କଲମ୍ବୋ,୨୪/୧୦: ଚଳିତ ମହିଳା ଦିନିକିଆ ବିଶ୍ୱକପ୍ର ୨୫ତମ ଲିଗ ମ୍ୟାଚରେ ଶୁକ୍ରବାର ପାକିସ୍ତାନ ଓ ଶ୍ରୀଲଙ୍କା ପରସ୍ପରକୁ ଭେଟିବେ । ଟୁର୍ଣ୍ଣାମେଣ୍ଟର ସେମି ଫାଇନାଲ୍ ଲାଇନଅପ୍ ଚୂଡ଼ାନ୍ତ ହୋଇ ସାରିଥିବାରୁ ଏହି ମ୍ୟାଚ କୌଣସି ଗୁରୁତ୍ୱ ରଖୁନାହିଁ । ତଥାପି ଉଭୟ ଦଳ ବିଜୟ ସହ ସମ୍ମାନ ବଞ୍ଚାଇବା ପାଇଁ ପ୍ରୟାସ କରିବେ । ପୂର୍ବ ମ୍ୟାଚ୍ଗୁଡ଼ିକ ଭଳି ବର୍ଷା ପୁନର୍ବାର ଖଳନାୟକ ସାଜିବାର ଆଶଙ୍କା ରହିଛି ।
ପାକିସ୍ତାନ ଏପର୍ଯ୍ୟନ୍ତ କୌଣସି ମ୍ୟାଚ ଜିତି ନାହିଁ । ୨ଟି ମ୍ୟାଚ୍ ବର୍ଷା ଯୋଗୁଁ ବାତିଲ ହେବାରୁ ଦଳ ୨ ପଏଣ୍ଟ ଅର୍ଜନ କରିଛି । ଶ୍ରୀଲଙ୍କା ମଧ୍ୟ ବାତିଲ ମ୍ୟାଚରୁ ୨ପଏଣ୍ଟ ଅର୍ଜନ କରିଛି । ଅନ୍ୟ ଏକ ମ୍ୟାଚ୍ରେ ଦଳ ବାଂଲାଦେଶକୁ ପରାସ୍ତ କରି ମୋଟ୍ ୪ ପଏଣ୍ଟ ଅର୍ଜନ କରିଛି । ଉଭୟ ଦଳ ନିଜ ନିଜର ଶେଷ ମ୍ୟାଚ୍ ଖେଳି ବିଦାୟ ନେବେ ।
ମ୍ୟାଚ୍ର ଫଳାଫଳ ଗୁରୁତ୍ୱ ରଖୁ ନଥିଲେ ହେଁ ଆସନ୍ତାକାଲି କିଛି ବ୍ୟକ୍ତିଗତ ପ୍ରଦର୍ଶନ ଉପରେ ନଜର ରହିବ । ଶ୍ରୀଲଙ୍କା ସ୍ପିନର ଇନୋକା ରଣାବୀରା ଓ ଅଧିନାୟିକା ଚାମରି ଆଟ୍ଟାପଟୁଙ୍କ ଖେଳ ଦେଖିବାକୁ ଦର୍ଶକ ଭିଡ଼ ଜମାଇବେ । ଆଟ୍ଟାପଟୁ ବାଂଲାଦେଶ ବିପକ୍ଷରେ ହ୍ୟାଟ୍ରିକ୍ ସମେତ କ୍ରମାନ୍ୱୟରେ ୪ଟି ୱିକେଟ୍ ନେଇ ଦଳକୁ ବିଜୟୀ କରାଇଥିଲେ । ପାକିସ୍ତାନ ପକ୍ଷରୁ ବ୍ୟାଟର ସିଦ୍ରା ଅମିନ, ଅଧିନାୟିକା ଫାତିମା ସାନା ଓ ସ୍ପିନର ନସ୍ରା ସାନ୍ଧୁ ମଧ୍ୟ ଚମତ୍କାର ଫର୍ମରେ ରହିଛନ୍ତି ।
ପ୍ରେମଦାସା ଷ୍ଟାଡ଼ିୟମ ପିଚ ସ୍ପିନରଙ୍କୁ ସହାୟତା କରୁଛି । ହେଲେ ଆସନ୍ତାକାଲି ବର୍ଷା ଯୋଗୁଁ ସମ୍ପୂର୍ଣ୍ଣ ୫୦ ଓଭର ଖେଳ ହେବା କଷ୍ଟକର । ଟସ ବିଜୟୀ ଦଳ ବ୍ୟାଟିଂ ନିଷ୍ପତ୍ତି ନେଇ ପାରନ୍ତି ।
ସମ୍ଭାବ୍ୟ ଦଳ
ପାକିସ୍ତାନ: ସଦାଫ ସମାସ, ମୁନିବା ଅଲି, ସିଦ୍ରା ଅମିନ, ସିଦ୍ରା ନୱାଜ, ନାତାଲିଆ ପରଭେଜ, ଏମାନ ଫାତିମା, ଫାତିମା ସାନା (ଅଧିନାୟିକା), ରମିଣ ଶମିମି, ଡାଏନା ବେଗ, ନସ୍ରା ସାନ୍ଧୁ, ସାଦିଆ ଇକବାଲ ।
ଶ୍ରୀଲଙ୍କା: ହାସିନି ପେରେରା, ଚାମରି ଆଟ୍ଟାପଟୁ (ଅଧିନାୟିକା), ହର୍ଷିତା ସମରବିକ୍ରମା, ଭିଷ୍ମୀ ଗୁଣରତ୍ନେ, କବିଶା ଦିଲହାରୀ, ନୀଳକ୍ଷିକା ସିଲଭା, ଅନୁଷ୍କା ସଞ୍ଜିବନୀ, ଦେଓମି ବିହଙ୍ଗା, ସୁଗନ୍ଧିକା କୁମାରୀ, ଉଦେଶିକା ପ୍ରବୋଧିନୀ, ଇନୋକା ରଣାବୀରା ।
