ବିଶାଖାପଟ୍ଟନମ,୧୬/୧୦: ଚଳିତ ମହିଳା ଦିନିକିଆ ବିଶ୍ୱକପ୍ର ୧୭ତମ ଲିଗ ମ୍ୟାଚରେ ଆଜି ଅଷ୍ଟ୍ରେଲିଆ ଓ ବାଂଲାଦେଶ ପରସ୍ପରକୁ ଭେଟିବେ । ଡିଫେଣ୍ଡିଂ ଚାମ୍ପିଅନ୍ ଅଷ୍ଟ୍ରେଲିଆ ୭ ପଏଣ୍ଟ ସହ ଶୀର୍ଷ ସ୍ଥାନରେ ରହିଛି । ବାଂଲାଦେଶ ୪ଟି ମ୍ୟାଚ ଖେଳି ଅର୍ଜନ କରିଛି ୨ ପଏଣ୍ଟ । ସେମି ଫାଇନାଲ୍ରେ ପହଞ୍ଚିବାକୁ ହେଲେ ବାଂଲାଦେଶକୁ ଶେଷ ୩ଟି ଯାକ ଲିଗ ମ୍ୟାଚ ଜିତିବାକୁ ହେବ । ତେଣୁ ଆଜିର ମ୍ୟାଚ୍ ଏକ ସଂଘର୍ଷପୂର୍ଣ୍ଣ ମୁକାବିଲା ଦେଖିବାକୁ ମିଳିବ ।
ଏହି ମ୍ୟାଚ୍ରେ ଅଷ୍ଟ୍ରେଲିଆର ପଲା ଭାରି ରହିଥିଲେ ହେଁ ବାଂଲାଦେଶ କଡ଼ା ଟକ୍କର ଦେବା ନିଶ୍ଚିତ । ପୂର୍ବରୁ ଦଳ ପାକିସ୍ତାନକୁ ପରାସ୍ତ କରିଥିବାବେଳେ ଦକ୍ଷିଣ ଆଫ୍ରିକା ଓ ଇଂଲଣ୍ଡ ବିପକ୍ଷରେ ଘାତକ ବୋଲିଂ କରି ବିପର୍ଯ୍ୟୟ ଘଟାଇଥିଲା । କେବଳ ଅଭିଜ୍ଞତାର ଅଭାବ ଯୋଗୁଁ ଦଳ ଉଭୟ ମ୍ୟାଚ୍ରେ ପରାଜିତ ହୋଇଥିଲା । ବାଂଲାଦେଶର ବୋଲିଂ ବିଭାଗ ବେଶ୍ ଶୃଙ୍ଖଳିତ । ଭାରତୀୟ ପିଚ୍ ସ୍ପିନରଙ୍କୁ ଭରପୁର ସହାୟତା କରୁଛି । ବାଂଲାଦେଶ ନିକକ୍ଷରେ ଏକ ଦକ୍ଷ ସ୍ପିନ ବୋଲିଂ ବାହିନୀ ରହିଛି । କେବଳ ବ୍ୟାଟିଂରେ ଉନ୍ନତି ଆଣି ପାରିଲେ ଦଳ ବିଜୟ ହାସଲ କରିପାରିବ ।
ଆଜି ଅଷ୍ଟ୍ରେଲିଆ ଦଳର ମଧ୍ୟ ଆଧିପତ୍ୟ ଜାରି ରଖିବାକୁ ପ୍ରୟାସ କରିବ । ଅଧିନାୟିକା ଆଲିସା ହିଲି ଫର୍ମକୁ ଫେରିଥିବାରୁ ଦଳ ବେଶ୍ ଆସ୍ୱସ୍ତ । ସେ ଭାରତ ବିପକ୍ଷରେ ଶତକ ଅର୍ଜନ କରିଥିଲେ । ଭେଟେରାନ ଏଲିସ ପେରୀ ମଧ୍ୟ ଫର୍ମକୁ ଫେରିଛନ୍ତି । ତେଣୁ ଅଷ୍ଟ୍ରେଲିଆର ବିଜୟ ସମ୍ଭାବନା ଅଧିକ ।
