ଭୁବନେଶ୍ୱର,୨୪/୧୦: ବାତ୍ୟାର କେନ୍ଦ୍ରସ୍ଥଳରୁ ୨୦୦ କିଲୋମିଟର ଗୋଲେଇ ଭିତରେ ତାଣ୍ଡବ ଖେଳାଇବ ବାତ୍ୟା ‘ଦାନା’ । ଗୁରୁବାର ରାତି ସାଢ଼େ ୧୧ଟାରୁ ଶୁକ୍ରବାର ମଧ୍ୟାହ୍ନ ଯାଏ ୧୧୦ରୁ ୧୨୦ କିଲୋମିଟର ବେଗରେ ମାଡ଼ ହେବ ପବନ ।
ଧାମରା ବନ୍ଦରଠାରୁ ଉତ୍ତରରେ ଶୁକ୍ରବାର ସକାଳୁ ସ୍ଥଳଭାଗରେ ପ୍ରବେଶ କରିବ । ଏହାପରେ ସାମାନ୍ୟ ଦିଗ ବଦଳାଇବ । ମନ୍ଥର ଗତିରେ ଆଗେଇବ ଭଦ୍ରକ ଜିଲ୍ଲାର ବାସୁଦେବପୁର ଦେଇ ବାଲେଶ୍ୱର ଜିଲ୍ଲାର ସିମୁଳିଆ ବ୍ଲକ୍ରେ ପହଞ୍ଚିବ ୨୫ ତାରିଖ ମଧ୍ୟାହ୍ନ ବେଳକୁ । ସେ ଯାଏ ଭୀଷଣ ରୂପରେ ଥିବ ବାତ୍ୟା । ଏହାପରେ ତ୍ୱରିତ୍ ବେଗରେ ଦୁର୍ବଳ ହୋଇଯିବ ।
ପାଣିପାଗ ବିଭାଗ (ଆଇଏମ୍ଡି)ର ବାତ୍ୟା ଗତିପଥ ଏପରି ପୂର୍ବାନୁମାନ ଦେଇଛି । ଏକଥା ବି ସୂଚାଇଛି ଯେ ‘ଦାନା’ର କେନ୍ଦ୍ରୀୟ ମଣ୍ଡଳ ଦକ୍ଷିଣ ପଶ୍ଚିମ ଭୁବନେଶ୍ୱର କଟକ ଠାରୁ ଉତ୍ତର ପଶ୍ଚିମରେ ଆନନ୍ଦପୁର, ଘଟଗାଁ ଓ କେନ୍ଦୁଝର ଯାଏ ବ୍ୟାପିବ ଯେଉଁଠି ପବନର ଗତି ୧୨୦ କିମି ଯାଏ ରହିପାରେ । ଅଣଚାଷ ପବନ ସାଙ୍ଗକୁ ଭୀଷଣ ବର୍ଷା ନେଇ ଆସିବ ‘ଦାନା’ । ୭ ଜିଲ୍ଲାରେ ଭୟାନକ ବର୍ଷା ହେବ । ୨୦୦ରୁ ୩୦୦ ମିମି ଯାଏ ବର୍ଷା ହୋଇପାରେ । ପବନ ଓ ବର୍ଷାରେ ବ୍ୟାପକ କ୍ଷୟକ୍ଷତି ଆଶଙ୍କା ଅଛି ।
ବାତ୍ୟାର ସମ୍ଭାବ୍ୟ ଟ୍ରାକ୍ କହୁଛି, ଗୁରୁବାର ରାତି ସାଢ଼େ ୧୧ଟା ବେଳକୁ ‘ଦାନା’ ଭୀଷଣ ବାତ୍ୟା(ସିଭିୟର ସାଇକ୍ଲୋନିକ ଷ୍ଟର୍ମ) ରୂପ ନେଇ ସାରିଥିବ । ସେତେବେଳେ ଏହା ଗହୀରମଥା ପାଖରେ ଥିବା ଚେନ୍ନାଇ-କଲିକତା ଫେରି ରୁଟ୍(ଜାହାଜ ଚଳାଚଳ ରୁଟ୍) ଉପରେ ଥିବ । ଯାହା ଓଡ଼ିଶା ଉପକୂଳ ଠାରୁ ପାଖାପାଖି ୨୫ରୁ ୩୦ କିଲୋମିଟର ଦୂର । ଫେରି ରୁଟ୍ରୁ ସାମାନ୍ୟ ପଶ୍ଚିମ ଦିଗକୁ ବୁଲି ଧାମରାରେ ପଶିବ । ଧାମରାରେ ସ୍ଥଳଭାଗ ଛୁଇଁବା ବେଳକୁ ୨୫ ତାରିଖ ସକାଳ ହୋଇଯିବା ସମ୍ଭାବନା ଅଧିକ । ଧାମରାରେ ସ୍ଥଳଭାଗ ଛୁଇଁବା ପରେ ଏହା ଭଦ୍ରକ ଜିଲ୍ଲା ବାସୁଦେବପୁର ପାଖରେ ଘଷି ହୋଇ ମାର୍କୋଣାକୁ ମୁହାଁଇବ । ସେତେବେଳେ ମଧ୍ୟ ଏହା ଭୀଷଣ ବାତ୍ୟା ହୋଇ ଆଗକୁ ବଢୁଥିବ ।
ପବନର ବେଗ ସାମାନ୍ୟ କମିବ ସତ କିନ୍ତୁ ତାଣ୍ଡବରୁ ତ୍ରାହି ମିଳିବନି । ୯୫ରୁ ୧୦୫ କିମି ବେଗରେ ପବନ ବହିବ । ବାତ୍ୟାର ଭୟାବହତା ଖାଲି ଭଦ୍ରକ କି କେନ୍ଦ୍ରାପଡ଼ା ନୁହେଁ, ବେଶ୍ ଦୂର ଯାଏ ପ୍ରଭାବ ପକାଇବ । ପୂର୍ବ କେନ୍ଦ୍ରୀୟ ବଙ୍ଗୋପସାଗରରେ ଆଜି ବାତ୍ୟା ଦାନା ସୃଷ୍ଟି ହୋଇଛି । ଏହା ଉତ୍ତର ପଶ୍ଚିମ ମୁହାଁ ହୋଇ ଆଗକୁ ବଢୁଥିଲା । ଘଣ୍ଟାକୁ ୧୩ କିମି ବେଗରେ ଆଗଉଥିଲା । କିନ୍ତୁ ପରେ ବାତ୍ୟାର ଗତି ସାମାନ୍ୟ ଧିମା ହୋଇଛି । ସନ୍ଧ୍ୟା ସୁଦ୍ଧା ଏହା ପାରାଦୀପର ଦକ୍ଷିଣ ପୂର୍ବ ଦିଗରେ ୨୮୦କିମି ଦୂରରେ ରହିଛି । ସେହିଭଳି ଧାମରାର ଦକ୍ଷିଣ ଓ ଦକ୍ଷିଣ ପୂର୍ବ ଦିଗରୁ ୩୧୦କିମି ଦୂରରେ ଅଛି । ଏହା ଉତ୍ତର ପଶ୍ଚିମ ମୁହାଁ ହୋଇ ଆଗକୁ ଯିବ । ୨୪ ତାରିଖ ସକାଳେ ସମୁଦ୍ରରେ ଅତି ଭୀଷଣ ବାତ୍ୟା ରୂପ ନେବ ।
୨୪ ତାରିଖ ରାତିରୁ ୨୫ ତାରିଖ ସକାଳ ଭିତରେ ସ୍ଥଳଭାଗ ଛୁଇଁବ ବୋଲି ଆଇଏମ୍ଡି ପୂର୍ବାନୁମାନ କରିଛି । ଆଇଏମଡି ଡିଜି ମୃତ୍ୟୁଞ୍ଜୟ ମହାପାତ୍ର କହିଛନ୍ତି, ବାତ୍ୟା ସ୍ଥଳଭାଗ ଛୁଇଁବା ସମୟରେ ପବନର ବେଗ ୧୨୦ କିମି ରହିବ । ଏହା ଭୀଷଣ ବାତ୍ୟା ରୂପ ନେଇ ସ୍ଥଳଭାଗ ଛୁଇଁବ । ଲ୍ୟାଣ୍ଡଫଲ ପାଇଁ ପ୍ରାୟ ସାଢ଼େ ୫ ଘଣ୍ଟା ସମୟ ଲାଗିବ । ବାତ୍ୟା ପ୍ରଭାବରେ ସାମୁଦ୍ରିକ ଜୁଆର ଆସିପାରେ । ସ୍ଥଳଭାଗକୁ ଲୁଣି ପାଣି ମାଡ଼ି ଆସିବ । ପବନ ସାଙ୍ଗକୁ ପ୍ରବଳ ବର୍ଷା ହେବ ବୋଲି ସେ ଚେତାଇ ଦେଇଛନ୍ତି । ବାତ୍ୟା ପ୍ରଭାବରେ ବୁଧବାର ଧାମରା ଓ ପାରାଦୀପ ସମେତ ରାଜ୍ୟର ଉପକୂଳବର୍ତ୍ତୀ ସ୍ଥାନରେ ବର୍ଷା ହୋଇଛି । ବୁଧବାର ସନ୍ଧ୍ୟା ସୁଦ୍ଧା ଚାନ୍ଦବାଲିରେ ୧୪.୮, ପାରାଦୀପରେ ୧୦.୩, ବାଲେଶ୍ୱରରେ ୮.୬, ଭଦ୍ରକରେ ୮.୧ମିମି ବର୍ଷା ହୋଇଛି । ଅଧିକାଂଶ ସ୍ଥାନରେ ପାଗ ବଦଳି ମେଘୁଆ ହୋଇଛି ।
ଗୁରୁବାର ବର୍ଷା ଢାଳିବା ଆରମ୍ଭ ହୋଇଯିବ । ୨୪ ତାରିଖରେ ଜଗତ୍ସିଂହପୁର, କେନ୍ଦ୍ରାପଡ଼ା, କଟକ, ଭଦ୍ରକ, ଯାଜପୁର, ବାଲେଶ୍ୱର ଓ ମୟୂରଭଞ୍ଜରେ ଅତି ଭୀଷଣ ବର୍ଷା ହୋଇପାରେ । ୨୦୦ମିମିରୁ ଅଧିକ ବର୍ଷା ଆଶଙ୍କା ଅଛି । ଏଥିପାଇଁ ରେଡ୍ ୱାର୍ଣ୍ଣିଂ ଦିଆଯାଇଛି । ପୁରୀ, ଖୋର୍ଦ୍ଧା, କେନ୍ଦୁଝର, ନୟାଗଡ଼ ଓ ଢେଙ୍କାନାଳରେ ବି ପ୍ରବଳରୁ ଅତି ପ୍ରବଳ ବର୍ଷିବ । ଗଞ୍ଜାମ, ବୌଦ୍ଧ, ଅନୁଗୁଳ, ଦେବଗଡ଼, ସୁନ୍ଦରଗଡ଼ ଓ କନ୍ଧମାଳରେ ପ୍ରବଳ ବର୍ଷା ହୋଇପାରେ ।
୨୫ରେ ମୟୂରଭଞ୍ଜ, କେନ୍ଦୁଝର, ବାଲେଶ୍ୱର ଓ ଭଦ୍ରକରେ ଅତି ଭୀଷଣ ବର୍ଷା ଆଶଙ୍କା ଅଛି । ୨୦୦ମିମିରୁ ଅଧିକ ବର୍ଷା ଆଶଙ୍କା ଥିବାରୁ ରେଡ୍ ୱାର୍ଣ୍ଣିଂ ଦିଆଯାଇଛି । ଢେଙ୍କାନାଳ, ଯାଜପୁର, କଟକ, କେନ୍ଦ୍ରାପଡ଼ା, ଜଗତ୍ସିଂହପୁର, ଅନୁଗୁଳ ଓ କଟକରେ ପ୍ରବଳରୁ ଅତିପ୍ରବଳ ବର୍ଷା ହେବ । ୭୦ରୁ ୨୦୦ମିମି ବର୍ଷା ହୋଇପାରେ । ସୁନ୍ଦରଗଡ଼, ସମ୍ବଲପୁର, ଦେବଗଡ଼, ଖୋର୍ଦ୍ଧା, ଝାରସୁଗୁଡ଼ା ଓ ପୁରୀରେ ପ୍ରବଳ ବର୍ଷିବ । ୭୦ରୁ ୧୧୦ମିମି ବର୍ଷା ହୋଇପାରେ । ୨୬ ତାରିଖରେ ସୁନ୍ଦରଗଡ଼, କେନ୍ଦୁଝର, ମୟୂରଭଞ୍ଜ ଓ ବାଲେଶ୍ୱରରେ ପ୍ରବଳ ବର୍ଷା ହୋଇପାରେ ବୋଲି ପାଣିପାଗ ବିଭାଗ ପୂର୍ବାନୁମାନ ଦେଇଛି । ବାତ୍ୟା ପାଇଁ ପୁରୀ, ଧାମରା, ଚାନ୍ଦବାଲି ଓ ପାରାଦୀପ ବନ୍ଦରକୁ ୧୦ନଂ ବିପଦ ସଙ୍କେତ ଦିଆଯାଇଛି । ଗୋପାଳପୁର ବନ୍ଦରକୁ ୮ନଂ ବିପଦ ସଙ୍କେତ ଦିଆଯାଇଛି ।
ବାତ୍ୟା ସ୍ଥଳଭାଗରେ ପହଞ୍ଚିବା ସମୟରେ କେନ୍ଦ୍ରାପଡ଼ା, ଭଦ୍ରକ ଓ ବାଲେଶ୍ୱର ଜିଲ୍ଲାର ତଳିଆ ଅଞ୍ଚଳରେ ସାମୁଦ୍ରିକ ଜୁଆର ଆସିପାରେ । ପ୍ରାୟ ୧ମିଟରରୁ ୨ମିଟର ଉଚ୍ଚତାର ଜୁଆର ଉଠିପାରେ ବୋଲି ପାଣିପାଗ ବିଭାଗ ସତର୍କ କରାଇଛି । ଜଗତସିଂହପୁର ଜିଲ୍ଲାର ସାମୁଦ୍ରିକ ଅଞ୍ଚଳରେ ୧ମିଟର ଉଚ୍ଚାର ଜୁଆର ଆସିପାରେ । ବାଲେଶ୍ୱର, ଭଦ୍ରକ, କେନ୍ଦ୍ରାପଡ଼ା, ଜଗତସିଂହପୁର, ପୁରୀ, ଖୋର୍ଦ୍ଧା, ମୟୂରଭଞ୍ଜ, କେନ୍ଦୁଝର, ଯାଜପୁର, କଟକ ଓ ଢେଙ୍କାନାଳ ଜିଲ୍ଲାରେ ବାତ୍ୟାର ଅଧିକ ପ୍ରଭାବ ପଡ଼ିବ ବୋଲି ପାଣିପାଗ ବିଭାଗ ପକ୍ଷରୁ କୁହାଯାଇଛି ।
ସୋଆ ପରିବେଶ ଓ ଜଳବାୟୁ ଓ କେନ୍ଦ୍ର(ସିଇସି) ପୂର୍ବାନୁମାନ କରି କହିଛି, ଗୁରୁବାର ଅପରାହ୍ନ ବା ସନ୍ଧ୍ୟା ସୁଦ୍ଧା ବାତ୍ୟା କେନ୍ଦ୍ରାପଡ଼ା ଓ ଭଦ୍ରକ ଉପକୂଳରେ ରାଜନଗର ପାଖରେ ଅତିକ୍ରମ କରିବ । ବାଲେଶ୍ୱର ଓ ଭଦ୍ରକ ଜିଲ୍ଲାରେ ଅଧିକ ପ୍ରଭାବ ରହିବ । ଗୁରୁବାର ପୂର୍ବାହ୍ନ ବେଳକୁ ପବନର ବେଗ ଘଣ୍ଟା ପ୍ରତି ୧୦୦ରୁ ୧୨୦ କିମି ରହିପାରେ । ବାତ୍ୟା ସ୍ଥଳଭାଗ ଛୁଇଁବା ବେଳେ ରାଜଧାନୀ ଓ ଆଖପାଖ ଅଞ୍ଚଳରେ ୪୫ରୁ ୬୦କିମି ବେଗରେ ପବନ ବହିପାରେ ।
