ନୂଆଦିଲ୍ଲୀ ୦୨/୦୧: ପୂର୍ବତନ ଅଧିନାୟକ ମହେନ୍ଦ୍ର ସିଂ ଧୋନି ହଠାତ ଅନ୍ତର୍ଜାତୀୟ କ୍ରିକେଟ୍ରୁ ସନ୍ନ୍ୟାସ ନେଇ ପ୍ରଶଂସକଙ୍କୁ ସେତେବେଳେ ଚକିତ କରି ଦେଇଥିଲେ । ସେ ଏହାପରେ କେବେ ନିଜ ନିଷ୍ପତ୍ତି ସଂପର୍କରେ କାହାକୁ କିଛି କହି ନାହାନ୍ତି । ସର୍ବଦା ନିରବ ଏବଂ ଗଣମାଧ୍ୟମ ଠାରୁ ଦୂରେଇ ରହିଛନ୍ତି । ନିରବତା ଭାଙ୍ଗି ଦୀର୍ଘ ଦିନ ପରେ ଧୋନି ନିଜ ଅବସର ସଂପର୍କରେ ମୁହଁ ଖୋଲିଛନ୍ତି । ଅବସର ନେଇ ଅନ୍ତର୍ଜାତୀୟ କ୍ରିକେଟ୍କୁ ମିସ୍ କରୁ ନାହିଁ ବୋଲି ସେ କହିଛନ୍ତି ।
ୟୁରୋଗ୍ରୀପ ଟାୟାରସ ୟୁ ଟ୍ୟୁବ ଚ୍ୟାଲେନରେ ଧୋନି କହିଛନ୍ତି, ‘ଯଦି ଆପଣ କୌଣସି ନିଷ୍ପତ୍ତି ନେଇ ସାରିଛନ୍ତି ସେ ବିଷୟରେ ପୁଣି ଚିନ୍ତା କରିବାର ଆବଶ୍ୟକତା ନାହିଁ । ମୋ ଦେଶ ପାଇଁ ଯାହା ବି କରିଛି ସେଥିପାଇଁ ବହୁତ ଖୁସି ରହିଛି । ଖେଳ ଛାଡ଼ିବା ପରେ ସାଙ୍ଗମାନଙ୍କ ସହ ସମୟ ବିତାଇବାକୁ ସମୟ ମିଳିଛି । ମଟରସାଇକେଲ ଚଳାଉଛି । ଯାହା ମୋର ଅତି ପ୍ରିୟ । ଯଦିଓ ମୁଁ ଦୂର ପଥ ଚଳାଇ ଯାଇ ନାହିଁ । ପରିବାରକୁ ସମୟ ବି ଦେଉଛି ।’ ଧୋନି ଅନ୍ତର୍ଜାତୀୟ କ୍ରିକେଟ୍ ଛାଡ଼ିବା ପରେ ଆଇପିଏଲ ଖେଳିବା ଜାରି ରଖିଛନ୍ତି ।
ସେ ୨୦୨୦ ଅଗଷ୍ଟ ୧୫ ତାରିଖରେ ସନ୍ନ୍ୟାସ ଘୋଷଣା କରିଥିଲେ । ବର୍ତ୍ତମାନ ତାଙ୍କୁ ଏବେ ୪୩ ବର୍ଷ ବୟସ । ଚେନ୍ନାଇ ସୁପରକିଙ୍ଗ୍ସ ଧୋନିଙ୍କୁ ଏଥର ୪ କୋଟି ଟଙ୍କାରେ ଦଳରେ ରଖିଛି । ୧୫ ବର୍ଷର ଅନ୍ତର୍ଜାତୀୟ କ୍ୟାରିୟରରେ ଧୋନି ୨୦୦୭ରେ ଟି-ଟ୍ୱେଣ୍ଟି ବିଶ୍ୱକପ୍, ୨୦୧୧ରେ ଦିନିକିଆ ବିଶ୍ୱକପ୍ ଏବଂ ୨୦୧୩ରେ ଦଳକୁ ଚାମ୍ପିଅନ୍ସ ଟ୍ରଫି ଜିତାଇଥିଲେ।
