ନୂଆଦିଲ୍ଲୀ,୨୬।୮:ଭାରତ ଦେଖାଇଲ ନିଜର ବିଶାଳ ହୃଦୟ। ପାକିସ୍ତାନକୁ ଠିକ୍ ସମୟରେ ବନ୍ୟା ବିପଦ ବିଷୟରେ ସୂଚନା ଦେଇ ଦେଢ ଲକ୍ଷ ଲୋକଙ୍କ ଜୀବନ ବଞ୍ଚାଇଲା। ଜମ୍ମୁ-କଶ୍ମୀର ତାୱି ନଦୀରେ ସମ୍ଭାବିତ ବନ୍ୟା ଚେତାବନୀ ପରେ ପାକିସ୍ତାନ ସ୍ଥାନୀୟ ଲୋକଙ୍କୁ ସୁରକ୍ଷିତ ସ୍ଥାନକୁ ନେଇପାରିଥିଲା। ଭାରତ ଏହି ପଦକ୍ଷେପ ଦୁଇ ଦେଶ ଭିତରେ ବିବାଦୀୟ ସମ୍ପର୍କ ପରେ ବି ମାନବିକତାର ବଡ଼ ଉଦାହରଣ ମନେକରାଯାଉଛି।
ଭାରତର ବୈଦେଶିକ ମନ୍ତ୍ରଣାଳୟ ଇସଲାମାବାଦ ସ୍ଥିତ ଭାରତୀୟ ଦୂତାବାସ ମାଧ୍ୟମରେ ପାକିସ୍ତାନକୁ ସୂଚନା ଦେଇଥିଲେ। ଏଥିରେ କୁହାଯାଇଥିଲା ତାୱି ନଦୀର ଜଳସ୍ତର ଦ୍ରୁତ ଗତିରେ ବଢିବାରେ ଲାଗିଛି, ଯେଉଁ କାରଣରୁ ବନ୍ୟା ସ୍ଥିତି ସୃଷ୍ଟି ହୋଇପାରେ। ଭାରତର ଚେତାବନୀ ପରେ ପାକିସ୍ତାନର ସରକାର ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରିଥିଲେ। ଅପରେସନ୍ ସିନ୍ଦୂର ପରେ ଭାରତ ଓ ପାକିସ୍ତାନ ଭିତରେ ପ୍ରଥମ ଔପଚାରିକ ଆଲୋଚନା ଥିଲା। ପହଲଗାମ୍ ହମଲା ପରେ ଭାରତ ସିନ୍ଧୁ ଜଳ ଚୁକ୍ତିକୁ ଅସ୍ଥାୟୀ ଭାବରେ ରଦ୍ଦ କରିଥିଲା। ଏହାପରେ ବି ଭାରତ ମାନବିକତା ଆଧାରରେ ଏହି ପଦକ୍ଷେପ ଗ୍ରହଣ କରିଛି।
ମୂଷଳାଧାର ବର୍ଷା ଓ ନଦୀରେ ବଢୁଥିବା ଜଳସ୍ତରରୁ ପାକିସ୍ତାନର ପଞ୍ଜାବ ପ୍ରଦେଶ ଅଧିକ ପ୍ରଭାବିତ ହୋଇଥିଲା। ଭାରତର ଚେତାବନୀ ପରେ ୨୪ ଘଣ୍ଟାରେ ପ୍ରାୟ ୨୦ ହଜାର ଲୋକଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତରିତ କରାଯାଇଥିଲା। ତଳୁଆ ଅଞ୍ଚଳରେ ରିଲିଫ ଶିବିର ସ୍ଥାପିତ କରାଯାଇଥିଲା। ଏହା ସହ ଉଦ୍ଧାର ଅଭିଯାନ ପାଇଁ ମେସିନାରୀ ସହ ଟିମ୍ ମୁତୟନ କରାଯାଇଛି। ଆଗାମୀ ୪୮ ଘଣ୍ଟା ଆହୁରି ପ୍ରବଳ ବର୍ଷା ହେବାର ଚେତାବନୀ ଦେଇଛି ପାଣିପାଗ ବିଭାଗ। ଯାହାଫଳରେ ଇସଲାମାବାଦ, ରାଓ୍ବଲପିଣ୍ଡି, ଲାହୋର ଭଳି ବଡ଼ ସହରରେ ବନ୍ୟା ବିପଦ ଦେଖାଦେଇଛି। ଏହାର ସିନ୍ଧୁ ଜଳ ଚୁକ୍ତି ସହ କୌଣସି ସମ୍ପର୍କ ନାହିଁ। ଉଲ୍ଲେଖନୀୟ ଯେ, ଚଳିତ ବର୍ଷ ଜୁନ୍ ଆରମ୍ଭରୁ ପାକିସ୍ତାନରେ ମୌସୁମୀ ବର୍ଷା ପ୍ରବଳ କ୍ଷୟକ୍ଷତି କରିଥିଲା। ବର୍ଷା ଓ ବନ୍ୟା କାରଣରୁ ୫୦୦ରୁ ଅଧିକ ଲୋକଙ୍କର ମୃତ୍ୟୁ ହୋଇଥିଲା।
