ପୁରୀ,୨୩/୧୧: ମାଲିକାଣୀଙ୍କୁ ବଞ୍ଚାଇବା ଲାଗି ଜୀବନ ଦେଇଛି ପୋଷା କୁକୁର । ଏହା ଏକ ଫିଲ୍ମର କାହାଣୀ ଭଳି ଲାଗୁଥିଲେ ବି ସତ । ତାଳବଣିଆ ଥାନା ଅଧୀନ ସିଦ୍ଧମହାବୀର ନୀଳଚକ୍ର ଲେନ୍ରେ ଘଟିଛି ଏଭଳି ଏକ ଘଟଣା । କୁକୁରକୁ ଅତି ବୀଭତ୍ସ ଭାବେ ଛୁରି ଭୁସି ହତ୍ୟା କରିଛି ମାଲିକାଣୀଙ୍କ ସ୍ୱାମୀ । ମୃତ କୁକୁର ମାଲିକାଣୀଙ୍କ ଭାଇ ଏନେଇ ତାଳବଣିଆ ଥାନାରେ ଏତଲା ଦେଇଛନ୍ତି । ପୁଲିସ ମାମଲା ରୁଜୁ କରି କୁକୁରକୁ ହତ୍ୟା କରିଥିବା ବ୍ୟକ୍ତିଙ୍କୁ ଖୋଜୁଛି ।
ଖବର ଅନୁସାରେ ସିଦ୍ଧମହାବୀର ଦାଦାବାଡ଼ି ଅଞ୍ଚଳରେ ଜଣେ ଯୁବତୀଙ୍କ ବାପଘର । ସେ ଭତ ୬ ବର୍ଷ ହେବ ଏକ କୁକୁରକୁ ପାଳିଥିଲେ। ଦେଢ଼ବର୍ଷ ତଳେ ତାଙ୍କର ବାହାଘର ହୋଇଗଲା । ଯୁବତୀଙ୍କର ବାହାଘର ହୋଇଯିବା ପରେ ଏକାକୀ ରହି କୁକୁରଟି ଝୁରି ଝୁରି ଅସୁସ୍ଥ ହୋଇଗଲା । ତେଣୁ ବାଧ୍ୟ ହୋଇ ବାପଘର ଲୋକେ ଝିଅ ପାଖରେ କୁକୁରକୁ ଛାଡ଼ି ଦେଇଥିଲେ । ବିବାହର କିଛିଦିନ ପରେ ସିଦ୍ଧମହାବୀର ନୀଳଚକ୍ର ଲେନ୍ରେ ଭଡ଼ାଘରେ ରହିଥିଲେ ଦମ୍ପତି । ସେମାନଙ୍କ ପାଖରେ କୁକୁର ରହୁଥିଲା । ବାହାଘରର ଅଳ୍ପଦିନ ପରେ ମହିଳାଙ୍କୁ ଯୌତୁକ ପାଇଁ ସ୍ୱାମୀ ନିର୍ଯାତନା ଦେବା ଆରମ୍ଭ କରିଥିଲେ । ତେବେ ମାଲିକାଣୀ କାନ୍ଦୁଥିବା ଦେଖିବାମାତ୍ରେ କୁକୁରଟି ତାଙ୍କ ସ୍ୱାମୀଙ୍କୁ ଭୁକୁଥିଲା । ଉଭୟଙ୍କ ମଧ୍ୟରେ ଝଗଡ଼ା ବଢ଼ିବାରେ ଲାଗିଥିଲା । ହଠାତ୍ ଛୁରି ଧରି ତାଙ୍କ ସ୍ୱାମୀ ମହିଳାଙ୍କୁ ଭୁସିବାକୁ ଆସୁଥିବା ଦେଖି କୁକୁରଟି ଲମ୍ଫ ମାରିଥିଲା । ଏମିତିକି ସ୍ୱାମୀ ହାତରୁ ଛୁରି ଖସିପଡ଼ିଥିଲା । କୁକୁରଟି ମହିଳାଙ୍କ ସ୍ୱାମୀକୁ ଜୋର୍ରେ ଭୁକି ଡରାଇଥିଲା । ଏତିକିରେ ସ୍ୱାମୀଙ୍କ ରାଗ ପଞ୍ଚମ ହୋଇଯାଇଥିଲା । ମୋତେ ଭୁକୁଛୁ କହି ସେହି ଛୁରିରେ କୁକୁରକୁ ଭୁସି ଦେଇଥିଲେ । ବାରମ୍ବାର ଛୁରି ଭୁସିବା ଫଳରେ କୁକୁରଟି ଛଟପଟ ହୋଇଥିଲା । ଛୁରାଘାତରେ ପ୍ରବଳ ରକ୍ତସ୍ରାବ ଦେଖି ମହିଳା ଜଣ ଘରୁ କବାଟ ଖୋଲି ବାହାରକୁ ଦୌଡ଼ି ଆସିଥିଲେ । ବାହାରୁ କବାଟ କିଳି ବାପଘର ଲୋକଙ୍କୁ ଖବର ଦେଇଥିଲେ । ବାପଘର ଲୋକେ ପହଞ୍ଚିବା ପରେ କବାଟ ଖୋଲି ଥିଲେ । କୁକୁର ମରି ପଡ଼ିଥିବା ଦେଖିଥିଲେ । ସେମାନଙ୍କୁ ଛୁରି ଦେଖାଇ ଭୟଭିତ କରି ମହିଳାଙ୍କ ସ୍ୱାମୀ ସେଠାରୁ ଖସି ପଳାଇଥିଲା । ଏନେଇ ଘଟଣାର ଅନୁସନ୍ଧାନ ଚାଲିଥିବା କହିଛନ୍ତି ଆଇଆଇସି ପବିତ୍ର ମୋହନ ମହାରଣା ।
