ବେଙ୍ଗାଲୁରୁ,୧୯/୧୦: ଭାରତ ଓ ନ୍ୟୁଜିଲାଣ୍ଡ ମଧ୍ୟରେ ଚାଲିଥିବା ପ୍ରଥମ ଟେଷ୍ଟ ନେଇଛି ନାଟକୀୟ ମୋଡ଼ । ତୃତୀୟ ଦିବସରେ ଭାରତ ଜୋରଦାର ସଂଘର୍ଷ କରି ମ୍ୟାଚ୍କୁ ଫେରିଛି । ନ୍ୟୁଜିଲାଣ୍ଡକୁ(ପ୍ରଥମ ଇନିଂସ) ୪୦୨ରନ୍ରେ ସୀମିତ ରଖିବା ପରେ ଭାରତ ଦ୍ୱିତୀୟ ଇନିଂସରେ ଲଢୁଆ ବ୍ୟାଟିଂ ପ୍ରଦର୍ଶନ କରିଛି । ରୋହିତ ଶର୍ମା, ବିରାଟ କୋହଲି ଓ ସର୍ଫରାଜ ଖାନଙ୍କ ଅର୍ଦ୍ଧଶତକ ବଳରେ ଭାରତ ୩ ୱିକେଟ୍ ହରାଇ ୨୩୧ ରନ୍ ସଂଗ୍ରହ କରିବା ସତ୍ତେ୍ୱ ଆଉ ୧୨୫ ରନ୍ ପଛରେ ରହିଛି । ତୃତୀୟ ଦିବସ ଶେଷ ସୁଦ୍ଧା ମ୍ୟାଚ୍ ନ୍ୟୁଜିଲାଣ୍ଡ ନିୟନ୍ତ୍ରଣରେ ରହିଥିଲେ ହେଁ ଭାରତ ବାଜି ପଲଟାଇବାର ଯଥେଷ୍ଟ ସମ୍ଭାବନା ରହିଛି ।
ମ୍ୟାଚ୍ର ଚତୁର୍ଥ ଦିବସ ହିଁ ଭାରତର ଭାଗ୍ୟ ନିର୍ଦ୍ଧାରଣ କରିବ । କାରଣ ପଞ୍ଚମ ଦିବସରେ ୧୫୦ ରନ୍ ସଂଗ୍ରହ କରିବା ମଧ୍ୟ କଷ୍ଟକର ହୋଇପାରେ । ଭାରତ ଆସନ୍ତା କାଲି ୧୫୦ରୁ ୨୦୦ ରନ୍ ଅଗ୍ରଣୀ ହାସଲ କରିପାରିଲେ ବିଜୟ ଆଶା ଦ୍ୱିଗୁଣା ହେବ । ତୃତୀୟ ଦିବସ ଷ୍ଟମ୍ପ ଅପସାରଣ ସୁଦ୍ଧା ସର୍ଫରାଜ ଖାନ୍ ୭୦(୮ଚୌକା, ୩ଛକା) ରନ୍ କରି ଅପରାଜିତ ରହିଛନ୍ତି । ଆଗକୁ ରିଷଭ ପନ୍ତ, କେ ଏଲ ରାହୁଲ, ରବିନ୍ଦ୍ର ଜାଡେଜା ଓ ରବି ଚନ୍ଦ୍ରନ ଅଶ୍ୱିନ ବ୍ୟାଟିଂ କରିବାକୁ ଓହ୍ଲାଇବେ । ତେଣୁ ପ୍ରତି ୱିକେଟ୍ରେ ଉପଯୋଗୀ ଭାଗିଦାରୀ ଗଠନ ହେଲେ ଭାରତ ଅଗ୍ରଣୀ ହାସଲ କରିପାରିବ ।
ତୃତୀୟ ଦିବସରେ ଭାରତ ସବୁ ବିଭାଗରେ ଜବରଦସ୍ତ ପ୍ରଦର୍ଶନ କରିଥିଲା । ନ୍ୟୁଜିଲାଣ୍ଡର ପ୍ରଥମ ଇନିଂସକୁ ଯଥା ସମ୍ଭବ ସହଳ ଶେଷ କରିବାର ଲକ୍ଷ୍ୟ ନେଇ ଭାରତ ଶୃଙ୍ଖଳିତ ବୋଲିଂ କରିଥିଲା । ମାତ୍ର ବାଜି ମାରି ନେଇଥିଲେ ରଚିନ ରବିନ୍ଦ୍ର । ସେ ଶତକୀୟ ପାଳି ଖେଳିଥିଲେ ଓ ଟିମ ସାଉଦିଙ୍କୁ ସାଥୀ କରି ଅଷ୍ଟମ ୱିକେଟ୍ରେ ୧୩୭ ରନ୍ର ଭାଗିଦାରୀ ଗଠନ କରିବା ଫଳରେ ଦଳୀୟ ସ୍କୋର ୪୦୨ ରନ୍ରେ ପହଞ୍ଚି ଯାଇଥିଲା । ସାଉଦି ମଧ୍ୟ ୬୫ ରନ୍ର ଦାୟିତ୍ୱପୂର୍ଣ୍ଣ ଇନିଂସ ଖେଳିଥିଲେ ।
ନ୍ୟୁଜିଲାଣ୍ଡ ଅସମାପ୍ତ ପ୍ରଥମ ଇନିଂସ ୩/୧୮୦ ରନ୍ରୁ ବ୍ୟାଟିଂ ଆରମ୍ଭ କରିଥିଲା । ପୂର୍ବ ଦିନରୁ ଅପରାଜିତ ଥିବା ରବିନ୍ଦ୍ର ଓ ଡାରିଲ ମିଚେଲ ୧୩ ରନ୍ ଯୋଗ କରିବା ପରେ ଚତୁର୍ଥ ୱିକେଟ୍ର ପତନ ଘଟିଥିଲା । ମିଚେଲ ୧୮ ରନ୍ କରି ଆଉଟ୍ ହୋଇଥିଲେ । ଏହାପରେ ଟମ ବ୍ଲଣ୍ଡେଲ ୫, ଗ୍ଲେନ ଫିଲିପ୍ସ ୧୪ ଓ ମାଟ ହେନରୀ ୮ରନ କରି ପାଭିଲିୟନ ଫେରିଥିଲେ । ୨୩୩ ରନ୍ରେ ୩ଟି ୱିକେ୍ଟର ପତନ ଘଟିବା ପରେ ଭାରତର ଆଶା ବଢିଯାଇଥିଲା । ମାତ୍ର ରବିନ୍ଦ୍ର ଓ ସାଉଦି ଆକ୍ରମଣାତ୍ମକ ସଟ୍ମାନ ଖେଳି ପରବର୍ତ୍ତୀ ୨୦ ଓଭରରେ ୧୩୭ ରନ୍ ଯୋଗ କରି ଭାରତକୁ ନିରାଶ କରିଥିଲେ । ଦଳୀୟ ସ୍କୋର ୩୭୦ବେଳେ ସାଉଦିଙ୍କ ୱିକେଟ୍ର ପତନ ଘଟିଥିଲା । ତଥାପି ରବିନ୍ଦ୍ର ଶେଷ ଦୁଇ ବ୍ୟାଟର ଅଜାଜ ପଟେଲ(୪) ଓ ୱିଲ ଓ’ରୁର୍କଙ୍କୁ ସାଥୀ କରି ଦଳୀୟ ସ୍କୋରକୁ ୪୦୨ରେ ପହଞ୍ଚାଇ ଦେଇଥିଲେ ।
ସେ ୧୩ଚୌକା ଓ ୪ଛକା ବଳରେ ୧୩୪ ରନ୍ କରି ଆଉଟ୍ ହୋଇଥିଲେ । ଭାରତ ପକ୍ଷରୁ କୁଲଦୀପ ଓ ଜାଡେଜା ୩ଟି ଲେଖାଏଁ ୱିକେଟ୍ ନେଇଥିଲେ । ୩୫୬ ରନ୍ରେ ପ୍ରଥମ ଇନିଂସ ପଛୁଆ ଥାଇ ଭାରତ ଦ୍ୱିତୀୟ ଇନିଂସ ବ୍ୟାଟିଂ ଆରମ୍ଭ କରିଥିଲା । ଯଶସ୍ୱୀ ଜୈସ୍ୱାଲ୍ ଓ ରୋହିତ ଶର୍ମା ଆକ୍ରମଣାତ୍ମକ ବ୍ୟାଟିଂ କରି ୭୨ ରନ୍ର ଭାଗିଦାରୀ ଗଠନ କରିଥିଲେ । ଜୈସ୍ୱାଲ ବ୍ୟକ୍ତିଗତ ୩୫ ରନ କରି ପ୍ରଥମେ ଆଉଟ୍ ହୋଇଥିଲେ । ରୋହିତ ୮ଚୌକା ଓ ୧ଛକା ବଳରେ ୫୨ ରନ ସଂଗ୍ରହ କରିବା ପରେ ଅଜାଜ ପଟେଲଙ୍କ ଦ୍ୱିତୀୟ ଶିକାର ସାଜିଥିଲେ । ୯୫ ରନ୍ରେ ଦଳ ୨ଓପନରଙ୍କୁ ହରାଇଥିଲା ।
କୋହଲି ଓ ସର୍ଫରାଜ ଏଥର ଲଢୁଆ ବ୍ୟାଟିଂ କରି ସ୍ଥିତି ସୁଧାରିଥିଲେ । ଉଭୟ ଦର୍ଶନୀୟ ସଟ୍ମାନ ଖେଳି ନ୍ୟୁଜିଲାଣ୍ଡ ବୋଲରଙ୍କ ଲୟ ବିଗାଡ଼ି ଦେଇଥିଲେ । ତୃତୀୟ ୱିକେଟ୍ରେ ୧୩୬ରନ୍ ସଂଗୃହୀତ ହୋଇଥିଲା । ଦଳୀୟ ସ୍କୋର ୨୩୧ରେ ପହଞ୍ଚି ସାରିଥିଲା । ଗ୍ଲେନ ଫିଲିପ୍ସ ଅନ୍ତିମ ଓଭରରେ କୋହଲିଙ୍କୁ ଆଉଟ୍ କରି ମ୍ୟାଚ୍ର ରୋମାଞ୍ଚ ବଢାଇ ଦେଇଥିଲେ । ସେ ୮ଚୌକା ଓ ୧ଛକା ବଳରେ ୭୦ ରନ୍ କରି ଆଉଟ୍ ହୋଇଥିଲେ ।
