ନୂଆଦିଲ୍ଲୀ: ଭାରତ ଏକ ଅତ୍ୟାଧୁନିକ ହାଇପରସୋନିକ୍ ମିସାଇଲ K-6 ନିର୍ମାଣ କରୁଛି। ଯାହା ବ୍ରହ୍ମୋସ ମିସାଇଲଠାରୁ ଅଧିକ ଦ୍ରୁତ ଗତିରେ ଯାତ୍ରା କରିବା ସହ ଓ ଅତ୍ୟନ୍ତ ଘାତକ ଆକ୍ରମଣ କରିବାରେ ସକ୍ଷମ ବୋଲି ଜଣାପଡିଛି। ଏହି ମିସାଇଲ ମାତ୍ର କିଛି ମିନିଟ ମଧ୍ୟରେ ନିର୍ଦ୍ଦିଷ୍ଟ ଲକ୍ଷ୍ୟକୁ ଟାର୍ଗେଟ କରିପାରିବ, ଯାହା ଭାରତର ପ୍ରତିରକ୍ଷା କ୍ଷମତାକୁ ନୂଆ ଉଚ୍ଚତା ପ୍ରଦାନ କରିବ। ଡିଫେନ୍ସ ରିସର୍ଚ ଆଣ୍ଡ ଡେଭେଲପମେଣ୍ଟ ଅର୍ଗାନାଇଜେସନ (DRDO) ଏହାର ପରୀକ୍ଷଣ ଓ ଉନ୍ନୟନ କାର୍ଯ୍ୟରେ ନିୟୋଜିତ ରହିଛି। K-6 ହାଇପରସୋନିକ ଗତିରେ, ଅର୍ଥାତ୍ ଧ୍ୱନିର ଗତିଠାରୁ ପାଞ୍ଚ ଗୁଣରୁ ଅଧିକ ବେଗରେ ଉଡ଼ିପାରିବ। ଏହାର ଉନ୍ନତ ପ୍ରଯୁକ୍ତି ଏବଂ ସଠିକ୍ ମାରକ କ୍ଷମତା ଶତ୍ରୁଙ୍କ ଲକ୍ଷ୍ୟକୁ ଅଧିକ କ୍ଷତି ପହଞ୍ଚାଇବାରେ ସକ୍ଷମ। ଯାହା ଏହାକୁ ବ୍ରହ୍ମୋସଠାରୁ ଅଧିକ ଶକ୍ତିଶାଳୀ ମିସାଇଲ ଭାବେ ପ୍ରସ୍ତୁତ କରୁଛି। 

ଏହି ମିସାଇଲ ଭାରତର ପ୍ରତିରକ୍ଷା ରଣନୀତିକୁ ଆହୁରି ଅଧିକ ମଜବୁତ କରିବ। ଏହାର ଅତି ଦ୍ରୁତ ଗତି ଏବଂ ନିର୍ଭୁଲ ମାରକ କ୍ଷମତା ଶତ୍ରୁଙ୍କ ପ୍ରତିରକ୍ଷା ବ୍ୟବସ୍ଥାକୁ ମଧ୍ୟ ନିଷ୍କ୍ରିୟ କରିଦେବ। ଯାହା ଏହାକୁ ଆଞ୍ଚଳିକ ସୁରକ୍ଷା ଦୃଷ୍ଟିରୁ ଏକ ଗୁରୁତ୍ୱପୂର୍ଣ୍ଣ ଅସ୍ତ୍ରରେ ପରିଣତ କରୁଛି। ଏହା ଶତ୍ରୁ ଦେଶମାନଙ୍କ ପାଇଁ ଏକ ବଡ଼ ଚ୍ୟାଲେଞ୍ଜ ହେବ। କାରଣ ଏହାର ଗତି ଏବଂ ଶକ୍ତି ସାମରିକ ରଣନୀତିରେ ନୂଆ ମାନଦଣ୍ଡ ସ୍ଥାପନ କରିବ। 

K-6 ମିସାଇଲର ଉନ୍ନୟନ ଭାରତର ସାମରିକ ଶକ୍ତିକୁ ବିଶ୍ୱ ମଞ୍ଚରେ ଆହୁରି ମଜବୁତ କରିବ। ଏହା ଦେଶର ସୁରକ୍ଷା ନୀତିରେ ଏକ ନୂଆ ଅଧ୍ୟାୟ ସୃଷ୍ଟି କରିବ। ଯାହା ଭାରତକୁ ହାଇପରସୋନିକ ପ୍ରଯୁକ୍ତି କ୍ଷେତ୍ରରେ ଅଗ୍ରଣୀ ରାଷ୍ଟ୍ର ଭାବେ ପ୍ରତିଷ୍ଠିତ କରିବ। ଏହି ମିସାଇଲର ସଫଳତା ଭାରତର ସ୍ୱାବଲମ୍ବୀ ପ୍ରତିରକ୍ଷା ପ୍ରଯୁକ୍ତି ଉନ୍ନୟନର ଏକ ଉଲ୍ଲେଖନୀୟ ପଦକ୍ଷେପ ଭାବେ ପରିଗଣିତ ହେବ ବୋଲି ବିଶେଷଜ୍ଞମାନେ ଦାବି କରିଛନ୍ତି।