ବଲାଙ୍ଗିର: ଗତ ୭ତାରିଖ ସହର ବିଚରାସ୍ତାରେ ଖଣ୍ଡାବୁଲାଇ ଯୁବକଙ୍କୁ ଆକ୍ରମଣ ଘଟଣାରେ ପୁଲିସ ୭ ଜଣ ଧରାପଡିଛନ୍ତି। ୭ ଜଣଙ୍କ ମଧ୍ୟରେ ୪ ଜଣ ନାବାଳକ ମଧ୍ୟ ରହିଛନ୍ତି। ଗିରଫ ଯୁବକ ୩ ଜଣ ମଧ୍ୟରେ ହାଟପଦା ପଡାର ବିଶାଲ ପସାୟତ, ଗନ୍ଧରେଲର ସୋନୁ ଓରଫ ତୁଷାର ବାରିକ ଓ ରାଜା ଓରଫ ସହିଦ ପାତ୍ର ବୋଲି ଜଣାପଡିଛି।
ସୂଚନା ମୁତାବକ, ଗତ ୩ ମାସ ଆଗରୁ ବିଶାଲ ପସାୟତ ଜଣେ ଝିଅକୁ କମେଣ୍ଟ ମାରିଥିଲା। ଆକ୍ରମଣର ଶିକାର ହୋଇଥିବା ଦିଲୀପ ପଟ୍ଟନାୟକ ଓରଫ ସୋନୁ ସେହି ଝିଅର ସମ୍ପର୍କୀୟ ଭାଇ ହେବେ। ତେବେ ଭଉଣୀକୁ କାହିଁକି କମେଣ୍ଟ କଲୁ ବୋଲି କହି ହାଟପଦା ପଡ଼ାରେ ହିଁ ବିଚ ରାସ୍ତାରେ ଲୋକଙ୍କ ଆଗରେ ଚାପୁଡ଼ା ମାରିବା ସହ ବିଶାଲଙ୍କ ସହ ମାରପିଟ କରିଥିଲେ। ଏନେଇ ବିଶାଲ ଲୋକଙ୍କ ଆଗରେ ଆତ୍ମସମ୍ମାନ ହରାଇଥିବା ନେଇ ମନରେ ଆକ୍ରୋଶ ରଖିଥିଲା।
ଏହାପରେ ଗତ ୭ ତାରିଖରେ ଦିଲୀପ ପଟ୍ଟନାୟକଙ୍କୁ ରାସ୍ତାରୁ ହଠାଇବା ପାଇଁ ବିଶାଲ ତା ସାଙ୍ଗ ସୋନୁକୁ କହିଥିଲା। ସୋନୁ, ରାଜା ସହ ଅନ୍ୟ ୪ ଜଣ ନାବାଳକ ଏକତ୍ର ହୋଇ ଏହାର ଯୋଜନା ମଧ୍ୟ ପ୍ରସ୍ତୁତ କରିଥିଲେ। କେଉଁ ସମୟରେ ଦିଲୀପ ପଟ୍ଟନାୟକ କେଉଁ ସ୍ଥାନକୁ ଯାଉଛି କେଉଁଠି ରହୁଛି ସେସବୁକୁ ଅଭିଯୁକ୍ତ ମାନେ ନଜର ରଖିଥିଲେ। ସୋନୁ ମହାଦେବ ମନ୍ଦିର ଛକକୁ ଆସିବା ପରେ ପୂର୍ବରୁ ପ୍ରସ୍ତୁତ ଥିବା ବିଶାଲ ଓ ତାଙ୍କ ସାଙ୍ଗ ତାଙ୍କୁ ସଂଘବଦ୍ଧ ହୋଇ ଆକ୍ରମଣ କରିଥିଲେ। ଏହି ସମୟରେ ଦିଲୀପକୁ ଖଣ୍ଡାରେ ଆକ୍ରମଣ କରିବା ପାଇଁ ଚେଷ୍ଟା କରିଥିଲେ। ହେଲେ ଦିଲୀପ ପ୍ରାଣ ବଞ୍ଚାଇବା ପାଇଁ ସହରର ମୁଖ୍ୟ ମାର୍କେଟ ଜଗନ୍ନାଥ ପଡା ପର୍ଯ୍ୟନ୍ତ ଦଉଡିଥିଲେ। ଏହାପରେ ମଧ୍ୟ ଅଭିଯୁକ୍ତମାନେ ତାଙ୍କ ପିଛା ଛାଡି ନଥିଲେ। ପରେ ଦିଲୀପ ଜୀବନ ବିକଳରେ ଏକ ସୁନାଗହଣା ଦୋକାନ ଭିତରକୁ ଯାଇ ଭିତରପଟୁ କବାଟ ଦେଇଦେଇଥିଲେ। ଏହାକୁ ନେଇ ନିକଟରେ ଥିବା ଗାଡି ସହ ଦୋକାନ କବାଟକୁ ହାଣୀ ଫେରାର ମାରିଥିଲେ ଅଭିଯୁକ୍ତମାନେ।
ତେବେ ଘଟଣାର ୧୦ ଦିନ ପରେ ସମସ୍ତ ୭ ଜଣଙ୍କୁ ଧରିବାରେ ସଫଳ ହୋଇଛି ବଲାଙ୍ଗୀର ପୋଲିସ। ସମସ୍ତ ଅଭିଯୁକ୍ତଙ୍କ ଠାରୁ ୪ଟି ଖଣ୍ଡା ଯାହା ଆକ୍ରମଣରେ ବ୍ୟବହାର ହୋଇଥିଲା ତାହା ମଧ୍ୟ ଜବତ କରାଯାଇଛି। ଏହାସହ ଦୁଇଟି ବାଇକ ଓ ଅଭିଯୁକ୍ତଙ୍କ ମୋବାଇଲକୁ ମଧ୍ୟ ଜବତ କରିଛି ପୋଲିସ।
