ଦାରିଙ୍ଗବାଡି,୨୪/୪(ଆପ୍ର): ଦାରିଙ୍ଗବାଡି ତହସିଲ ଅଫିସ କାର୍ଯ୍ୟାଳୟରେ ଦଲାଲ ମାତିଥିବା ନେଇ ମଙ୍ଗଳବାର ପ୍ରମେୟ ଖବର କାଗଜରେ ଖବର ପ୍ରକାଶ ପାଇଥିଲା। ଏବେ ପୁଣି ଦଲାଲ ଙ୍କ ନାମରେ ଆସିଛି ସାଙ୍ଘାତିକ ଅଭିଯୋଗ । ଦଲାଲ ଙ୍କ ଜରିଆରେ ବେଆଇନ ଭାବେ ଜମି ରେଜିଷ୍ଟ୍ରେସନ୍ ହୋଇଥିବା ନେଇ ଜମି ମାଲିକ ତହସିଲ ଅଫିସ ଆଗରେ ଧାରଣାରେ ବସିବା ସହ ଏନେଇ ତହସିଲ ଅଫିସରେ ଅଭିଯୋଗ ପତ୍ର ପ୍ରଦାନ କରିଛନ୍ତି ।
ଦାରିଙ୍ଗବାଡି ତହସିଲ ଅଧିନ କେରୁବାଡ଼ି ମୌଜାର ଆଦିକନ୍ଦ ନାୟକ ନିଜର ଅଭାବ ଯୋଗୁଁ ଖାତା ନମ୍ୱର ୫ ର ପ୍ଲଟ ନମ୍ବର ୨୨୮ ର ପଦର ଜମିକୁ ଜଣଙ୍କୁ ବିକ୍ରି କରିଥିଲେ । ସେ ତହସିଲ ଅଫିସର ଜଣେ ଦଲାଲଙ୍କୁ ହାତ କରି ୨୨୮ ନମ୍ୱର ପ୍ଲଟ ସହ ୨୨୬ ନମ୍ୱର ପ୍ଲଟକୁ ମଧ୍ୟ ବେଆଇନ ଭାବେ ରେଜିଷ୍ଟ୍ରେସନ କରି ନେଇଥିବା ଆଦିକନ୍ଦ ନାୟକ ଅଭିଯୋଗ କରିଛନ୍ତି । ଜମି ରେଜିଷ୍ଟ୍ରସନ୍ ପୂର୍ବରୁ ଆଦିକନ୍ଦ ନାୟକଙ୍କୁ ତହସିଲ ପକ୍ଷରୁ ନୋଟିସ ହୋଇଥିଲା। ଆଦିକନ୍ଦ ନାୟକ ତହସିଲ ଅଫିସ ସହ ଉପ ଜିଲ୍ଲାପାଳ ଙ୍କୁ ରେଜିଷ୍ଟ୍ରିସନ ବନ୍ଦ କରିବା ନେଇ ଜଣାଇଥିଲେ । ହେଲେ ଜମି ରେଜିଷ୍ଟ୍ରି ବନ୍ଦ ହେବା ବଦଳରେ ଜମି ରେଜିଷ୍ଟ୍ରି ହୋଇଥିଲା । ଜମି ଦଲାଲ ମାଧ୍ୟମରେ ଲକ୍ଷାଧିକ ଟଙ୍କା କାରବାର ହୋଇଥିବା ବେଳେ ତହସିଲ ଓ ରେଜିଷ୍ଟ୍ରି ଅଫିସ କର୍ମଚାରୀ ମାନେ ଏଥିରେ ସମୃକ୍ତ ରହିଛନ୍ତି ବୋଲି ସେ ଅଭିଯୋଗ କରିଛନ୍ତି ।
କର୍ମଚାରୀ ମାନେ ସିଧା ସଳଖ ଲାଞ୍ଚ ନନେଇ ଦଲାଲଙ୍କ ମାଧ୍ୟମରେ ଲାଞ୍ଚ କାରବାର କରୁଛନ୍ତି । ଯିଏ ଟଙ୍କା ଦେଲା ତାହା କାମ ଶୀଘ୍ର ହେଉଥିବା ବେଳେ ବେଆଇନ କାର୍ଯ୍ୟ ମଧ୍ୟ ହେଉଥିବା ଦେଖିବାକୁ ମିଳିଛି । ଆଉ ଯିଏ ଟଙ୍କା ନଦେଲା ତାହାରି କାମ ହେଉନଥିବା ସହ ମାସ ମାସ ଧରି ପଡ଼ିକି ରହୁଛି । ଦଲାଲ ମାଧ୍ୟମରେ ଜାତି ଗତ ପ୍ରମାଣ ପତ୍ର ରେ ମଧ୍ୟ ଅନେକ ଚଂଚଳତା ହୋଇଛି । ଲାଞ୍ଚ ଦେଇ ପଛୁଆ ବର୍ଗ ଙ୍କୁ ଅନୁସୂଚିତ ଜାତି ପ୍ରମାଣ ମଧ୍ୟ ପ୍ରଦାନ କରାଯାଉଛି । ଜିଲ୍ଲା ପ୍ରଶାସନ ଏଥି ପ୍ରତି ଦୃଷ୍ଟି ଦେବାକୁ ଅଞ୍ଚଳବାସୀ ଦାବି କରିଛନ୍ତି ।
