ଦୁବାଇ,୦୪/୦୩: ଚଳିତ ଚାମ୍ପିଅନ୍ସ ଟ୍ରଫିରେ ଆଜି ଖେଳାଯିବ ପ୍ରଥମ ସେମି ଫାଇନାଲ୍ ମୁକାବିଲା । ଦୁଇ ପ୍ରମୁଖ ପ୍ରତିଦ୍ୱନ୍ଦ୍ୱୀ ଭାରତ ଓ ଅଷ୍ଟ୍ରେଲିଆ ଦୁବାଇ ଅନ୍ତର୍ଜାତୀୟ ଷ୍ଟାଡ଼ିୟମ୍ରେ ପରସ୍ପରକୁ ଭେଟିବେ । ରୋହିତ ବାହିନୀ ଅଷ୍ଟ୍ରେଲିଆକୁ ହରାଇ ୨୦୨୩ ବିଶ୍ୱକପ୍ ଫାଇନାଲ ମ୍ୟାଚ୍ ପରାଜୟର ପ୍ରତିଶୋଧ ନେବାକୁ ଚେଷ୍ଟା କରିବ ।
ଚାମ୍ପିଅନ୍ସ ଟ୍ରଫିରେ ଭାରତ ୨, ଅଷ୍ଟ୍ରେଲିଆ ୧
ଚାମ୍ପିଅନ୍ସ ଟ୍ରଫିରେ ଉଭୟ ଦଳ ପରସ୍ପରକୁ ୪ଥର ଭେଟିଛନ୍ତି । ଏଥିରୁ ଭାରତ ୨ଟି ଓ ଅଷ୍ଟ୍ରେଲିଆ ଗୋଟିଏ ମ୍ୟାଚ୍ ଜିତିଛନ୍ତି । ୨୦୦୯ ସଂସ୍କରଣରେ ଉଭୟ ଦଳ ମଧ୍ୟ ହେବାକୁ ଥିବା ମ୍ୟାଚ୍କୁ ବର୍ଷା ଧୋଇ ନେଇଥିଲା । ଏହା ପରଠୁ ଚାମ୍ପିଅନ୍ସ ଟ୍ରଫିରେ ଉଭୟ ସାମ୍ନା ସାମ୍ନି ହୋଇନାହାନ୍ତି ।
୨୦୧୦ ଠାରୁ ଏପର୍ଯ୍ୟନ୍ତ ଅଷ୍ଟ୍ରେଲିଆ ଏକମାତ୍ର ଦଳ ଭାବେ ଭାରତକୁ ସବୁ ଫର୍ମାଟ୍ରେ କଡ଼ା ଟକ୍କର ଦେଇ ଆସିଛି। ଗତ ୧୫ବର୍ଷ ମଧ୍ୟରେ ଅନ୍ୟ ସବୁ ଦଳ ବିପକ୍ଷରେ ଭାରତର ବିଜୟ ହାର ଅଧିକ ରହିଛି । କେବଳ ଅଷ୍ଟ୍ରେଲିଆ ବିପକ୍ଷରେ ବଜୟ ହାର ୫୦%(ସବୁଠୁ କମ୍) ରହିଛି । ଏହି ସମୟ ମଧ୍ୟରେ ଉଭୟ ଦଳ ପରସ୍ପର ବିପକ୍ଷରେ ୨୩ଟି ଲେଖାଏଁ ଦିନିକିଆ ମ୍ୟାଚ୍ ଜିତିଛନ୍ତି ।
ଗ୍ଲେନ ମ୍ୟାକ୍ସୱେଲ୍ ଆସନ୍ତା କାଲି ୧୭ରନ କଲେ ଦିନିକିଆ କ୍ରିକେଟ୍ରେ ୪୦୦୦ ରନ ପୂରଣ କରିବେ । ସେହିପରି ରାହୁଲ ୩୦୦୦ ଦିନିକିଆ ରନ୍ କ୍ଲବରେ ପ୍ରବେଶ କରିବା ପାଇଁ ଆଉ ୩୩ ରନ୍ ଆବଶ୍ୟକ କରୁଛନ୍ତି ।
ଅନଭିଜ୍ଞ ପେସ୍ ବାହିନୀ: ତାରକା ଖଚିତ ଭାରତୀୟ ବ୍ୟାଟିଂ ବିଭାଗକୁ ଅଟକାଇବା ପାଇଁ ଆସନ୍ତା କାଲି ଅଷ୍ଟ୍ରେଲିଆର ପେସ୍ ବାହିନୀ କି କୌଶଳ ଆପଣେଇବ, ଦେଖିବାକୁ ଦର୍ଶକ ଉତ୍ସୁକତାର ସହ ଅପେକ୍ଷା କରିଛନ୍ତି । ଅଷ୍ଟ୍ରେଲିଆର ପେସ୍ ବିଭାଗ ସମ୍ଭାଳୁଥିବା ନାଥାନ ଏଲିସ, ବେନ ଡାର୍ସିୟସ ଓ ସ୍ପେନସର ଜନସନ ଭାରତ ବିପକ୍ଷରେ ମାତ୍ର ୨ଟି ମ୍ୟାଚ୍ ଖେଳିଛନ୍ତି । ଭାରତୀୟ ବ୍ୟାଟର ଚମତ୍କାର ଫର୍ମରେ ରହିଛନ୍ତି। ଶୁଭମନ ଗିଲ୍ ଓ ବିରାଟ କୋହଲି ଶତକ ଅର୍ଜନ କରିସାରିଛନ୍ତି । ଶ୍ରେୟାସ ଆୟର, ହାର୍ଦ୍ଦିକ ପାଣ୍ଡ୍ୟା ଓ କେଏଲ ରାହୁଲ ମଧ୍ୟ ଉପଯୋଗୀ ବ୍ୟାଟିଂ କରିଛନ୍ତି । କେବଳ ରୋହିତ ଶର୍ମାଙ୍କ ବ୍ୟାଟ୍ରୁ ବଡ଼ ଇନିଂସ ଦେଖିବାକୁ ମିଳିନାହିଁ । ଅଷ୍ଟ୍ରେଲିଆକୁ ହରାଇବାକୁ ହେଲେ ରୋହିତଙ୍କ ବ୍ୟାଟ୍ରୁ ଏକ ବିସ୍ଫୋରକ ଇନିଂସ ଆବଶ୍ୟକ ପଡ଼ିବ । ଗତ ୨୦୨୪ ଟି-ଟ୍ୱେଣ୍ଟି ବିଶ୍ୱକପ୍ରେ ରୋହିତଙ୍କ ବିଧ୍ୱଂସୀ ବ୍ୟାଟିଂ ବଳରେ ଭାରତ ଅଷ୍ଟ୍ରେଲିଆକୁ ୨୪ ରନ୍ରେ ହରାଇଥିଲା । ରୋହିତ ୪୧ଟି ବଲ୍ରୁ ୭ଚୌକା ଓ ୮ଛକା ବଳରେ ୯୨ ରନ୍ର ଇନିଂସ ଖେଳିଥିଲେ ।
ଭାରତର ଚିନ୍ତା ହେଡ୍: ଭାରତ ପାଇଁ ଆସନ୍ତାକାଲି ଚିନ୍ତାର କାରଣ ସାଜିବେ ଅଷ୍ଟ୍ରେଲିଆ ଓପନର ଟ୍ରେଭିସ୍ ହେଡ୍ । ତାଙ୍କୁ ଅଟକାଇବା ପାଇଁ ରୋହିତଙ୍କୁ ସ୍ୱତନ୍ତ୍ର ରଣନୀତି ପ୍ରସ୍ତୁତ କରିବାକୁ ହେବ । ହେଡ୍ ଅନେକ ଥର ଭାରତଠୁ ବିଜୟ ଛଡ଼ାଇ ନେଇଛନ୍ତି । ଗତ ୨୦୨୩ ବିଶ୍ୱକପ୍ ଫାଇନାଲ୍ରେ ତାଙ୍କ ଇନିଂସକୁ ଭାରତୀୟ କ୍ରିକେଟ୍ ପ୍ରେମୀ କେବେ ଭୁଲିପାରିବେ ନାହିଁ । ସେ ଶତକ ଅର୍ଜନ କରି ଭାରତକୁ ହରାଇବାରେ ମୁଖ୍ୟ ଭୂମିକା ନିର୍ବାହ କରିଥିଲେ । ୨୦୨୪ ଟି-ଟ୍ୱେଣ୍ଟି ବିଶ୍ୱକପ୍ର ଉକ୍ତ ମ୍ୟାଚ୍ରେ ମଧ୍ୟ ସେ ୪୩ଟି ବଲ୍ରୁ ୭୬ ରନ୍ର ଏକ ବିସ୍ଫୋରକ ଇନିଂସ ଖେଳି ଆତଙ୍କ ଖେଳାଇଥିଲେ । ସେ ଆଉଟ୍ ହେବା ପରେ ଭାରତ ମ୍ୟାଚ୍କୁ ଫେରି ବିଜୟୀ ହୋଇଥିଲା । ହେଡଙ୍କୁ ସହଳ ଆଉଟ୍ କରିବା ଭାରତୀୟ ବୋଲରଙ୍କ ମୁଖ୍ୟ କାର୍ଯ୍ୟ ହେବ ।
ଦଳ ଅପରିବର୍ତ୍ତିତ ରଖିବ ଭାରତ: ଭାରତ ଏକାଦଶ ଅପରିବର୍ତ୍ତିତ ରଖିବା ଏକ ପ୍ରକାର ନିଶ୍ଚିତ । ନ୍ୟୁଜିଲାଣ୍ଡ ବିପକ୍ଷ ମୁକାବିଲା ଭଳି ଭାରତ ୪ଜଣ ସ୍ପିନର ନେଇ ଖେଳିବ । ଆଜିର ମ୍ୟାଚ୍ ପାଇଁ ଚୟନ କରାଯାଇଥିବା ପିଚ୍ରେ ପୂର୍ବରୁ ଗୋଟିଏ ମ୍ୟାଚ୍ ଖେଳ ହୋଇଛି । ୨୩ ତାରିଖରେ ଭାରତ ଓ ପାକିସ୍ତାନ ଏହି ପିଚ୍ରେ ଖେଳିଥିଲେ । ବ୍ୟବହୃତ ପିଚ୍ ଅପେକ୍ଷାକୃତ ମନ୍ଥର ହେବ । ତେଣୁ ସ୍ପିନରମାନ ଭରପୁର ଫାଇଦା ଉଠାଇବେ । ଅଷ୍ଟ୍ରେଲିଆ ଏକାଦଶରେ ପରିବର୍ତ୍ତନ ହେବ । ଓପନର ମାଥ୍ୟୁ ସର୍ଟ ଆହତ ହୋଇ ବିଦାୟ ନେଇଛନ୍ତି । ତାଙ୍କ ସ୍ଥାନରେ ଦଳକୁ ଆସିଥିବା କୁପର କନଲି ଓପନର ନୁହନ୍ତି । ସେ ମଧ୍ୟ କ୍ରମ ବ୍ୟାଟିଂ ଅଲ୍ରାଉଣ୍ଡର । ଦୁବାଇ ପିଚ୍କୁ ନଜରରେ ରଖି କନଲିଙ୍କୁ ଡକା ଯାଇଛି । ସେ ବାମ ହାତି ସ୍ପିନ୍ ବୋଲର । ଭାରତୀୟ ବ୍ୟାଟିଂ ବିଭାଗରେ ୬ଜଣ ଡାହାଣ ହାତି ବ୍ୟାଟର ରହିଛନ୍ତି । ତେଣୁ କନଲିଙ୍କ ସ୍ପିନ୍ ବୋଲିଂ ଫଳପ୍ରଦ ହେବ । କନଲି ମଧ୍ୟ କ୍ରମରେ ବ୍ୟାଟିଂ କଲେ ଟ୍ରେଭିସ୍ ହେଡ୍ଙ୍କ ସହ ୱିକେଟ୍ କିପର ଜୋସ ଇଂଲିଶ ଓପନ କରିବେ । ଘରୋଇ କ୍ରିକେଟ୍ରେ ଓପନ କରନ୍ତି ।
ଟସ ଜିତିଲେ ବ୍ୟାଟିଂ: ଦୁବାଇ ପିଚ୍ ମନ୍ଥର ରହୁଛି ଓ ସ୍ପିନରଙ୍କୁ ସହାୟତା କରୁଛି । ଭାରତ ଖେଳିଥିବା ୩ଟି ଯାକ ମ୍ୟାଚ୍ର ଦ୍ୱିତୀୟ ଭାଗରେ ପିଚ୍ ମନ୍ଥର ହୋଇଥିବା ଦେଖିବାକୁ ମିଳିଛି । ଅବଶ୍ୟ ଏଥିରୁ ୨ଟି ମ୍ୟାଚ୍ରେ ଭାରତ ବିଜୟ ଲକ୍ଷ୍ୟର ପିଛା କରି ଜିତିଛି । ପୂର୍ବ ମ୍ୟାଚଗୁଡ଼ିକ ଭଳି ଆଜି ପିଚ୍ ମନ୍ଥର ରହିବା ଏକ ପ୍ରକାର ନିଶ୍ଚିତ । ଫଳରେ ସ୍ପିନରମାନେ ପିଚ୍ରୁ ଯଥେଷ୍ଟ ଫାଇଦା ଉଠାଇ ପାରିବେ । ଟସ୍ ବେଶ୍ ଗୁରୁତ୍ୱ ବହନ କରିବ । କ୍ରମାନ୍ୱୟରେ ୧୦ଟି ମ୍ୟାଚ୍ରେ ଟସ ହାରିଥିବା ରୋହିତ ଆଜି ଟସ ଜିତିଲେ ବ୍ୟାଟିଂ ନିଷ୍ପତ୍ତ ନେବାକୁ ପଛାଇବେ ନାହିଁ।
ସମ୍ଭାବ୍ୟ ଦଳ
ଭାରତ: ରୋହିତ ଶର୍ମା(ଅଧିନାୟକ), ଶୁଭମନ ଗିଲ୍, ବିରାଟ କୋହଲି, ଶ୍ରେୟାସ ଆୟର, କେଏଲ ରାହୁଲ, ହାର୍ଦ୍ଦିକ ପାଣ୍ଡ୍ୟା, ରବିନ୍ଦ୍ର ଜାଡ଼େଜା, ଅକ୍ଷର ପଟେଲ,କୁଲଦୀପ ଯାଦବ,ବରୁଣ ଚକ୍ରବର୍ତ୍ତୀ, ମହମ୍ମଦ ସାମି ।
ଅଷ୍ଟ୍ରେଲିଆ: ଟ୍ରେଭିସ ହେଡ୍, ଜୋସ ଇଂଲିଶ, ଷ୍ଟିଭେନ ସ୍ମିଥ(ଅଧିନାୟକ), ମାର୍ନସ ଲାବୁସାନ, କୁପର କନଲି, ଆଲେକ୍ସ କ୍ୟାରୀ, ଗ୍ଲେନ ମ୍ୟାକ୍ସୱେଲ୍, ବେନ ଡାର୍ସିୟସ, ନାଥାନ ଏଲିସ୍, ସ୍ପେନ୍ସର ଜନସନ, ଆଡାମ ଜାମ୍ପା ।
