କଟକ,୧୧/୦୪: ଭିଜିଲାନ୍ସ ମାମଲାରେ ଯଦି କୌଣସି ସରକାରୀ କର୍ମଚାରୀଙ୍କ ବିରୋଧରେ ବିଭାଗୀୟ କାର୍ଯ୍ୟାନୁଷ୍ଠାନ ରଦ୍ଦ ହୋଇଯାଏ, ସେହି ଆଧାରରେ ତାଙ୍କ ବିରୋଧରେ ଥିବା ଫୌଜଦାରୀ ମାମଲା ରଦ୍ଦ ହୋଇପାରିବ ନାହିଁ ବୋଲି ହାଇକୋର୍ଟ ଗୁରୁତ୍ୱପୂର୍ଣ୍ଣ ରାୟରେ କହିଛନ୍ତି । ପୂର୍ବରୁ ଏକ ମାମଲାରେ ହାଇକୋର୍ଟ କୌଣସି ସରକାରୀ କର୍ମଚାରୀଙ୍କ ବିରୋଧରେ ବିଭାଗୀୟ କାର୍ଯ୍ୟାନୁଷ୍ଠାନ ରଦ୍ଦ ହେଲେ ସେହି ଆଧାରରେ ସମ୍ପୃକ୍ତ କର୍ମଚାରୀଙ୍କ ବିରୋଧରେ ଥିବା କ୍ରିମିନାଲ ପ୍ରୋସିଡିଂ ରଦ୍ଦ ହୋଇଯିବ ବୋଲି ରାୟ ଶୁଣାଣିଥିଲେ । ଏହି ଆଦେଶ ଆଧାରରେ ଭିଜିଲାନ୍ସ ମାମଲାରେ ଛନ୍ଦି ହୋଇଥିବା ନିର୍ମଳ ଚନ୍ଦ୍ର ପ୍ରଧାନ ଏବଂ ଅନ୍ୟମାନେ ସେମାନଙ୍କ ବିରୋଧରେ କ୍ରିମିନାଲ୍ ପ୍ରୋସିଡିଂକୁ ରଦ୍ଦ ପାଇଁ ପ୍ରାର୍ଥନା କରି ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲେ ।
ସେମାନେ ଦର୍ଶାଇଥିଲେ, ଭିଜିଲାନ୍ସ ପକ୍ଷରୁ ମାମଲା ରୁଜୁ ପରେ ବିଭାଗୀୟ କାର୍ଯ୍ୟାନୁଷ୍ଠାନରୁ ସେମାନେ ଛାଡ଼ ପାଇ ସାରିଛନ୍ତି । ବିଭାଗୀୟ କାର୍ଯ୍ୟାନୁଷ୍ଠାନ ରଦ୍ଦ ହୋଇଥିବାରୁ ସେହି ଆଧାରରେ କ୍ରିମିନାଲ ପ୍ରୋସିଡିଂ ମଧ୍ୟ ରଦ୍ଦ ପାଇଁ ଅଦାଲତ ନିର୍ଦ୍ଦେଶ ଦେବାକୁ ଆବେଦନକାରୀମାନେ ପ୍ରାର୍ଥନା କରିଥିଲେ । ବିଚାରପତି ଜଷ୍ଟିସ୍ ଶିବଶଙ୍କର ମିଶ୍ର ସମସ୍ତ ମାମଲାରେ ଏକତ୍ର ଶୁଣାଣି କରି ଗତ ମାର୍ଚ୍ଚ ୧୦ରେ ରାୟ ସଂରକ୍ଷିତ ରଖିଥିଲେ । ଗୁରୁବାର ରାୟ ପ୍ରକାଶ କରି ଆବେଦନକାରୀଙ୍କ ପିଟିସନ୍କୁ ଖାରଜ କରିଛନ୍ତି । ଭିଜିଲାନ୍ସ ପକ୍ଷରୁ ମାମଲାକୁ ଏଏସ୍ସି ନିରଞ୍ଜନ ମହାରଣା ପରିଚାଳନା କରୁଥିଲେ ।
