ଦୁବାଇ,୨୦/୦୨: ଚାମ୍ପିଅନ୍ସ ଟ୍ରଫିରେ ଗୁରୁବାରଠୁ ଭାରତ ଅଭିଯାନ ଆରମ୍ଭ କରିବ। ପ୍ରଥମ ମ୍ୟାଚ୍ରେ ଦଳ ପଡ଼ୋଶୀ ବାଂଲାଦେଶକୁ ଭେଟିବ । ପୂର୍ବରୁ ୨ ଥର ଚାମ୍ପିଅନ୍ ଓ ୨ଥର ରନର୍ସ ଅପ୍ ହୋଇ ସାରିଥିବା ଭାରତୀୟ ଦଳ ଏଥର ମଧ୍ୟ ଟାଇଟଲ ଦାବିଦାର ରୂପେ ଗଣା ହେଉଥିଲେ ହେଁ ବିପର୍ଯ୍ୟୟ ଘଟାଇବାର ଯଥେଷ୍ଟ କ୍ଷମତା ରଖିଥିବା ବାଂଲାଦେଶ ଦାବି କରୁଛି ଓ ଭାରତକୁ କଡ଼ା ଟକ୍କର ଦେବାକୁ ପ୍ରସ୍ତୁତ ରହିଛି । ଦର୍ଶକଙ୍କ ପାଇଁ ଏହି ମ୍ୟାଚ୍ ଭରପୁର ମନୋରଞ୍ଜନ ଯୋଗାଇବ । ସମଗ୍ର ବିଶ୍ୱର ନଜର ଭାରତର ଦୁଇ ଭେଟେରାନ ରୋହିତ ଶର୍ମା ଓ ବିରାଟ କୋହଲିଙ୍କ ଉପରେ ରହିବ । ଉଭୟଙ୍କ ପ୍ରଦର୍ଶନ ଭଲ ରହିଲେ ଭାରତର ଟାଇଟଲ ସ୍ୱପ୍ନ ସଫଳ ହେବ ।
ଆଇସିସି ଟୁର୍ଣ୍ଣାମେଣ୍ଟ ଅର୍ଥ ରୋହିତଙ୍କ ରାଜୁତି । ସେ ପ୍ରତ୍ୟେକ ଆଇସିସି ଟୁର୍ଣ୍ଣାମେଣ୍ଟରେ ଶ୍ରେଷ୍ଠ ପ୍ରଦର୍ଶନ କରିଛନ୍ତି । ଗତ ୨୦୨୩ ଦିନିକିଆ ବିଶ୍ୱକପ୍ ଓ ୨୦୨୪ ଟି-ଟ୍ୱେଣ୍ଟି ବିଶ୍ୱକପ ଭଳି ରୋହିତଙ୍କ ବ୍ୟାଟ୍ରୁ ବିସ୍ଫୋରକ ଇନିଂସ ଦେଖିବାକୁଦର୍ଶକ ଆଶା ରଖିବେ । କେବଳ ଆଇସିସି ଟୁର୍ଣ୍ଣାମେଣ୍ଟରେ ରୋହିତ ୧୧୨ଟି ଛକା ମାରିସାରିଛନ୍ତି । ଅନ୍ୟ କୌଣସି ଭାରତୀୟ ଅଧାରେ ମଧ୍ୟ ପହଞ୍ଚି ନାହାନ୍ତି । ଗତ ଦିନିକିଆ ବିଶ୍ୱକପ୍ରେ ରୋହିତ ୧୨୫.୯୪ ଷ୍ଟ୍ରାଇକ ରେଟ୍ରେ ୫୯୭ ରନ୍ ସଂଗ୍ରହ କରିଥିଲେ । ଟି-ଟ୍ୱେଣ୍ଟି ବିଶ୍ୱକପ୍ରେ ମଧ୍ୟ ସେ ୧୫୬.୭୦ ଷ୍ଟ୍ରାଇକ ରେଟ୍ରେ ୨୫୭ ରନ ସଂଗ୍ରହ କରିଥିଲେ ।
ଭାରତୀୟ କ୍ରିକେଟ୍ ପ୍ରେମୀ ବିରାଟ କୋହଲିଙ୍କ ବ୍ୟାଟ୍ରୁ ବଡ଼ ଇନିଂସ ଦେଖିବାକୁ ଅପେକ୍ଷା କରିବା ସ୍ୱାଭାବିକ । କିନ୍ତୁ ଯୁବ ବ୍ୟାଟର ଶୁଭମନ ଗିଲଙ୍କ ଉପରେ ନଜର ରହିବ । ସେ ସମ୍ପ୍ରତି ଚମତ୍କାର ଫର୍ମରେ ରହିଛନ୍ତି । ଗତ ଇଂଲଣ୍ଡ ବିପକ୍ଷ ୩ମ୍ୟାଚ୍ ବିଶିଷ୍ଟ ସିରିଜରେ ସେ ୨ଟି ଅର୍ଦ୍ଧଶତକ ଓ ଗୋଟିଏ ଶତକ ବଳରେ ୨୫୯ ରନ ସଂଗ୍ରହ କରିଥିଲେ । ବାଂଲାଦେଶ ଦୁଇ ଅଭିଜ୍ଞ ବ୍ୟାଟର ମହମୁଦୁଲ୍ଲା ଓ ମୁସଫିକର ରହିମଙ୍କ ବ୍ୟାଟିଂ ଉପରେ ଅଧିକ ନିର୍ଭର କରିବ ।
ବାଂଲାଦେଶ ଦଳରେ ସାକିବ ଅଲ୍ ହାସନ ଓ ଲିଟନ ଦାସ ନାହାନ୍ତି । ତଥାପି ଭାରତକୁ କଡ଼ା ଟକ୍କର ଦେବାକୁ ଦଳ ପ୍ରସ୍ତୁତ ଥିବା ଅଧିନାୟକ ନଜମୁଲ ହୋସେନ ଶାନ୍ତୋ ପ୍ରକାଶ କରିଛନ୍ତି । ସାକିବଙ୍କ ଅନୁପସ୍ଥିତି ପ୍ରଭାବ ପକାଇବା ନିଶ୍ଚିତ । ମାତ୍ର ମେହଦି ହାସାନ ମିରାଜ ଏହି ସ୍ଥାନ ପୂରଣ କରିପାରିବେ । ପୂର୍ବରୁ ମଧ୍ୟ ସେ ଭାରତ ବିପକ୍ଷରେ ଅଲ୍ରାଉଣ୍ଡ ପ୍ରଦର୍ଶନ କରି ନିଜ ଦଳକୁ ଜିତାଇ ସାରିଛନ୍ତି ।
ଦିନିକିଆ କ୍ରିକେଟରେ ମଧ୍ୟ ଓଭର ଗୁଡ଼ିକରେ (୧୧ରୁ ୪୦ ତମ ଓଭର) ଶୃଙ୍ଖଳିତ ବୋଲିଂ କରି ପ୍ରତିପକ୍ଷ ବ୍ୟାଟରଙ୍କୁ ବାନ୍ଧି ରଖିବା ଓ ନିୟମିତ ବ୍ୟବଧାନରେ ୱିକେଟ୍ ହାସଲ କରିବା ବିଜୟର ମୂଳ ମନ୍ତ୍ର । ମଧ୍ୟ ଓଭରଗୁଡ଼ିକରେ ସଫଳ ହେବା ଭଳି ବୋଲର ଭାରତ ନିକଟରେ ରହିଛି । କୁଲଦୀପ ଯାଦବ ଓ ଅକ୍ଷର ପଟେଲ ଏଥିପାଇଁ ବେଶ୍ ଉପଯୋଗୀ ସାବ୍ୟସ୍ତ ହେବେ । ୨୦୧୭ରେ ଦିନିକିଆ ପଦାର୍ପଣ କରିବା ଦିନଠୁ କୁଲଦୀପ ମଧ୍ୟ ଓଭରଗୁଡ଼ିକରେ ମୋଟ୍ ୧୩୯ଟି ୱିକେଟ୍ ନେଇଛନ୍ତି ।
ଟସ୍ ଜିତିଲେ ଫିଲ୍ଡିଂ: ଦୁବାଇ ଅନ୍ତର୍ଜାତୀୟ ଷ୍ଟାଡ଼ିୟମ୍ର ପିଚ୍କୁ ନେଇ ପୂର୍ବାନୁମାନ କରିବା କଷ୍ଟକର । ତଥାପି ପିଚ୍ ସାମାନ୍ୟ ମନ୍ଥର ରହିବା ଅନୁମାନ କରାଯାଉଛି । ଏଠାରେ ଖେଳାଯାଇଥିବା ମୋଟ୍ ୫୮ଟି ଦିନିକିଆରୁ ମାତ୍ର ୪ଟି ମ୍ୟାଚ୍ରେ ୩୦୦ରୁ ଊଦ୍ଧ୍ୱର୍ ରନ ସଂଗୃହୀତ ହୋଇଛି । ଗତ ଆଇଏଲ ଟି-ଟ୍ୱେଣ୍ଟି ସମୟରେ ଏହି ଗ୍ରାଉଣ୍ଡ୍ରେ କିଛି ମ୍ୟାଚ୍ ଖେଳାଯାଇଥିଲା । ୨ ସପ୍ତାହ ମଧ୍ୟରେ ପିଚ୍କୁ ଦିନିକିଆ ଉପଯୋଗୀ କରାଯାଇଥିବା କ୍ୟୁରେଟର ଦାବି କରିଛନ୍ତି । ପାକିସ୍ତାନର ପିଚ୍ ତୁଳନାରେ ଦୁବାଇ ପିଚ୍ ଅପେକ୍ଷାକୃତ ମନ୍ଥର ରହିବ । ଫଳରେ ସ୍ପିନରମାନେ ପିଚ୍ର ଫାଇଦା ଉଠାଇ ପାରିବେ । ଟସ ବିଜୟୀ ଦଳ ଫିଲ୍ଡିଂ ନିଷ୍ପତ୍ତି ନେବା ଆଶା କରାଯାଇପାରେ ।
ପ୍ରଥମ ମ୍ୟାଚ୍ରୁ ଚାମ୍ପିୟନ ଟ୍ରଫି ଆୟୋଜନ କରିଥିବା ପାକିସ୍ତାନର ଶୋଚନୀୟ ପରାଜୟ; ଡରାଇଲାଣି ବାଦ୍ ପଡ଼ିବା ଭୟ
ସମ୍ଭାବ୍ୟ ଦଳ
ଭାରତ: ରୋହିତ ଶର୍ମା(ଅଧିନାୟକ), ଶୁଭମନ ଗିଲ୍, ବିରାଟ କୋହଲି, ଶ୍ରେୟାସ ଆୟର, କେଏଲ ରାହୁଲ, ହାର୍ଦ୍ଦିକ ପାଣ୍ଡ୍ୟା, ରବିନ୍ଦ୍ର ଜାଡେଜା, ଅକ୍ଷର ପଟେଲ, କୁଲଦୀପ ଯାଦବ, ମହମ୍ମଦ ସାମି, ଅର୍ଶଦୀପ ସିଂହ ।
ବାଂଲାଦେଶ: ତନଜିଦ ହାସାନ, ସୌମ୍ୟ ସରକାର, ନଜମୁଲ ହୋସେନ ଶାନ୍ତୋ(ଅଧିନାୟକ), ତୌହିଦ ହୃଦୟ, ମୁସଫିକର ରହିମ, ମହମୁଦୁଲ୍ଲା, ମେହଦି ହାସାନ ମିରାଜ, ରିଶଦ ହୋସେନ, ଟସ୍କିନ ଅହମ୍ମଦ, ନାହିଦ ରାଣା, ମୁସ୍ତାଫିଜୁର ରେହମାନ ।
