ନଟିଂହାମ,୨୯/୦୬: ଘରୋଇ ଇଂଲଣ୍ଡ ଓ ଭାରତ ମହିଳା ଦଳ ମଧ୍ୟରେ ଅନୁଷ୍ଠିତ ପ୍ରଥମ ଟି-ଟ୍ୱେଣ୍ଟି ମୁକାବିଲାରେ ଭାରତ ୯୭ ରନ୍ରେ ବିଶାଳ ବିଜୟ ହାସଲ କରିଛି । ଏହି ମ୍ୟାଚ୍ରେ ପ୍ରଥମେ ବ୍ୟାଟିଂ କରି ଦଳ ୫ ୱିକେଟ୍ ବିନିମୟରେ ୨୧୦ ରନ ସଂଗ୍ରହ କରିଥିଲା । ଜବାବରେ ଇଂଲଣ୍ଡ ୧୪.୫ ଓଭରରେ ୧୧୩ ରନ କରି ଅଲ୍ ଆଉଟ୍ ହୋଇ ଯାଇଥିଲା ।
ଆହତ ହର୍ମନପ୍ରୀତ କୌରଙ୍କ ଅନୁପସ୍ଥିତିରେ ଭାରତୀୟ ଦଳର ନେତୃତ୍ୱ ନେଇଥିବା ସ୍ମୃତି ମନ୍ଧନା ଶତକ ଅର୍ଜନ କରି ବିରଳ ରେକର୍ଡ ସ୍ଥାପନ କରିବା ସହ ଦଳକୁ ଜିବାଇବାରେ ପ୍ରମୁଖ ଭୂମିକା ଗ୍ରହଣ କରିଥିଲେ । ସେ ପ୍ରଥମ ଭାରତୀୟ ବ୍ୟାଟର ଭାବେ ୩ଟି ଯାକ ଫର୍ମାଟ୍ରେ ଶତକ ଅର୍ଜନ କରିବାରେ ରେକର୍ଡ କରିଥିଲେ । କେବଳ ସେତିକି ନୁହେଁ, ଭାରତୀୟ ଭାବେ ସେ ଟି-ଟ୍ୱେଣ୍ଟି ଫର୍ମାଟ୍ରେ ସର୍ବବୃହତ୍ ଇନିଂସ ଖେଳିବାରେ ହର୍ମନପ୍ରୀତଙ୍କ ରେକର୍ଡ ଭାଙ୍ଗିଥିଲେ । ଏହାପରେ ପଦାର୍ପଣ ମ୍ୟାଚ୍ ଖେଳିଥିବା ୨୦ବର୍ଷୀୟା ଶ୍ରୀ ଚରଣୀ ୧୨ ରନ୍ରେ ୪ଟି ୱିକେଟ୍ ନେଇ ଇଂଲଣ୍ଡର ବ୍ୟାଟିଂ ବିପର୍ଯ୍ୟୟ ଘଟାଇଥିଲେ ।
ଟସ୍ ଜିତି ଫିଲ୍ଡିଂ ନିଷ୍ପତ୍ତି ନେବା ଘରୋଇ ଦଳ ପାଇଁ ମହଙ୍ଗା ପଡ଼ିଥିଲା । ଭାରତର ଦୁଇ ଓପନର ଶେଫାଳି ବର୍ମା ଓ ମନ୍ଧନା ଆକ୍ରମଣାତ୍ମକ ବ୍ୟାଟିଂ କରି ୭୭ ରନ୍ ସଂଗ୍ରହ କରିଥିଲେ । ଶେଫାଳି ୨୦ ରନ କରି ପ୍ରଥମେ ଆଉଟ୍ ହୋଇଥିଲେ । ମାତ୍ର ମନ୍ଧନାଙ୍କୁ ଅଟକାଇବାରେ ଇଂଲଣ୍ଡ ବୋଲର ବିଫଳ ହୋଇଥିଲେ । ସେ ଚୌକା ଓ ଛକା ବର୍ଷା କରି ଶତକ ଅର୍ଜନ କରିବା ଫଳରେ ଦଳୀୟ ସ୍କୋର ୨୧୦ରେ ପହଞ୍ଚିଥିଲା । ସେ ୬୨ଟି ବଲ୍ର ସାମ୍ନା କରି ୧୫ଟି ଚୌକା ଓ ୩ଟି ଛକା ବଳରେ ୧୧୨ ରନ ସଂଗ୍ରହ କରିଥିଲେ । ସୂଚନାଯୋଗ୍ୟ, ବିଶ୍ୱର ପଞ୍ଚମ ମହିଳା ବ୍ୟାଟର ଭାବେ ମନ୍ଧନା ୩ଟି ଯାକ ଫର୍ମାଟ୍ରେ ଶତକ ଅର୍ଜନ କରିଛନ୍ତି । ତାଙ୍କ ପୂର୍ବରୁ ହିଥର ନାଇଟ୍, ତାମି ବ୍ୟୁମୋଣ୍ଟ, ଲାଉରା ଉଲଭର୍ଟ ଓ ବେଥ ମୁନି ଏହି ସଫଳତା ଅର୍ଜନ କରିଛନ୍ତି । ଅନ୍ୟ ମାନଙ୍କ ମଧ୍ୟରେ ହର୍ଲିନ ଦେଓଲ ୭ ଚୌକା ବଳରେ ୪୩ ରନ କରିଥିବାବେଳେ ରିଚା ଘୋଷ ୧୨ ରନ କରିଥିଲେ । ଇଂଲଣ୍ଡ ପକ୍ଷରୁ ଲାଉରେନ ବେଲ୍ ୩ଟି ୱିକେଟ ନେଇଥିଲେ ।
ଜବାବରେ ଇଂଲଣ୍ଡ ପ୍ରାରମ୍ଭରୁ ବିପର୍ଯ୍ୟୟର ସାମ୍ନା କରିଥିଲା । ଓପନର ଡାନି ୱାଟ୍ ଖାତା ଖୋଲି ପାରିନଥିବାବେଳେ ଶୋଫିଆ ଡଙ୍କଲି ମାତ୍ର ୭ ରନ କରି ପାଭିଲିୟନ ଫେରିଥିଲେ । ୯ ରନ୍ରେ ଓପନିଂ ଯୋଡ଼ିଙ୍କୁ ହରାଇବା ପରେ ଇଂଲଣ୍ଡ ବିପର୍ଯ୍ୟୟରୁ ମୁକୁଳି ପାରି ନଥିଲା । କେବଳ ଅଧିନାୟିକା ନାତାଲି ସ୍କିଭର-ବ୍ରଣ୍ଟଙ୍କୁ ଛାଡ଼ି ଦେଲେ ଅନ୍ୟ କେହି ଭାରତୀୟ ବୋଲରଙ୍କ ସାମ୍ନା କରିପାରି ନଥିଲେ । ସ୍କିଭର-ବ୍ରଣ୍ଟ ୧୦ ଚୌକା ବଳରେ ସର୍ବାଧିକ ୬୬ ରନ କରିଥିଲେ । ଅନ୍ୟମାନଙ୍କ ମଧ୍ୟରେ ଏମ ଆର୍ଲଟ୍ ୧୨ ଓ ତାମି ବ୍ୟୁମୋଣ୍ଟ ୧୦ ରନ କରିଥିଲେ। ବାକି ୮ ବ୍ୟାଟର ୨ଅଙ୍କ ଛୁଇଁ ପାରି ନଥିଲେ । ଭାରତ ପକ୍ଷରୁ ଶ୍ରୀ ଚରଣୀଙ୍କ ୪ ୱିକେଟ ବ୍ୟତୀତ ଦୀପ୍ତି ଶର୍ମା ଓ ରାଧା ଯାଦବ ୨ଟି ଲେଖାଏଁ ୱିକେଟ୍ ନେଇଥିଲେ ।
