ନୂଆଦିଲ୍ଲୀ, ୩୦/୦୬: ବହୁପ୍ରତୀକ୍ଷିତ ଜନଗଣନା ପ୍ରକ୍ରିୟା ଆରମ୍ଭ ହେବାର ତାରିଖ ଘୋଷଣା କରାଯାଇଛି । ଏଥର ଜନଗଣନା ଦୁଇଟି ପର୍ଯ୍ୟାୟରେ ହେବ । ରେଜିଷ୍ଟ୍ରାର ଜେନେରାଲ ଅଫ୍ ଇଣ୍ଡିଆ ମୁତାବକ, ଆସନ୍ତା ବର୍ଷ ଅର୍ଥାତ ୨୦୨୬ ଏପ୍ରିଲ ୧ରୁ ପ୍ରଥମ ପର୍ଯ୍ୟାୟ ଆରମ୍ଭ ହେବ । ଏହି ପର୍ଯ୍ୟାୟରେ ଲୋକଙ୍କଠାରୁ ସେମାନଙ୍କ ଘରେ ଥିବା ଗାଡ଼ି, ଇଲେକ୍ଟ୍ରୋନିକ ସାମଗ୍ରୀ ଓ ଅନ୍ୟ ସୁଖସୁବିଧା ପ୍ରଦାନକାରୀ ଜିନିଷର ତାଲିକା ପ୍ରସ୍ତୁତ କରାଯିବ । ଏଥିଲାଗି ସେନ୍ସସ୍ କମିଶନର ଓ ରେଜିଷ୍ଟ୍ରାର ଜେନେରାଲ ଅଫ୍ ଇଣ୍ଡିଆ ରାଜ୍ୟ ମୁଖ୍ୟ ସଚିବମାନଙ୍କୁ ଚିଠି ଲେଖିଛନ୍ତି ।
ଏଥର ମୋବାଇଲ ଆପ୍ଲିକେସନ ବ୍ୟବହାର କରି ଡିଜିଟାଲ ଉପାୟରେ ଜନଗଣନା କରାଯିବ । ପ୍ରଥମ ପର୍ଯ୍ୟାୟରେ ଲୋକଙ୍କ ଆବାସିକ ସ୍ଥିତି, ସମ୍ପତ୍ତି ଓ ବିଭିନ୍ନ ସାମଗ୍ରୀର ତଥ୍ୟ ହାସଲ କରାଯିବ । ଦ୍ୱିତୀୟ ପର୍ଯ୍ୟାୟରେ ଘରେ ରହୁଥିବା ପ୍ରତ୍ୟେକ ଲୋକଙ୍କ ଜନସାଂଖ୍ୟିକ, ସାମାଜିକ-ଆର୍ଥିକ ଓ ଅନ୍ୟ ସୂଚନା ସଂଗ୍ରହ ହେବ । ଏହାକୁ ‘ପପୁଲେସନ ଏନ୍ୟୁମରେସନ (ପିଇ)’ କୁହାଯିବ । ମୁଖ୍ୟ ସଚିବମାନଙ୍କୁ ଚିଠି ଲେଖି କୁହାଯାଇଛି ଯେ ଧାର୍ଯ୍ୟ ତାରିଖ ପୂର୍ବରୁ ସୁପରଭାଇଜର ଓ ଅନ୍ୟ ଜନଗଣନା ଅଧିକାରୀ ଓ କାର୍ଯ୍ୟକର୍ତ୍ତାଙ୍କ କାମଗୁଡ଼ିକୁ ବଣ୍ଟାଯିବା ଆବଶ୍ୟକ । ଏହି କାମ ଜିଲ୍ଲା ସ୍ତରରେ କରାଯିବ । ଏଥର ଜନଗଣନାରେ ଜାତି ଭିତ୍ତିକ ସୂଚନା ସାମିଲ କରାଯିବ । ଜନଗଣନା କାର୍ଯ୍ୟ ପାଇଁ ୩୪ ଲକ୍ଷ ସର୍ବେକ୍ଷଣକାରୀ ଓ ସୁପରଭାଇଜର ନିୟୋଜିତ ହେବେ । ଏମାନେ ସମସ୍ତେ ବାହାରେ କାମ କରିବେ । ଏହାଛଡ଼ା ୩୦ ହଜାର ଜନଗଣନା ପଦାଧିକାରୀଙ୍କୁ ମୁତୟନ କରାଯିବ । ଏମାନେ ଜନଗଣନା ବେଳେ ମିଳିବାକୁ ଥିବା ତଥ୍ୟର ଡାଟା ପ୍ରସ୍ତୁତ କରିବେ । ଏହାପରେ ଏହିସବୁ ତଥ୍ୟକୁ ଡିଜିଟାଇଜ୍ କରାଯିବ ।
