ନୂଆଦିଲ୍ଲୀ,୨୦/୧୧: ବୁଢ଼ା ହୋଇଚାଲିଛି ଚୀନ୍ । ଯୁବ ଭାରତ ଆଗରେ ଏହା ଫିକା ପଡ଼ିବାକୁ ଯାଉଛି । ଏକ ରିପୋର୍ଟ ଅନୁସାରେ, ଭାରତ ଖୁବ୍ଶୀଘ ସର୍ବବୃହତ୍ ଶ୍ରମଶକ୍ତିର ଦେଶ ପାଲଟିବ । ଏଞ୍ଜେଲ୍ ୱାନ୍ ୱେଲ୍ଥ ପକ୍ଷରୁ ପ୍ରସ୍ତୁତ ରିପୋର୍ଟ ଅନୁସାରେ, ୨୦୨୩ରୁ ୨୦୫୦ ମଧ୍ୟରେ ବିଶ୍ୱରେ ଯେତିକି ସଂଖ୍ୟାରେ ନୂଆ ଲୋକ କାର୍ଯ୍ୟ ବୟସରେ ପାଦ ରଖିବେ ସେଥିରେ ୨୦% ଭାଗ ଭାରତର ରହିବ । ଅନ୍ୟପକ୍ଷରେ, ଚୀନ୍ରେ କାର୍ଯ୍ୟ କରୁଥିବା ଲୋକଙ୍କ ସଂଖ୍ୟାରେ ବୃହତ ହ୍ରାସ ଘଟିବ । ଭାରତରେ ବର୍ଦ୍ଧିତ ଆୟ ଏବଂ ଲୋକଙ୍କ ଆର୍ଥିକ ସ୍ଥିତିରେ ସୁଧାର ନେଇ ମଧ୍ୟ ରିପୋର୍ଟରେ ଆଲୋକପାତ କରାଯାଇଛି । ରିପୋର୍ଟରେ କୁହାଯାଇଛି ଯେ, ୨୦୩୦ ସୁଦ୍ଧା ଭାରତରେ ଧନୀ ପରିବାରଙ୍କ ସଂଖ୍ୟା ୩ ଗୁଣା ହୋଇଯିବ । ଅନ୍ୟପକ୍ଷରେ, ମଧ୍ୟମ ବର୍ଗ ପରିବାର ସଂଖ୍ୟା ଦୁଇଗୁଣା ହେବା ଅନୁମାନ ରହିଛି । ଏହାଦ୍ୱାରା ଗରିବ ପରିବାରଙ୍କ ସଂଖ୍ୟାରେ ବି ବଡ଼ ମାତ୍ରାରେ ହ୍ରାସ ଘଟିବ । ୨୦୧୮ରେ ୪୩% ପରିବାର ଦାରିଦ୍ର୍ୟ ରେଖା ତଳେ ଜୀବନ ଯାପନ କରୁଥିବାବେଳେ ଏହା ୨୦୩୦ ସୁଦ୍ଧା ଖସି ୧୫% ହୋଇଯିବ ବୋଲି ରିପୋର୍ଟରେ ଉଲ୍ଲେଖ କରାଯାଇଛି । ରିପୋର୍ଟରେ ଆହୁରି କୁହାଯାଇଛି ଯେ, ମଜଭୂତ ଘରୋଇ ବାଲାନ୍ସ ସିଟ୍ ମଧ୍ୟରେ ଭାରତ ମୁଣ୍ଡ ପିଛା ଆୟ କ୍ଷେତ୍ରରେ ସବୁଠୁ ଦ୍ରୁତ ଅଭିବୃଦ୍ଧିଶୀଳ ଦେଶରେ ରୂପାନ୍ତର ହେବାକୁ ଯାଉଛି । ଏଥିରେ ଆହୁରି ଉଲ୍ଲେଖ କରାଯାଇଛି ଯେ, ଜିଡିପିର ପ୍ରତିଶତ ଭାବେ ଭାରତର ଘରୋଇ ଋଣ ଏହାର ଏସୀୟ ସମକକ୍ଷଙ୍କ ତୁଳନାରେ ବହୁତ କମ୍, ଯାହା ମଜଭୂତ ଆୟ ଅଭିବୃଦ୍ଧି ଏବଂ ଆର୍ଥିକ ସ୍ୱାସ୍ଥ୍ୟକୁ ଦର୍ଶାଉଛି । ଭାରତର ବଳ ହେଉଛି ଏହାର ଯୁବପିଢ଼ି । ୨୯ ବର୍ଷର ହାରାହାରି ବୟସ ସହ ଭାରତ ବିଶ୍ୱର ସବୁଠୁ କମ୍ ‘ଡିପେଣ୍ଡାନ୍ସି ରେସିଓ’ ଯୁକ୍ତ ଦେଶ ମଧ୍ୟରୁ ଅନ୍ୟତମ ।
‘ଡିପେଣ୍ଡାନ୍ସି ରେସିଓ’ ଅର୍ଥାତ ପ୍ରତି କର୍ମଜୀବି ବ୍ୟକ୍ତିଙ୍କ ଉପରେ କେତେଜଣ ନିର୍ଭରଶୀଳ ଅଛନ୍ତି । ତେବେ ଚୀନ୍ ଏବଂ ୟୁରୋପ ଭଳି ସ୍ଥାନରେ ଏ ଅନୁପାତ ଏବେ ବଢୁଛି, ଯାହା ଏ ଦେଶଗୁଡ଼ିକ ପାଇଁ ଆର୍ଥିକ ସମସ୍ୟା ସୃଷ୍ଟି କରିପାରେ । ରିପୋର୍ଟରେ ବର୍ଦ୍ଧିତ ଆୟର ଉପଯୋଗ ଉପାୟ ଉପରେ ପଡ଼ିବାକୁ ଥିବା ପ୍ରଭାବ ଉପରେ ଦୃଷ୍ଟି ଦିଆଯାଇଛି । ଭାରତରେ ପରିବାର ସଂଖ୍ୟା ଜନସଂଖ୍ୟା ତୁଳନାରେ ଦ୍ରୁତ ବେଗରେ ବଢୁଛି । ଏହାଦ୍ୱାରା ଆବଶ୍ୟକୀୟ ସାମଗ୍ରୀରେ ହେଉଥିବା ଖର୍ଚ୍ଚ ତୁଳନାରେ ଅନାବଶ୍ୟକ ସାମଗ୍ରୀରେ ଖର୍ଚ୍ଚ ଦ୍ରୁତ ବେଗରେ ବଢୁଥିବା ରିପୋର୍ଟରେ ଉଲ୍ଲେଖ କରାଯାଇଛି । ଏହା ଦର୍ଶାଉଛି ଯେ, ଭାରତୀୟ ପରିବାର ଏବେ ମହଙ୍ଗା ସାମଗ୍ରୀ କିଣିବା ପାଇଁ ସକ୍ଷମ । ଏହାସହିତ ସେମାନଙ୍କ ଜୀବନଶୈଳୀରେ ସୁଧାର ହେଉଛି ।
