ଉତ୍ତରପ୍ରଦେଶ, ୧୫।୯: ହେଲମେଟ୍ ନ ପିନ୍ଧିବାରୁ ମୋବାଇଲକୁ ଆସୁଛି ଚାଲାଣର ଲମ୍ୱା ଚଉଡ଼ା ମେସେଜ୍ । ଦୁଇ ଚକିଆ ଯାନ ପାଇଁ ନୁହେଁ, ଚାରି ଚକିଆ ଯାନ ପାଇଁ । ଏମିତି ଜଣେ କାର ଚାଳକଙ୍କ ସାଙ୍ଗରେ ଘଟିଛି । ବ୍ୟକ୍ତି ଜଣକ କାର୍ ଚଳାଇ ଘରକୁ ଫେରିଲେ । ମୋବାଇଲକୁ ମେସେଜ ଆସିଲା । ଯେଉଁଥିରେ ସେ ହେଲମେଟ ପିନ୍ଧିନଥିବାରୁ ଫାଇନ କଟିଥିବା ଲେଖାଥିଲା । ଉତ୍ତରପ୍ରଦେଶ ଗାଜିଆବାଦରେ ଏଭଳି ଅଜବ ମାମଲା ସାମନାକୁ ଆସିଛି । ଜଣେ କାର ଚାଳକଙ୍କର ହେଲମେଟ ନ ପିନ୍ଧିଥିବା ପାଇଁ ଫାଇନ ଆସିଛି । ତେବେ ବାସ୍ତବରେ ଘଟଣା କ’ଣ ଆସନ୍ତୁ ଜାଣିବା । ଗାଜିଆବାଦରେ ଟ୍ରାଫିକ ପୁଲିସର ଅବହେଳାର ଏକ ଅନନ୍ୟ ଘଟଣା ସାମ୍ନାକୁ ଆସିଛି ।
.webp)
ଜଣେ କାର ମାଲିକଙ୍କୁ ହେଲମେଟ୍ ପିନ୍ଧି ନଥିବାରୁ ମୋଟର ଯାନ ଆଇନ ଅନୁଯାୟୀ, ହଜାରେ ଟଙ୍କା ଜରିମାନା କଟାଯାଇଥିଲା । ଯେତେବେଳେ ଏ କାର୍ ମାଲିକ ଜଣକ ପୁଲିସକୁ ଘଟଣା ସମ୍ପର୍କରେ ପଚାରିଲେ ସ୍ଥାନୀୟ ପୁଲିସ ଅଧିକାରୀ ଏହାକୁ କୌଣସି ତ୍ରୁଟି ବୋଲି କହିଛି । ସୋସିଆଲ ମିଡିଆରେ ଏକ ଚାଲାଣର ଫଟୋ ଭାଇରାଲ ହେବା ପରେ ଏହି ମାମଲା ଚର୍ଚ୍ଚାକୁ ଆସିଥିଲା, ଯେଉଁଥିରେ ଦୁଇ ଚକିଆ ଯାନ ପାଇଁ ଉଲ୍ଲଂଘନ ଉଲ୍ଲେଖ କରାଯାଇଥିଲା କିନ୍ତୁ ଫଟୋଟି ଏକ କାର୍ର ଥିଲା । ଏହି ଫଟୋ ସ୍ଥାନୀୟ ପଞ୍ଜୀକରଣ ନମ୍ବର ଥିବା ଏକ କାର୍ର ଥିଲା । ସୋମବାର ଜାରି ହୋଇଥିବା ଚାଲାଣରେ ଦୁଇ ଚକିଆ ଯାନ ସମ୍ବନ୍ଧୀୟ ଉଲ୍ଲଂଘନ ଉଲ୍ଲେଖ କରାଯାଇଥିଲା ଏବଂ ରାଜ ନଗର ଏକ୍ସଟେନସନର ଅଜ୍ଞାରା ସୋସାଇଟି ଛକ ନିକଟରେ ପାର୍କିଂ ହୋଇଥିବା ଏକ କାର୍ର ଫଟୋ ଥିଲା ।
ବ୍ୟକ୍ତି ଜଣକ ନିଜ ଫୋନରେ ଏଭଳି ମେସେଜ ଆସିଥିବାର ଦେଖି ଆଶ୍ଚର୍ଯ୍ୟ ହୋଇଯାଇଥିଲେ । କାରଣ ଟ୍ରାଫିକ ନିୟମ ଅନୁସାରେ, କାର୍ ଚାଳକଙ୍କ ପାଇଁ ହେଲମେଟ୍ ପିନ୍ଧିବା ବାଧ୍ୟତାମୂଳକ ନୁହେଁ । ଏହି ସମ୍ପୂର୍ଣ୍ଣ ଘଟଣା ସ୍ପଷ୍ଟ କରିଦେଲା ଯେ, ଚାଲାଣ ଜାରି କରିବା ସମୟରେ କୌଣସି ଅବହେଳା ହୋଇଛି । ଅଧିକାରୀମାନେ କହିଛନ୍ତି ଯେ, ଜଣେ ଟ୍ରାଫିକ୍ ସବ୍-ଇନସ୍ପେକ୍ଟର ‘ନୋ-ପାର୍କିଂ’ ଜୋନ୍ରେ ପାର୍କିଂ ହୋଇଥିବା ଏକ କାରର ଫଟୋ ଉଠାଇଥିଲେ କିନ୍ତୁ, ଅସାବଧାନତାବଶତଃ ଏହି ଫଟୋଟି ଏକ ଦୁଇ ଚକିଆ ଯାନର ଚାଲାଣରେ ଲଗାଯାଇଥିଲା । ଏହି ଘଟଣାର ପ୍ରତିକ୍ରିୟା ଦେଇ ଅତିରିକ୍ତ ଡେପୁଟି କମିଶନର ଅଫ୍ ପୋଲିସ ଟ୍ରାଫିକ୍ ସଚିଦାନନ୍ଦ କହିଛନ୍ତି, “ଏହା କେବଳ ଏକ ମାନବୀୟ ତ୍ରୁଟି । ଏହା କିପରି ଘଟିଲା ତାହା ଉପରେ ଆମେ ତଦନ୍ତ କରୁଛୁ । ସୋସିଆଲ ମିଡିଆରେ ଏ ଘଟଣାକୁ ପୁଲିସର ଅବହେଳା ବୋଲି ଅନେକ ୟୁଜର୍ସ କହିଛନ୍ତି । କିଛି ୟୁଜର୍ସ ଲେଖିଛନ୍ତି ଏବେ କେବଳ ବାଇକ ନୁହେଁ କାର୍ ଚଳାଇବା ବେଳେ ବି ହେଲମେଟ୍ ପିନ୍ଧିବାକୁ ହେବ ।
