ବାସୁଦେବପୁର,୨୫/୧୦: ମଧ୍ୟ ରାତ୍ରିରେ ଲ୍ୟାଣ୍ଡଫଲ୍ କଲା ବାତ୍ୟା ‘ଦାନା’। ରାତି ୧୨ଟା ୫ରେ ଲ୍ୟାଣ୍ଡଫଲ୍ କରିଲା ‘ଦାନା’ । ଭିତରକନିକା ହବାଳିଖଟିରେ ଛୁଇଁଲା ସ୍ଥଳଭାଗ । ଏହାର ପ୍ରଭାବ ଭଦ୍ରକ ଜିଲ୍ଲାର ବାସୁଦେବପୁରରେ ବିଶେଷ ଭାବରେ ଦେଖିବାକୁ ମିଳିଛି । ଏହି ଅଞ୍ଚଳରେ ବାତ୍ୟାର ବିଭୀଷିକା ମଧ୍ୟ ରାତ୍ରିରୁ ଆରମ୍ଭ ହୋଇଛି । ପବନ ଓ ବର୍ଷାରେ ବେଗ ଏତେ ଅଛି ଯେ, ଲୋକେ ବାହାରକୁ ବାହାରିବା ସମ୍ଭବ ହେଉନାହିଁ । ପବନର ବେଗ ଅଧିକ ରହିଥିବା ସହ ବର୍ଷା ମଧ୍ୟ ଲାଗି ରହିଛି ।
ଅନେକ ସ୍ଥାନରେ ତୀବ୍ର ଗତିରେ ପବନ ବହିବା କାରଣରୁ ଘର ଛପର ଉଡ଼ି ଯାଇଥିବା ବେଳେ ଅନେକ ବଡ଼ ବଡ଼ ଗଛ ଭାଙ୍ଗିଯାଇଥିବା ସୂଚନା ମିଳିଛି । ପବନର ବେଗ ଅତି ପ୍ରଖର ଥିବାରୁ ବାହାରକୁ ଯିବା ଲୋକଙ୍କ ପକ୍ଷେ ସମ୍ଭବ ହେଉନାହିଁ । ଲ୍ୟାଣ୍ଡଫଲ୍ ହେବା ପରେ ବାତ୍ୟାର ଏଭଳି କରାଳ ରୂପ ଦେଖି ଲୋକେ ଭୟଭୀତ ଅବସ୍ଥାରେ ଅଛନ୍ତି ।
