ନୂଆଦିଲ୍ଲୀ,୧୨।୫: ଆଜି ଭାରତ ଏବଂ ପାକିସ୍ତାନର ଡିଜିଏମଓଙ୍କ ମଧ୍ୟରେ ହେବାକୁ ଥିବା ଆଲୋଚନାର ସମୟ ପରିବର୍ତ୍ତନ କରାଯାଇଛି। ସୂଚନା ଅନୁଯାୟୀ, ହଟଲାଇନ୍ରେ ଏହି କଥାବାର୍ତ୍ତା ଏବେ ସନ୍ଧ୍ୟାରେ ହୋଇପାରେ। ଭାରତର ଡିଜିଏମଓ ଲେଫ୍ଟନାଣ୍ଟ ଜେନେରାଲ ରାଜୀବ ଘାଇ ଏବଂ ପାକିସ୍ତାନର ଡିଜିଏମଓ ମେଜର ଜେନେରାଲ କାସିମ ଅବଦୁଲ୍ଲାଙ୍କ ମଧ୍ୟରେ ଆଲୋଚନା ହେବାର ଅଛି। ଏହି ଗୁରୁତ୍ୱପୂର୍ଣ୍ଣ ଆଲୋଚନାରେ, ଅସ୍ତ୍ରବିରତିକୁ କିପରି ଆଗକୁ ନିଆଯିବ ସେ ବିଷୟରେ ଏକ ରୋଡମ୍ୟାପ୍ ପ୍ରସ୍ତୁତ କରାଯିବ। ତେବେ ଏହା କିଛି ସମୟ ପୂର୍ବରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ବାସଭବନରେ ଏକ ଉଚ୍ଚସ୍ତରୀୟ ବୈଠକ ବସିଥିଲା। ଏଥିରେ ସିଡିଏସ୍ ଅନିଲ ଚୌହାନ, ତିନି ସେନାମୁଖ୍ୟ ଓ ପ୍ରତିରକ୍ଷାମନ୍ତ୍ରୀ ରାଜନାଥ ସିଂହ ଉପସ୍ଥିତ ଥିଲେ।
ସେପଟେ ଭାରତ ଏବଂ ପାକିସ୍ତାନ ମଧ୍ୟରେ ସାମରିକ ସଂଘର୍ଷ ବନ୍ଦ ହେବା ପରେ, ସୋମବାର ପଞ୍ଜାବର ସୀମାବର୍ତ୍ତୀ ଅଞ୍ଚଳରେ ସ୍ଥିତି ସ୍ୱାଭାବିକ ରହିଛି । ବଜାରରେ ଲୋକଙ୍କ ଭିଡ଼ ଦେଖିବାକୁ ମିଳିଥିଲା। ତଥାପି, ସତର୍କତାମୂଳକ ପଦକ୍ଷେପ ସ୍ୱରୂପ, କିଛି ଜିଲ୍ଲାରେ ସ୍କୁଲଗୁଡ଼ିକୁ ବନ୍ଦ ରଖାଯାଇଛି। ଚାରି ଦିନ ଧରି ସୀମାପାର ଡ୍ରୋନ୍ ଏବଂ କ୍ଷେପଣାସ୍ତ୍ର ଆକ୍ରମଣ ପରେ, ଭାରତ ଏବଂ ପାକିସ୍ତାନ ଶନିବାର ଅପରାହ୍ନରେ ସାମରିକ କାର୍ଯ୍ୟାନୁଷ୍ଠାନ ବନ୍ଦ କରିବାକୁ ରାଜି ହୋଇଛନ୍ତି।
‘ଅପରେସନ ସିନ୍ଦୂର’ ସମୟରେ ବନ୍ଦ ହୋଇଥିବା ଦେଶର ୩୨ଟି ବିମାନବନ୍ଦର ଏବେ ଖୋଲାଯାଇଛି। ୫ ଦିନ ପରେ, ଏହି ବିମାନବନ୍ଦରଗୁଡ଼ିକରୁ ପୁଣି ଥରେ ବିମାନ ଉଡ଼ାଣ ଆରମ୍ଭ ହୋଇଛି। ଭାରତୀୟ ବିମାନବନ୍ଦର କର୍ତ୍ତୃପକ୍ଷ ଏକ ପ୍ରେସ୍ ବିଜ୍ଞପ୍ତି ଜାରି କରି କହିଛନ୍ତି ଯେ ୧୫ ମଇ ୨୦୨୫ ସନ୍ଧ୍ୟା ୦୫:୨୯ ପର୍ଯ୍ୟନ୍ତ ୩୨ଟି ବିମାନବନ୍ଦରକୁ ଅସ୍ଥାୟୀ ଭାବରେ ବେସାମରିକ ବିମାନ ଚଳାଚଳ ପାଇଁ ବନ୍ଦ କରିବା ପାଇଁ ଏକ ନୋଟିସ୍ ଜାରି କରାଯାଇଛି। ଏହା ସୂଚିତ କରାଯାଉଛି ଯେ ଏହି ବିମାନବନ୍ଦରଗୁଡ଼ିକ ବେସାମରିକ ବିମାନ ଚଳାଚଳ ପାଇଁ ଉପଲବ୍ଧ। ଯାତ୍ରୀମାନଙ୍କୁ ଏୟାରଲାଇନ୍ସ ସହିତ ସିଧାସଳଖ ବିମାନ ସ୍ଥିତି ଯାଞ୍ଚ କରିବାକୁ ଏବଂ ନିୟମିତ ଅପଡେଟ୍ ପାଇଁ ଏୟାରଲାଇନ୍ସ ୱେବସାଇଟ୍ ଉପରେ ନଜର ରଖିବାକୁ ପରାମର୍ଶ ଦିଆଯାଇଛି
