ବୁଝିବା ପରିବାର ସଦସ୍ୟଙ୍କ ପାଇଁ ଖୁବ୍ କଷ୍ଟକର ହୋଇଥାଏ । କିନ୍ତୁ ଅସମ୍ଭବ ନୁହେଁ । ଚାଲନ୍ତୁ ଜାଣିବା ଏମିତି କିଛି ଆଇଡିଆ ।
ବୟସ୍କଙ୍କ ରାଗିବାର କାରଣ ଜାଣନ୍ତୁ: ଘରେ ଥିବା ବୟସ୍କ ଲୋକମାନେ ଖୁବ୍ ଶୀଘ୍ର ରାଗି ଯାଇଥାନ୍ତି । ଆଉ ରାଗରେ ଏଣୁତେଣୁ ବହୁତ କିଛି କହିଦେଇଥାନ୍ତି । ଏହି ସ୍ଥିତିରେ ପିଲାମାନେ ବରିଷ୍ଠମାନଙ୍କ ରାଗର କାରଣ ବୁଝିବା ପରିବର୍ତ୍ତେ ଓଲଟା ଝଗଡା କରି ବସନ୍ତି । ଏପରି କରିବା ପରିବର୍ତ୍ତେ ବୟସ୍କମାନଙ୍କ ପାଖରେ ବସି ତାଙ୍କ ରାଗିବାର କାରଣ ବୁଝିବାକୁ ଚେଷ୍ଟା କରିବା ଆବଶ୍ୟକ । ଏହାବ୍ୟତୀତ ପରିବାର ସଦସ୍ୟମାନେ ବୟସ୍କମାନଙ୍କୁ ସବୁବେଳେ ଖୁସି ରଖିବାକୁ ବିଭିନ୍ନ ପ୍ରୟାସ କରିବା ଉଚିତ୍ ।
ଗୁରୁତ୍ୱପୂର୍ଣ୍ଣ ସଦସ୍ୟ ହେବାର ଅନୁଭବ କରାନ୍ତୁ: ଅନେକ ସମୟରେ ଘରର ଅନ୍ୟ ସଦସ୍ୟମାନେ ବୟସ୍କମାନଙ୍କୁ ଅଣଦେଖା କରିଦେଇଥାନ୍ତି । ଜାଣିରଖନ୍ତୁ ଯେ ଏହା ମଧ୍ୟ ବୟସ୍କମାନଙ୍କ ଚିଡ୍ଚିଡା ହେବାର ଅନ୍ୟତମ ଲକ୍ଷଣ ହୋଇପାରେ । ତେଣୁ ଘରର ବୟସ୍କମାନଙ୍କୁ ଗୁରୁତ୍ୱପୂର୍ଣ୍ଣ ବୋଲି ଭାବିବା ସହ ଅନୁଭବ କରାନ୍ତୁ । ଯଥାସମ୍ଭବ ସବୁ ସମୟରେ ସେମାନଙ୍କ ଯତ୍ନ ନେବାକୁ ଚେଷ୍ଟା କରନ୍ତୁ । ସବୁଦିନ ଦେହ କେମିତି ଅଛି ବୋଲି ନିଶ୍ଚୟ ପଚାରନ୍ତୁ, ସିଢି ଚଢିବା ସମୟରେ ହାତ ଧରନ୍ତୁ, ଆଖାପାଖକୁ ଯିବା ସମୟରେ ସାଙ୍ଗରେ ଯାଆନ୍ତୁ । ଏପରି କରିବା ଦ୍ୱାରା ସେମାନେ ନିଜକୁ ଗୁରୁତ୍ୱପୂର୍ଣ୍ଣ ଭାବିବା ସହ ଖୁସି ହୋଇଥାନ୍ତି ।
ନିୟମିତ ବୟସ୍କଙ୍କ ସହ କିଛି ସମୟ ବିତାନ୍ତୁ: ଆଜିକାଲି ପ୍ରାୟ ସମସ୍ତଙ୍କ ପାଖରେ କେବଳ କାମ ହିଁ କାମ ରହୁଛି । ତେଣୁ ବ୍ୟସ୍ତ ରହିବା ସ୍ୱାଭାବିକ । ଏପରି ପରିସ୍ଥିତିରେ ଘରର ବୟସ୍କ ଲୋକମାନେ ଉଦାସ ରହିଥାନ୍ତି । କ୍ରମଶଃ ଚିଡଚିଡା ମଧ୍ୟ ହୋଇପଡିଥାନ୍ତି । ତେଣୁ ଘରର ଅନ୍ୟ ସଦସ୍ୟମାନେ ନିଜ କାମରୁ କିଛି ସମୟ ବାହାର କରି ସେମାନଙ୍କ ପାଖରେ ସମୟ ବିତାଇବା ଜରୁରି । ସେମାନଙ୍କ ସହ କିଛି ନା କିଛି କଥାବାର୍ତ୍ତା ନିଶ୍ଚୟ ହୁଅନ୍ତୁ । ନିଜର ଖୁସି ବାଣ୍ଟିବା ସହ ତାଙ୍କ ଅନୁଭବରୁ କିଛି ଶିଖିବାକୁ ଚେଷ୍ଟା କରନ୍ତୁ ।
ସମସ୍ୟାକୁ ବରିଷ୍ଠଙ୍କ ସହ ବାଣ୍ଟନ୍ତୁ: କେତେକ ଘରେ ଲୋକମାନେ ବରିଷ୍ଠମାନଙ୍କୁ ଆଉଟ୍ଡେଟେଡ୍ ଭାବି ଅନେକ କଥା ଓ ସମସ୍ୟାକୁ ବାଣ୍ଟି ନଥାନ୍ତି । କିନ୍ତୁ ଜାଣନ୍ତି କି ସେମାନଙ୍କ ପାଖରେ ଥିବା ଅନୁଭବ ଆପଣଙ୍କ ସମସ୍ୟାକୁ ଚୁଟ୍କିରେ ସମାଧାନର ବାଟ ଦେଖାଇ ଦେଇପାରେ । ଏପରିକି ଘରର ବଡ଼ମାନଙ୍କ ସହ ସମସ୍ୟା ବାଣ୍ଟିବା ଦ୍ୱାରା ମଧ୍ୟ ମନ ହାଲ୍କା ଲାଗିବା ସହ ସେମାନଙ୍କୁ ଖୁସି ଲାଗିବ । ଏପରି କରିବା ଦ୍ୱାରା ସେମାନଙ୍କ ଚିଡ୍ ଚିଡାପଣ ଦୂର ହୋଇଥାଏ ।
