ପୁଣେ: ବ୍ୟାଟିଂ ପରେ ବୋଲିଂରେ କମାଲ କଲା ଭାରତୀୟ ଦଳ । ହର୍ଷିତ ରାଣା ଏବଂ ରବି ବିଷ୍ଣୋଇ ସମେତ ଭାରତୀୟ ବୋଲରଙ୍କ ଘାତକ ବୋଲିଂ ଆଗରେ ପରାଜୟ ବରଣ କରିଛି ଇଂଲଣ୍ଡ ଟିମ୍ । ଏହା ସହ ଚତୁର୍ଥ ଟି-୨୦ରେ ଦମଦାର ବିଜୟ ସହ ୫ ମ୍ୟାଚ୍ ବିଶିଷ୍ଟ ସିରିଜ୍କୁ ନିଜ ନାଁରେ କରିଛି ଭାରତୀୟ ଦଳ । ପୁଣେର ଏମସିଏ ଷ୍ଟାଡିୟମରେ ହୋଇଥିବା ମୁକାବିଲାକୁ ୧୫ ରନ୍ରେ ଜିତି ନେଇଛି ଟିମ୍ ଇଣ୍ଡିଆ । ସେପଟେ ଭ୍ରମଣକାରୀ ଦଳ ୧୯.୪ ଓଭରରେ ୧୬୬ ରନ୍ କରି ଅଲଆଉଟ୍ ହୋଇଛି ।
ପୁଣେରେ ଇଂଲଣ୍ଡ ପାଇଁ ଭାରତ ୧୮୨ ରନ୍ର ବିଜୟ ଲକ୍ଷ୍ୟ ଦେଇଥିଲା । ଆଜି ଟସ୍ ଜିତି ବୋଲିଂ ନିଷ୍ପତ୍ତି ନେଇଥିଲା ଇଂଲଣ୍ଡ । ପ୍ରଥମେ ବ୍ୟାଟିଂ କରିବାକୁ ଆସିଥିବା ଭାରତୀୟ ଦଳ ୨୦ ଓଭରରେ ୯ ୱିକେଟ୍ ହରାଇ ୧୮୧ ରନ୍ ସଂଗ୍ରହ କରିଥିଲା। ଭାରତ ପାଇଁ ହାର୍ଦ୍ଦିକ ପାଣ୍ଡ୍ୟା ଏବଂ ଶିବମ ଦୁବେ ଚମତ୍କାର ଇନିଂସ ଖେଳିଥିଲେ। ଦୁଇ ବ୍ୟାଟରଙ୍କ ମଧ୍ୟରେ ଷଷ୍ଠ ୱିକେଟ୍ ପାଇଁ ୪୫ ବଲରେ ୮୭ ରନ୍ର ଭାଗିଦାରୀ ହୋଇଥିଲା । ହାର୍ଦ୍ଦିକ ପାଣ୍ଡ୍ୟା ଏବଂ ଶିବମ ଦୁବେ ୫୩ ରନ୍ ଲେଖାଏଁ ସ୍କୋର କରିଥିଲେ । ଭାରତୀୟ ଦଳ ୭୯ ରନ୍ରେ ୫ ୱିକେଟ୍ ହରାଇବା ପରେ ସଂଘର୍ଷ କରିଥିଲା। କିନ୍ତୁ ଏହା ପରେ ହାର୍ଦ୍ଦିକ ପାଣ୍ଡ୍ୟା ଏବଂ ଶିବମ୍ ଦୁବେ ଚମତ୍କାର ପ୍ରଦର୍ଶନ କରି ଦଳର ସ୍ଥିତି ମଜଭୁତ କରିଥିଲେ ।
୩୦ ବଲରେ ହାର୍ଦ୍ଦିକ ପାଣ୍ଡ୍ୟା ୫୩ ରନ୍ ସଂଗ୍ରହ କରିଥିବା ବେଳେ ୩୪ ଟି ବଲରେ ଶିବମ୍ ଦୁବେ ୫୩ ରନ୍ ସଂଗ୍ରହ କରିଥିଲେ। ପ୍ରଥମେ ବ୍ୟାଟିଂ କରିବାକୁ ଆସିଥିବା ଭାରତୀୟ ଦଳର ଆରମ୍ଭ ବହୁତ ଖରାପ ଥିଲା। ଭାରତର ତିନିଜଣ ବ୍ୟାଟର ୧୨ ରନ୍ କରି ପାଭିଲିୟନ ଫେରିଥିଲେ। ସାକିବ ମହମୁଦଙ୍କ ପ୍ରଥମ ଓଭରରେ ୩ଜଣ ଭାରତୀୟ ବ୍ୟାଟର ପାଭିଲିୟନ ଫେରିଥିଲେ। ସଞ୍ଜୁ ସାମସନ ୧ ରନ୍, ଅଭିଷେକ ଶର୍ମା ୧୯ ଟି ବଲରେ ୨୯ ରନ୍ ସଂଗ୍ରହ କରିଥିଲେ। ତିଲକ ବର୍ମା ଏବଂ ସୂର୍ଯ୍ୟକୁମାର ଯାଦବ ଉଭୟ ଆକାଉଣ୍ଟ ଖୋଲିବାରେ ବିଫଳ ହୋଇଥିଲେ। ୨୬ ବଲରେ ୩୦ ରନ୍ ସଂଗ୍ରହ କରି ରିଙ୍କୁ ସିଂ ଆଉଟ୍ ହୋଇଥିଲେ । ୧୦.୪ ଓଭର ପରେ ୭୯ ରନ୍ରେ ୫ ୱିକେଟ୍ ହରାଇ ଭାରତୀୟ ଦଳ ସଂଘର୍ଷ କରିଥିଲା, କିନ୍ତୁ ଏହା ପରେ ଶିବମ୍ ଦୁବେ ଏବଂ ହାର୍ଦ୍ଦିକ ପାଣ୍ଡ୍ୟାଙ୍କ ବିସ୍ଫୋରକ ପ୍ରଦର୍ଶନ ଦେଖିବାକୁ ମିଳିଥିଲା ।
