ନୂଆଦିଲ୍ଲୀ,୨୭/୦୫: ଆୟକର ରିଟର୍ଣ୍ଣ ବା ଆଇଟିଆର୍ ଫାଇଲିଂ ପ୍ରକ୍ରିୟା ଜୁନ ପ୍ରଥମ ସପ୍ତାହରୁ ଆରମ୍ଭ ହୋଇପାରେ । ସାଧାରଣତଃ ଏହା ଏପ୍ରିଲ ପହିଲାରୁ ଆରମ୍ଭ ହୋଇଥାଏ । ମାତ୍ର ଚଳିତ ବର୍ଷ ଏଥିରେ ବିଳମ୍ବ ହେଉଛି । ଆଇଟିଆର୍ ଫର୍ମ ଲାଗି ଜରୁରୀ ହେଉଥିବା ଅନ୍ଲାଇନ ଟୁଲ୍ ଅଭାବ ଯୋଗୁ ଏଭଳି ବିଳମ୍ବ ହେଉଛି । କେନ୍ଦ୍ରିୟ ପ୍ରତ୍ୟକ୍ଷ ଟିକସ ବୋର୍ଡ (ସିବିଡିଟି) ଆଇଟିଆର୍ ୧ ଏବଂ ୭ ଯାଏ ସବୁ ଫର୍ମକୁ ଅଧିସୂଚୀତ କରି ଦେଇଛି । ମାତ୍ର ଏଥିଲାଗି ଜରୁରୀ ଅନ୍ଲାଇନ ଟୁଲ୍ ଜେଏସ୍ସନ, ଏକ୍ସେଲ ଏବଂ ଅନଲାଇନ ଇଫାଇଲ ୟୁଟିଲିଟି ଏବେ ସୁଦ୍ଧା ପୋର୍ଟାଲରେ ଉପଲବ୍ଧ ନାହିଁ ।
ଫର୍ମରେ ହୋଇଥିବା ପରିବର୍ତ୍ତନ, ବ୍ୟାକ୍ଏଣ୍ଡ ଟେକ୍ନୋଲୋଜି ଅପ୍ଗ୍ରେଡ ଏବଂ ଡାଟା ଇଣ୍ଟିଗ୍ରେସନ ସମସ୍ୟା ଭଳି କାରଣ ଯୋଗୁ ଏବେ ଫାଇଲିଂ ଆରମ୍ଭ ହୋଇପାରିନି ବୋଲି କହିଛନ୍ତି ବିଶେଷଜ୍ଞ । ଆଇଟିଆର୍ ଫାଇଲ ଆରମ୍ଭ ନେଇ ଏବେ ଆୟକର ବିଭାଗ ପକ୍ଷରୁ କୌଣସି ସ୍ପଷ୍ଟ ସୂଚନା ଦିଆଯାଇନାହିଁ । ମାତ୍ର ଜୁନ ୨୦୨୫ ପ୍ରଥମ ସପ୍ତାହରୁ ଏହା ଆରମ୍ଭ ହୋଇପାରେ ବୋଲି ଏକ ରିପୋର୍ଟ ଆସିଛି ।
ଆୟକର ବିଭାଗର ଇଫାଇଲିଂ ୟୁଟିଲିଟି ଟୁଲ୍ ମଧ୍ୟରେ ଅନଲାଇନ ୟୁଟିଲିଟି ବର୍ଗକୁ ବେତନଭୋଗୀ ଶ୍ରେଣୀ ବ୍ୟବହାର କରିଥାନ୍ତି । ଏଥିରେ ବେତନ, ସୁଧ ଆୟ ଏବଂ ଟିଡିଏସ୍ ପୂର୍ବରୁ ଫିଲ୍ ହୋଇ ରହିଥାଏ । ଜେସନ ଏବଂ ଏକ୍ସେଲ ୟୁଟିଲଟି ଟିକସ ପ୍ରଫେସନାଲ ବ୍ୟବହାର କରିଥାନ୍ତି । ଏଥିରେ ଡାଟାକୁ ଅଫଲାଇନ ବ୍ୟବହାର କରି ଅପଲୋଡ କରାଯାଇଥାଏ । ଏହି ଟୁଲ ଗୁଡ଼ିକ ବିନା ରିଟର୍ଣ୍ଣ ଫାଇଲ କରିବା ପ୍ରାୟତଃ ଅସମ୍ଭବ । କାରଣ ଡାଟା ଭାଲିଡେସନ, ଫର୍ମ ସବମିଟ କରିବା ଏବଂ ସିଷ୍ଟମ ଇଣ୍ଟିଗ୍ରେସନ ଏଥିଲାଗି ଜରୁରୀ ହୋଇଥାଏ। ବର୍ତ୍ତମାନ ସମସ୍ୟା ଯୋଗୁ ଯେଉଁମାନେ ରିଫଣ୍ଡ ଲାଗି ଆଶା କରିଛନ୍ତି ସେମାନଙ୍କୁ ଅପେକ୍ଷା କରିବାକୁ ପଡ଼ୁଛି । ଯେଉଁମାନେ ଟିଡିଏସ୍ କିମ୍ବା ଆଡଭାନ୍ସ ଟିକସ ଭରିଛନ୍ତି ସେମାନେ ରିଫଣ୍ଡ ଲାଗି ଫାଇଲିଂ ଆରମ୍ଭ ହେବା ଅପେକ୍ଷା କରିଛନ୍ତି ।
ରିଟର୍ଣ୍ଣର ଅନ୍ତିମ ତାରିଖ ବୃଦ୍ଧି ନେଇ ବିଭାଗ ପକ୍ଷରୁ କୌଣସି ଘୋଷଣା କରାଯାଇନାହିଁ । ଜୁନ ଶେଷ ଯାଏ ୟୁଟିଲିଟି ଉପଲବ୍ଧ ନ ହେଲେ ତାରିଖ ବଢ଼ିପାରେ । ଯଦି ଜୁଲାଇ ୩୧ ସୁଦ୍ଧା ରିଟର୍ଣ୍ଣ ଫାଇଲ ନ କରନ୍ତି ତେବେ ୫ ଲକ୍ଷ ଟଙ୍କାରୁ କମ୍ ଆୟ କରୁଥିବା ବ୍ୟକ୍ତି ବିଶେଷ ୧ ହଜାର ଟଙ୍କା ଏବଂ ୫ ଲକ୍ଷରୁ ଉଦ୍ଧ୍ୱର୍ ଆୟ କ୍ଷେତ୍ରରେ ୫ ହଜାର ଟଙ୍କା ଜରିମାନା ଭରିବାକୁ ହେବ । ବକେୟା ଟିକସ ଉପରେ ମାସିକ ୧% ସୁଧ ଦେବାକୁ ହେବ ।
