ମୁମ୍ବାଇ,୦୧/୧୧: ଭାରତ ଏବଂ ନ୍ୟୁଜିଲ୍ୟାଣ୍ଡ ମଧ୍ୟରେ ଚାଲିଥିବା ତିନି ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜର ତୃତୀୟ ତଥା ଶେଷ ଟେଷ୍ଟ ମୁମ୍ବାଇରେ ଖେଳାଯାଉଛି। ଏହି ମ୍ୟାଚରେ ନ୍ୟୁଜିଲ୍ୟାଣ୍ଡ ଟସ୍ ଜିତି ବ୍ୟାଟିଂ କରିବାକୁ ନିଷ୍ପତ୍ତି ନେଇଥିଲା। ତେବେ ପ୍ରଥମ ପାଳିରେ ଭାରତୀୟ ବୋଲରମାନେ କିଓ୍ବି ଦଳକୁ ୬୫.୪ ଓଭରରେ ୨୩୫ ରନ୍ରେ ଅଟକାଇଥିଲେ। ଏଥିରେ ରବିନ୍ଦ୍ର ଜାଡେଜା ଓ ଓ୍ବାଶିଂଟନ୍ ସୁନ୍ଦର ଧ୍ବସ୍ତବିଧ୍ବସ୍ତ ବୋଲିଂ କରିଥିଲେ।
ପ୍ରଥମେ ବ୍ୟାଟିଂ କରିବାକୁ ଆସିଥିବା ନ୍ୟୁଜିଲ୍ୟାଣ୍ଡର ଆରମ୍ଭ ଖାସ୍ ନଥିଲା। ଚତୁର୍ଥ ଓଭରରେ ଦଳ ୧୫ ରନ୍ ସ୍କୋରରେ ପ୍ରଥମ ଓ୍ବିକେଟ ହରାଇଥିଲା। ଡିଭନ୍ କନୱେ ମା୍ତ୍ର ୪ ରନ୍ କରି ପାଭିଲିୟନକୁ ଫେରିଥିଲେ। ଏହା ପରେ ଦଳ ୧୬ ତମ ଓଭରରେ ୫୯ ରନ୍ ସ୍କୋର କରି ଦ୍ବି୍ତୀୟ ଓ୍ବିକେଟ ହରାଇଥିଲା। ଅଧିନାୟକ ଟମ୍ ଲାଥାମ ୩ ଚୌକା ସାହାଯ୍ୟରେ ୨୮ ରନ୍ କରିବା ପାଭିଲିୟନ ଫେରିଥିଲେ।
୭୨ ରନ୍ରେ ଦଳକୁ ତୃତୀୟ ଝଟକା ଏବଂ ପରେ ୧୫୯ ରନ୍ରେ ଚତୁର୍ଥ ଏବଂ ପଞ୍ଚମ ଝଟକା ଲାଗିଥିଲା। ୧୮୭ ରନ୍ ବେଳକୁ ଦଳ ଛଅଟି ଓ୍ବିକେଟ ହରାଇସାରିଥିଲା। ଏହା ପରେ ଦଳ ୨୧୦ ରନ୍ରେ ସପ୍ତମ ଏବଂ ଅଷ୍ଟମ ୱିକେଟ୍ ହରାଇଥିଲା। ପରେ ୨୩୫ ରନ୍ରେ ସମସ୍ତ ଓ୍ବିକେଟ ହରାଇସାରିଥିଲା। ନ୍ୟୁଜିଲ୍ୟାଣ୍ଡ ପକ୍ଷରୁ ସବୁଠୁ ବଡ ଭାଗିଦାରୀ ଡାରିଲ ମିଚେଲ ଏବଂ ୱିଲ ୟଙ୍ଗଙ୍କ ମଧ୍ୟରେ ହୋଇଥିଲା। ଉଭୟ ୧୫୧ ରନ୍ରେ ୮୭ ରନ୍ ଯୋଡ଼ିଥିଲେ। ଏହା ବ୍ୟତୀତ ଦଳ ପାଇଁ ଅନ୍ୟ କୌଣସି ବ୍ୟାଟର ୫୦ ରନ୍ର ଭାଗିଦାରି ମଧ୍ୟ କରିପାରିନଥିଲେ।
ରବିନ୍ଦ୍ର ଜାଡେଜା ଭାରତ ପକ୍ଷରୁ ସର୍ବାଧିକ ୫ ୱିକେଟ୍ ନେଇଥିବା ବେଳେ ସେ ୨୨ ଓଭରରେ ମାତ୍ର ୬୫ ରନ୍ ଦେଇଥିଲେ। ଏହା ବ୍ୟତୀତ ୱାଶିଂଟନ୍ ସୁନ୍ଦର ତାଙ୍କ ନାଁରେ ୪ ଟି ୱିକେଟ୍ ହାସଲ କରିଥିଲେ। ସୁନ୍ଦର ୧୮.୪ ଓଭରରେ ୮୧ ରନ୍ ଦେଇଥିଲେ। ଅବଶିଷ୍ଟ ଗୋଟିଏ ୱିକେଟ୍ ଆକାଶଦୀପ ନେଇଥିଲେ, ଯିଏ ୫ ଓଭରରେ ୨୨ ରନ୍ ଦେଇଥିଲେ।
