ନୂଆଦିଲ୍ଲୀ,୦୮/୧୨: ପର୍ଥ ପରାଜୟର ପ୍ରତିଶୋଧ ନେଲା କମିନ୍ସ ବାହିନୀ । ପିଙ୍କ ବଲରେ ଫେଲ ମାରିଲା ଟିମ୍ ଇଣ୍ଡିଆ । ଆଡିଲେଡରେ ଖେଳାଯାଉଥିବା ଦ୍ବିତୀୟ ଟେଷ୍ଟରେ ରୋହିତସେନାର ଭାଙ୍ଗିଲା ଅଣ୍ଟା । ପର୍ଥ ଟେଷ୍ଟରେ ପରାସ୍ତ ହେବା ପରେ ଆଡିଲେଡରେ ଜବରଦସ୍ତ କମବ୍ୟାକ କରିଛି କଙ୍ଗାରୁ ଦଳ । ୧୦ ୱିକେଟରେ ବାଜି ମାରିନେଇଛି ଘରୋଇ ଅଷ୍ଟ୍ରେଲିଆ । ବର୍ଡର-ଗାଭାସ୍କର ଟେଷ୍ଟ ସିରିଜ ବର୍ତ୍ତମାନ ୧-୧ରେ ରହିଛି ।
ବର୍ଡର-ଗାଭାସ୍କର ଟ୍ରଫିରେ ୫ ମ୍ୟାଚ ବିଶିଷ୍ଟ ଟେଷ୍ଟ ସିରିଜ ଖେଳାଯାଉଛି । ଆଡିଲେଡରେ ଦ୍ବିତୀୟ ଟେଷ୍ଟ ଖେଳାଯାଇଥିଲା । ଏହି ମ୍ୟାଚରେ ୧୦ୱିକେଟରେ ପରାସ୍ତ ହୋଇଛି ଭାରତ । ଅଷ୍ଟ୍ରେଲିଆକୁ ବିଜୟ ପାଇଁ ୧୯ ରନ ଦରକାର ଥିଲା । ଯାହାକୁ ତୃତୀୟ ଦିନ ପ୍ରଥମ ସେସନରେ ସହଜରେ ହାସିଲ କରିଥିଲା କଙ୍ଗାରୁ ଦଳ । ନାଥନ ମ୍ୟାକସ୍ବିନି ୧୦ ଏବଂ ଉସମାନ ଖ୍ବାଜା ୯ରନ କରି ଅପରାଜିତ ରହିଥିଲେ । ଅଷ୍ଟ୍ରେଲିଆର ଏହି ବିଜୟ ସହ ବର୍ତ୍ତମାନ ସିରିଜ ୧-୧ରେ ରହିଛି । ଟେଷ୍ଟ ସିରିଜର ତୃତୀୟ ମୁକାବିଲା ଡିସେମ୍ବର ୧୪ ତାରିଖରେ ବ୍ରେସବେନରେ ଖେଳାଯିବ ।
ଟସ୍ ଜିତି ପ୍ରଥମେ ବ୍ୟାଟିଂ କରିଥିଲା ଭାରତ । ମାତ୍ର ୧୮୦ରନରେ ଆଲଆଉଟ ହୋଇଥିଲା ଟିମ୍ ଇଣ୍ଡିଆ । ଏହାପରେ ଅଷ୍ଟ୍ରେଲିଆ ବ୍ୟାଟିଂ କରି ୩୩୭ ରନ କରିଥିଲା । ୧୫୭ରନ ଆଗୁଆ ଥିଲା କଙ୍ଗାରୁ ଦଳ । ଏହାପରେ ଭାରତ ବ୍ୟାଟିଂ କରିଥିଲା । ମାତ୍ର ୧୭୫ରନରେ ଅଲଆଉଟ ହୋଇଥିଲା । ଦ୍ବିତୀୟ ପାଳିରେ ଭାରତର ନୈରାଶ୍ୟଜନକ ପ୍ରଦର୍ଶନ ଦେଖିବାକୁ ମିଳିଥିଲା । ଏହାପରେ ଅଷ୍ଟ୍ରେଲିଆକୁ ବିଜୟ ପାଇଁ ମାତ୍ର ୧୯ରନ ଦରକାର ଥିଲା ଯାହାକୁ ସହଜରେ ହାସଲ କରିନେଇଥିଲା ଦଳ । ପାଟ କମିନ୍ସ ୫ଟି ୱିକେଟ ନେଇଛନ୍ତି । ଅଷ୍ଟ୍ରେଲିଆର ପ୍ରଥମ ପାଲିରେ ଟ୍ରେଭିସ ହେଡ ୧୪୦ ରନ କରିଥିଲେ । ଭାରତ ପକ୍ଷରୁ ଯଶପ୍ରୀତ ବୁମରା ଓ ମହମ୍ମଦ ସିରାଜ ପ୍ରଥମ ପାଳିରେ ୪ଟି ଲେଖାଏଁ ୱିକେଟ ନେଇଥିଲେ । ପ୍ରଥମ ଟେଷ୍ଟରେ ୨୯୫ରନ ବିରାଟ ବିଜୟ ହାସଲ ପରେ ଦ୍ବିତୀୟ ଟେଷ୍ଟରେ ପରାସ୍ତ ହୋଇଛି ଭାରତ ।
ପର୍ଥ ଟେଷ୍ଟରେ ରୋହିତ ଖେଳି ନଥିଲେ ମାତ୍ର ଆଡିଲେଡରେ ଖେଳିଥିଲେ । ମାତ୍ର ସେ ସଫଳ ହୋଇନଥିଲେ । ରୋହିତ ଦୁଇଟି ଇନିଂସରେ ମାତ୍ର ୯ ରନ କରିଥିଲେ । ଋଷବ ଓ ନୀତିଶଙ୍କ ଉପରେ ଭରସା କରାଯାଇଥିଲା ମାତ୍ର ସେ ବି ଫେଲ ମାରିଥିଲେ । ଦୁଇଟି ଇନିଂସରେ ୪୨ ରନ କରିଥିଲେ ସେ । ଅଶ୍ବିନୀ ୭ ଓ ହର୍ଷିତ ରାଣା ଶୂନ ଓ ମହମ୍ମଦ ସିରାଜ ୭ ରନ କରି ଆଉଟ ହୋଇଥିଲେ । ଅଷ୍ଟ୍ରେଲିଆ ବୋଲରଙ୍କ ଆଗରେ ଭାରତୀୟ ବ୍ୟାଟ୍ସମ୍ୟାନ ଏକପ୍ରକାର ହାତ ଟେକି ଦେଇଥିଲେ । ଦ୍ବିତୀୟ ଇନିଂସରେ ଅଧିନାୟକ ପାଟ୍ କମିନ୍ସ ୫ଟି ୱିକେଟ ନେଇଥିବା ବେଳେ ମିଚେଲ ଷ୍ଟାର୍କ ୨ ଓ ସ୍କଟ ବୋଲାଣ୍ଡ ୩ଟି ୱିକେଟ ନେଇଥିଲେ ।
