ଫୁଲନଖରା,୨୫/୦୯: କଟକ ସଦର ଥାନା ଅନ୍ତର୍ଗତ ଭାଣପୁର ଗ୍ରାମରେ ଗତକାଲି ରାତିରେ ସଦର ପୁଲିସ ଚଢ଼ଉ କରି ୧୦ ଲକ୍ଷରୁ ଅଧିକ ଟଙ୍କାର ବାଣ ଓ ବିସ୍ଫୋରକ ସାମଗ୍ରୀ ଜବତ କରିଥିଲେ । ଏହି ଘଟଣାରେ ପୁଲିସ ଜଣକୁ ଅଟକ ରଖି ପଚରାଉଚରା କରୁଥିଲା । ବେଆଇନ ବାଣ କାରଖାନା ଚଳାଉଥିବା ଅଭିଯୋଗରେ ଭାଣପୁର ଗ୍ରାମର ସାଧୁ ଚରଣ ପରିଡ଼ା (୪୨)ଙ୍କୁ ପୁଲିସ ଗିରଫ କରି କୋର୍ଟଚାଲାଣ କରିଛି । ସାଧୁ ଦୀର୍ଘଦିନ ହେବ କୁଆଖାଇ ନଦୀ ବନ୍ଧ କୂଳକୁ ଲାଗିଥିବା ତା' ନିଜଘରେ ଏହି ବେଆଇନ ଭାବେ ବାଣ ତିଆରି କରି ବାହାରେ ବ୍ୟବସାୟ କରୁଥିଲା ।
ସୂଚନା ଅନୁଯାୟୀ, ଗତକାଲି ପୁଲିସ ସେଠାରେ ଚଢ଼ଉ କରି ବିପୁଳ ପରିମାରଣ ବାଣ ଓ ବିସ୍ଫୋରକ ଦ୍ରବ୍ୟ ଜବତ କରିଥିଲା । ସବୁଠାରୁ ବଡ ଗୁରୁତ୍ୱପୂର୍ଣ୍ଣ କଥା ହେଉଛି ଜୋନ-୪ ଏସିପିଙ୍କ ଅଫିସ ଓ କଟକ ସଦର ଥାନାଠାରୁ ମାତ୍ର ଅଧ କିଲୋମିଟର ଦୂରତାରେ ତା'ର ଘର ହୋଇଥିବାବେଳେ ପୂର୍ବରୁ ପୁଲିସ କିଭଳି ଜାଣିପାରୁ ନ ଥିଲା ତାହା ସାଧାରଣରେ ଆଲୋଚନାର ବିଷୟ ପାଲଟିଛି । ସାଧୁ ଏହି କାରବାର ଗ୍ରାମ ମଧ୍ୟରେ କରୁଥିବାବେଳେ ଗ୍ରାମବାସୀ ପୂର୍ବରୁ ଏହାକୁ ବିରୋଧ କରିଥିଲେ । ହେଲେ ସେ ବାଣ ତିଆରି ପାଇଁ ତାର ଲାଇସେନ୍ସ ଥିବା ଗ୍ରାମବାସୀଙ୍କୁ କହି ଭଣ୍ଡାଇ ଦେଉଥିଲା । ପୁଲିସ ତା'ଘରୁ ବାଣ ତିଆରିରେ ବ୍ୟବହୃତ ହେଉଥିବା ବିଭିନ୍ନ ସରଞ୍ଜାମ ସହିତ ଗୋଟେ ବଡ଼ ମେସିନ, ଗ୍ରାଇଣ୍ଡର୍, ବସ୍ତାବସ୍ତା ପାଉଡର, ସଲଫର, ଗନ ପାଉଡର, ବାରୁଦ,ଏସକ୍ଲୁସିଭ ପାଉଡର ସମେତ ରଙ୍ଗୀନ ବାଣରେ ବ୍ୟବହୃତ ସରଞ୍ଜାମକୁ ଜବତ କରିଛି । ଏହି ବ୍ୟବସାୟରେ ଆହୁରି ଅନେକ ଲୋକଙ୍କର ସମ୍ପୃକ୍ତି ଥିବା ପୁଲିସ ଅନୁମାନ କରୁଛି । ଘଟଣାର ତଦନ୍ତ ଜାରି ରହିଥିବା ଥାନା ଅଧିକାରୀ ତୁଷାରକାନ୍ତ ସେଠି ସୂଚନା ଦେଇଛନ୍ତି ।
