ନଭି ମୁମ୍ବାଇ,୨୦/୧୦: ମହିଳା ଦିନିକିଆ ବିଶ୍ୱକପ୍ର ୨୧ତମ ଲିଗ୍ ମୁକାବିଲାରେ ଆଜି ଶ୍ରୀଲଙ୍କା ଓ ବାଂଲାଦେଶ ପରସ୍ପରକୁ ଭେଟିବାକୁ ଯାଉଛନ୍ତି । ଉଭୟ ଦଳର ସେମି ଫାଇନାଲ୍ ଆଶା ମଉଳି ସାରିଛି । ତଥାପି ଅନ୍ୟ ମ୍ୟାଚ୍ ଫଳାଫଳ ଉପରେ ଉଭୟ ଦଳର ଭାଗ୍ୟ ନିର୍ଭର କରୁଛି । ଫଳରେ ଦୁଇ ଦଳ ପଏଣ୍ଟ ତାଲିକାରେ ଉନ୍ନତି ଆଣିବାକୁ ପ୍ରୟାସ କରିବେ ।
ବାଂଲାଦେଶ ୫ଟି ମ୍ୟାଚ୍ ଖେଳି ଗୋଟିଏ ବିଜୟ ଓ ୪ଟି ପରାଜୟ ସହ ମୋଟ ୨ପଏଣ୍ଟ ପାଇ ତାଲିକାରେ ଷଷ୍ଠ ସ୍ଥାନରେ ରହିଛି । ସେହିପରି ଶ୍ରୀଲଙ୍କା ୫ଟି ମ୍ୟାଚ୍ରୁ ସମାନ ୨ପଏଣ୍ଟ ସହ ସପ୍ତମ ସ୍ଥାନରେ ରହିଛି । ବର୍ଷା ବାଧାପ୍ରାପ୍ତ ୨ଟି ମ୍ୟାଚ୍ରୁ ଦଳ ୨ପଏଣ୍ଟ ପାଇଛି ।
ବାଂଲାଦେଶ ପ୍ରଥମ ମ୍ୟାଚ୍ରେ ପାକିସ୍ତାନକୁ ହରାଇ ଅଭିଯାନ ଆରମ୍ଭ କରିଥିଲା । ମାତ୍ର ପରବର୍ତ୍ତୀ ୪ଟି ମ୍ୟାଚ୍ ପରାଜିତ ହୋଇଛି । ଦଳ ସବୁ ମ୍ୟାଚ୍ରେ ଲଢ଼ୁଆ ପ୍ରଦର୍ଶନ କରୁଥିଲେ ମଧ୍ୟ ମ୍ୟାଚ୍ ବିଜେତାଙ୍କ ଅନୁପସ୍ଥିତି ଅନୁଭବ କରୁଛି । ଶ୍ରୀଲଙ୍କାକୁ ହରାଇବାକୁ ହେଲେ ଦଳକୁ ବଡ଼ ସ୍କୋର କରିବାକୁ ପଡ଼ିବ । ପେସ୍ ବୋଲର ମାରୁଫା ଅକତର ଏକାଦଶକୁ ଫେରବା ସମ୍ଭାବନା ରହିଛି ।
ବର୍ଷା ଯୋଗୁ ଶ୍ରୀଲଙ୍କାର ୨ଟି ମ୍ୟାଚ୍ ଧୋଇଯାଇଛି । ଫଳରେ ଦଳର ସେମି ଆଶା ମଉଳିଯାଇଛି । ଦଳରେ ଏକାଧିକ ତାରକା ଖେଳାଳି ରହିଥିଲେ ମଧ୍ୟ ସେମାନେ ଦକ୍ଷତା ମୁତାବକ ପ୍ରଦର୍ଶନ କରିବାରେ ବିଫଳ ହୋଇଛନ୍ତି । ଆଜି ଶ୍ରୀଲଙ୍କା ଅଧିନାୟିକା ଚାମରି ଆଟ୍ଟାପଟୁ, ମଧ୍ୟକ୍ରମ ବ୍ୟାଟର ନୀଳକ୍ଷିକା ସିଲ୍ଭା ଏବଂ ସ୍ପିନର ଇନୋକା ରାଣାବୀରାଙ୍କ ଉପରେ ସମସ୍ତଙ୍କ ନଜର ରହିବ ।
ଚଳିତ ବିଶ୍ୱକପ୍ରେ ଡିୱାଇ ପାଟିଲ ଷ୍ଟାଡିୟମରେ ପ୍ରଥମ ମ୍ୟାଚ୍ ଖେଳାଯିବ । ପୂର୍ବରୁ ଏହି ଗ୍ରାଉଣ୍ଡରେ ୧୪ଟି ବିଜୟ ହଜାରେ ଟ୍ରଫି ମ୍ୟାଚ୍ ଖେଳାଯାଇଥିଲା । ପ୍ରଥମ ଇନିଂସ୍ ଆଭରେଜ ସ୍କୋର ୨୫୨ ରହିଛି । ଦ୍ୱିତୀୟ ଇନିଂସ୍ରେ ବ୍ୟାଟିଂ କରିଥିବା ଦଳ ୯ଟି ମ୍ୟାଚ୍ ଜିତିଛନ୍ତି । ତେଣୁ ଆଜି ଟସ୍ ବିଜୟୀ ଦଳ ଫିଲ୍ଡିଂ ନିଷ୍ପତ୍ତି ନେବା ଆଶା କରାଯାଉଛି।
ସମ୍ଭାବ୍ୟ ଦଳ
ବାଂଲାଦେଶ: ରୁବ୍ୟା ହାଇଦର, ଫରଗାନା ହକ୍, ଶର୍ମିନ ଅଖତର, ନିଗାର ସୁଲତାନା (ଅଧିନାୟିକା), ଶୋଭାନା ମୋସ୍ତାରି, ଶୋର୍ଣ୍ଣା ଅକତର, ଫହିମା ଖାତୁନ, ରାବେୟା ଖାନ, ରିତୁ ମୋନି, ନିଶିତା ଅକତର ନିଶି, ମାରୁଫା ଅକତର ।
ଶ୍ରୀଲଙ୍କା: ଚାମରି ଆଟ୍ଟାପଟୁ (ଅଧିନାୟିକା), ହାସିନି ପେରେରା, ଭୀଷ୍ମି ଗୁଣରତ୍ନେ, ହର୍ଷିତା ସମରବିକ୍ରମା, କବିଶା ଦିଲହାରୀ, ନୀଳକ୍ଷିକା ସିଲ୍ଭା, ଅନୁଷ୍କା ସଞ୍ଜିବନୀ, ପିଉମି ବତ୍ସଲା, ସୁଗନ୍ଦିକା କୁମାରୀ, ମଲକି ମହାରା, ଇନୋକା ରାଣାବୀରା
