ପୁରୀ, ୩୦/୧୦ : ନଭେମ୍ବରରେ ପୁଣି ବାତ୍ୟା ସହିତ ଭୂମିକମ୍ପ ଭୟ । ପାଞ୍ଜିରେ ହୋଇଥିବା ପୂର୍ବାନୁମାନ ଏହି ଭୟ ସଂଚାର କରିଛି । ବାତ୍ୟା ଦାନାର ପ୍ରଭାବ ପଡ଼ିବା ନେଇ ପାଞ୍ଜିର ପୂର୍ବାନୁମାନ ମେଳ ଖାଇବା ପରେ ଏନେଇ ନଭେମ୍ବରରେ ବାତ୍ୟା ଓ ଭୂକମ୍ପ ପୂର୍ବାନୁମାନ ପୁଣି ଚର୍ଚ୍ଚାର ବିଷୟ ହୋଇଛି । ଅସଲି ଖଡ଼ିରତ୍ନ ପଞ୍ଜିକା ଓ ପଠାଣୀ ସାମନ୍ତ ପଞ୍ଜିକା ପୂର୍ବାନୁମାନ ଅନୁଯାୟୀ ରାଜ୍ୟର ଉପକୂଳ ଜିଲ୍ଲା ପୁରୀ, କଟକ, ଗୋପାଳପୁର, କୋଣାର୍କ, ଅସ୍ତରଙ୍ଗ, କାକଟପୁର, ନିଆଳି, ଯାଜପୁର, ନୟାଗଡ଼ରେ ମହାବାତ୍ୟା ଭଳି ଭୟଙ୍କର ପରିସ୍ଥିତି ସୃଷ୍ଟି ହେବ । ନଭେମ୍ବର ୫ରୁ ୯ ତାରିଖ ମଧ୍ୟରେ ଏବଂ ନଭେମ୍ବର ୧୧ରୁ ୧୫ ତାରିଖ ମଧ୍ୟରେ ସାମୁଦ୍ରିକ ଝଡ଼, ଲଘୁଚାପ, ବନ୍ୟା ବିତ୍ପାତ, ବାତ୍ୟା ସହ ସ୍ଖଳନ ଓ ଭୂମିକମ୍ପ ଯୋଗୁ ବହୁ ଧନଜୀବନ ପ୍ରଭାବିତ ହେବ ବୋଲି ଏଥିରେ ପୂର୍ବାନୁମାନ ହୋଇଛି ।
ସେହିପରି ନଭେମ୍ବର ମାସରେ ରାଜନୀତି କ୍ଷେତ୍ରକୁ ନେଇ ବଡ଼ ଭବିଷ୍ୟବାଣୀ ରହିଛି । ଏହି ମାସରେ ରାଜନୀତି କ୍ଷେତ୍ରରେ ଅଶାନ୍ତି ଦେଖାଦେବ । ଶାସକ ବିରୋଧୀ ବାଦବିବାଦ ଉଗ୍ରରୂପ ନେବ । ନେତୃତ୍ୱରେ ପରିବର୍ତ୍ତନ ଘଟିପାରେ । ଦକ୍ଷିଣ ପଶ୍ଚିମ ତଥା ପୂର୍ବ ଭାଗରେ ରାଜ୍ୟ ଶାସନ ପରିବର୍ତ୍ତନ ହେବାର ସମ୍ଭାବନା ରହିଛି । ମୁସଲମାନ ରାଷ୍ଟ୍ରରେ ଅଭ୍ୟନ୍ତରୀଣ ଦ୍ୱନ୍ଦ୍ୱ ଉଗ୍ରରୂପ ନେବ । ରାଷ୍ଟ୍ରମାନଙ୍କ ମଧ୍ୟ ତିକ୍ତତା ବୃଦ୍ଧି ତଥା ଯୁଦ୍ଧ ପରିସ୍ଥିତି ଉପୁଜିବ । ତୈଳ ତଥା ଇନ୍ଧନ ଦରବୃଦ୍ଧି ଦ୍ୱାରା ଜନସାଧାରଣରେ ଅସନ୍ତୋଷ ଦେଖାଦେବ ବୋଲି ପାଞ୍ଜିରୁ ଜଣାପଡ଼ୁଛି । ଗୋଟିଏ ପଟେ ବର୍ତ୍ତମାନ ଦେଶର ଦୁଇ ବଡ଼ମେଣ୍ଟ ଭିତରେ କନ୍ଦଳ ବଢ଼ୁଥିବା ବେଳେ ଅନ୍ୟପଟେ ମୁସଲମାନ ରାଷ୍ଟ୍ର ଇରାନ-ଇସ୍ରାଇଲ, ରୁଷ-ୟୁକ୍ରେନ୍ ଯୁଦ୍ଧ ବଢ଼ିବା ମଧ୍ୟପ୍ରାଚ୍ୟରେ ଚତୁର୍ଥ ବିଶ୍ୱଯୁଦ୍ଧ ଆଶଙ୍କାକୁ ବଢ଼ାଇଛି । ଯାହା ପାଞ୍ଜିର ପୂର୍ବାନୁମାନକୁ ଅଧିକ ମଜଭୂତ କରିଛି । ତେଣୁ ପାଞ୍ଜିର ଭବିଷ୍ୟବାଣୀକୁ ନେଇ ଚର୍ଚ୍ଚାର ବିଷୟ ହୋଇଛି ।
