ନୂଆଦିଲ୍ଲୀ, ୦୧/୦୮ : ବୁଝାମଣା ପାଇଁ ଟାରିଫ୍କୁ ଅସ୍ତ୍ର କରୁଛି ଆମେରିକା। ବାଣିଜ୍ୟ ଚୁକ୍ତି ପାଇଁ ଚାପ ପକାଉଛନ୍ତି ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ। ଭାରତ ଉପରେ କଷିଛନ୍ତି ୨୫ ପ୍ରତିଶତ ଟାରିଫ୍। ହେଲେ କାମ କରିବନି ଟ୍ରମ୍ପଙ୍କ ଚାପ ରାଜନୀତି । ଓ୍ବାଶିଂଟନକୁ ଓଲଟା ପଡ଼ିବ ପାୱାର ଗେମ୍। ଉପଯୁକ୍ତ ଜବାବ ଦେବ ନୂଆଦିଲ୍ଲୀ । ଟ୍ରମ୍ପଙ୍କ ଟାରିଫ୍ ଘୋଷଣା ପରେ ଏବେ ଆକ୍ସନ୍ ମୋଡ୍ରେ ସରକାର। ଆମେରିକାର ଷ୍ଟିଲ୍ଥ ଫାଇଟର୍ ଜେଟ୍ ଏଫ୍-୩୫ କିଣିବାକୁ ସରକାର ପଛଘୁଞ୍ଚା ଦେଇଥିବା କୁହାଯାଉଛି । ଭାରତ ପ୍ରତିରକ୍ଷା ଶକ୍ତି ବଢ଼ାଇବାକୁ ଋଷରୁ ଆଣିବ Su-57 ଷ୍ଟିଲ୍ଥ ଜେଟ୍। ଏନେଇ ବ୍ଲୁମବର୍ଗ ସୂତ୍ରରୁ ଖୁଲାସା ହୋଇଛି।
ଏଫ୍-୩୫ ଫାଇଟର୍ ଜେଟ୍ ନେଇ ଆମେରିକା ଏବଂ ଭାରତ ଭିତରେ ଲମ୍ଵା ସମୟ ଧରି ଆଲୋଚନା ଚାଲିଥିଲା। ଚଳିତ ବର୍ଷ ଫେବୃଆରୀରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏବଂ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଆଲୋଚନା ବେଳେ ପ୍ରତିରକ୍ଷା ଡିଲ୍ ଫାଇନାଲ୍ ହୋଇଥିଲା । ଟ୍ରମ୍ପ ମଧ୍ୟ ଭାରତକୁ ଏଫ୍-୩୫ ବିକିବା ନେଇ ବିଧିବଦ୍ଧ ଘୋଷଣା କରିଥିଲେ। ହେଲେ ଟ୍ରମ୍ପ୍ ଋଷ ଠାରୁ ତେଲ କିଣିବା ନେଇ ଭାରତ ଉପରେ ଜରିମାନା ସଦୃଶ ୨୫ ପ୍ରତିଶତ ଟାରିଫ୍ ଲଗାଇବା ପରେ ଏବେ ଏହାର ଜବାବ ଦେବା ପ୍ରସ୍ତୁତିରେ ଭାରତ।
ବ୍ଲୁମବର୍ଗ ତଥ୍ୟ କହୁଛି, ହାଇ ଭ୍ୟାଲ୍ୟୁ ଡିଫେନ୍ସ ୱେପନ୍ସ ବିକିବା ନେଇ ବାରମ୍ବାର ଭାରତ ଉପରେ ଚାପ ପକାଉଛି ୱାଶିଂଟନ। ହେଲେ ନିକଟ ଭବିଷ୍ୟତରେ ଆମେରିକା ସହ କୌଣସି ପ୍ରକାରର ଡିଫେନ୍ସ ଏଗ୍ରିମେଣ୍ଟ କରିବେନି ବୋଲି ମନା କରିଛନ୍ତି ମୋଦି ସରକାର । ତେବେ ଏହା ପଛରେ ୨ଟି ବଡ଼ କାରଣ ହୋଇପାରେ ବୋଲି ଅନୁମାନ କରାଯାଉଛି। ଯେପରିକି ଏଫ-୩୫ ଏକ ଧଳା ହାତୀ ଆକାରର। ଏହାକୁ ଲମ୍ଵା ସମୟ ଯାଏଁ ଉଡ଼ାଇବାକୁ ହେଲେ ଅଧିକ ଖର୍ଚ୍ଚ କରିବାକୁ ପଡ଼ିବ। ଆମେରିକା ଖୋଦ୍ ଏହାର ମେଣ୍ଟେନାନ୍ସକୁ କଣ୍ଟ୍ରୋଲ କରିପାରୁ ନାହିଁ। ଏହାର ଗୋଟିଏ ଅପରେସନାଲ ଘଣ୍ଟାର ଖର୍ଚ୍ଚ ପ୍ରାୟ ୩୫ ହଜାର ଡଲାର। ସେହିପରି ଆଉ ଏକ ବଡ଼ କାରଣ ହେଉଛି ସୋର୍ସ କୋଡ୍ ଦୂରର କଥା ଏଫ-୩୫ର କୌଣସି ଟେକ୍ନୋଲୋଜି ଟ୍ରାନ୍ସଫର ହୋଇପାରିବ ନାହିଁ।
ଆମେରିକାର ଏଫ-୩୫ ତୁଳନାରେ ଋଷର ଏସୟୁ-୫୭ ଜେଟରେ ସେଭଳି କୌଣସି ସମସ୍ୟା ନାହିଁ। ଋଷ୍ ମଧ୍ୟ ଭାରତକୁ ଏସୟୁ-୫୭ କିଣିବାକୁ ଜବରଦସ୍ତ ଅଫର୍ ଦେଇଛି। ତେବେ ଭାରତ ସରକାରଙ୍କ ପକ୍ଷରୁ ଏନେଇ କୌଣସି ପ୍ରତିକ୍ରିୟା ଦିଆଯାଇ ନାହିଁ। ବୈଦେଶିକ ନୀତିରେ ଭାରତ ସବୁବେଳେ ଶାନ୍ତି ରଣନୀତି ଏବଂ ଧର୍ଯ୍ୟ ଧାରଣ କରେ। ଏପରି ସ୍ଥିତିରେ ଏବେ ଦେଖିବାକୁ ବାକି ରହିଲା ଟ୍ରମ୍ପଙ୍କ ପାୱାର ଗେମ୍ର କଣ ଜବାବ ଦେବ ଭାରତ।
