ଗୌହାଟୀ,୧୦/୧୦: ଚଳିତ ମହିଳା ଦିନିକିଆ ବିଶ୍ୱକପ୍ର ୧୧ତମ ଲିଗ୍ ମୁକାବିଲାରେ ଶୁକ୍ରବାର ନ୍ୟୁଜିଲାଣ୍ଡ ଓ ବାଂଲାଦେଶ ପରସ୍ପରକୁ ଭେଟିବେ । ପ୍ରଥମ ୨ଟି ମ୍ୟାଚ୍ରେ ପରାଜିତ ହୋଇଥିବା ନ୍ୟୁଜିଲାଣ୍ଡ ବିଜୟ ଖାତା ଖୋଲିବାକୁ ତତ୍ପର ରହିଥିବାବେଳେ ବାଂଲାଦେଶ ବିପର୍ଯ୍ୟୟ ପାଇଁ ପ୍ରସ୍ତୁତ । ଫଳରେ ମ୍ୟାଚ୍ଟି ସଂଘର୍ଷପୂର୍ଣ୍ଣ ହେବା ଆଶା କରାଯାଉଛି ।
ନ୍ୟୁଜିଲାଣ୍ଡ ପ୍ରଥମ ମ୍ୟାଚରେ ଅଷ୍ଟ୍ରେଲିଆ ଓ ଦ୍ୱିତୀୟ ମ୍ୟାଚରେ ଦକ୍ଷିଣ ଆଫ୍ରିକାଠାରୁ ପରାଜିତ ହୋଇଥିଲା । ଟପ ଅର୍ଡର ବ୍ୟାଟିଂ ବିଫଳତା ପରାଜୟର ପ୍ରମୁଖ କାରଣ ରହିଥିଲା । କେବଳ ଅଧିନାୟିକା ଶୋଫି ଡିଭାଇନଙ୍କୁ ଛାଡ଼ିଦେଲେ ଅନ୍ୟ କେହି ଉପଯୋଗୀ ବ୍ୟାଟିଂ କରିନାହାନ୍ତି । ତେଣୁ ବାଂଲାଦେଶକୁ ହରାଇବାକୁ ହେଲେ ନ୍ୟୁଜିଲାଣ୍ଡକୁ ପ୍ରଥମେ ବ୍ୟାଟିଂରେ ଉନ୍ନତି ଆଣିବାକୁ ହେବ ।
ବାଂଲାଦେଶ ଇତି ମଧ୍ୟରେ ୨ଟି ମ୍ୟାଚ ଖେଳିଛି । ପ୍ରଥମ ମ୍ୟାଚ୍ରେ ଦଳ ପାକିସ୍ତାନକୁ ହରାଇଥିଲା । ଏହାପରେ ଇଂଲଣ୍ଡଠୁ ପରାଜିତ ହୋଇଥିଲେ ହେଁ ଦଳ କଡ଼ା ମୁକାବିଲା କରିଥିଲା । ଦଳ ନିକଟରେ ଏକ ଦକ୍ଷ ସ୍ପିନ ବାହିନୀ ରହିଛି ଓ ଏହି ସ୍ପିନରମାନେ ପିଚ୍ର ଭରପୁର ଫାଇଦା ଉଠାଉଛନ୍ତି ।
ବର୍ଷାପଡ଼ା ଗ୍ରାଉଣ୍ଡର ପିଚ୍ ସ୍ପିନରଙ୍କୁ ଭରପୁର ସହାୟତା କରୁଛି । ଏଠାରେ ଖେଳାଯାଇଥିବା ୩ଟି ମ୍ୟାଚ୍ରେ ମୋଟ୍ ୪୪ଟି ୱିକେଟ୍ର ପତନ ଘଟିଛି । ଏଥିରୁ ସ୍ପିନରମାନେ ୩୩ଟି ୱିକେଟ୍ ନେଇଛନ୍ତି । ତେଣୁ ଟସ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିବା ନିଶ୍ଚିତ । ରାତ୍ରିରେ କାକର ପଡ଼ୁଥିବାରୁ ଦ୍ୱିତୀୟ ଭାଗରେ ବ୍ୟାଟିଂ ସହଜ ହେବ । ଫଳରେ ଟସ ବିଜୟୀ ଦଳ ଫିଲ୍ଡିଂ ନିଷ୍ପତ୍ତି ନେବା ଆଶା କରାଯାଉଛି ।
ସମ୍ଭାବ୍ୟ ଦଳ
ବାଂଲାଦେଶ: ରୁବ୍ୟା ହାଇଦର, ଶର୍ମିନ ଅଖତର, ନିଗାର ସୁଲତାନା (ଅଧିନାୟିକା), ଶୋଭନା ମୋସ୍ତାରି, ରିତୁ ମୋନି, ସୋର୍ନା ଅଖତର, ଫହିମା ଖାତୁନ, ନାହିଦା ଅଖତର, ରବେୟା ଖାନ, ମାରୁଫା ଅଖତର, ସଞ୍ଜିଦା ଅଖତର ମେଘଲା ।’
ନ୍ୟୁଜିଲାଣ୍ଡ: ସୁଜି ବେଟ୍ସ, ଜର୍ଜିୟା ପ୍ଲିମର, ଆମେଲିଆ କେର, ଶୋଫି ଡିଭାଇନ (ଅଧିନାୟିକା), ବ୍ରୁକ ହାଲିଡେ, ମାଡି ଗ୍ରୀନ, ଇସାବେଲା ଗେଜ, ଜେସ କେର/ରୋଜମେରୀ ମାଇର, ଲି ତାହୁହୁ, ଏଡେନ କାର୍ସନ, ବ୍ରି ଇଲିଂ ।
