ପୋର୍ଟ ଏଲିଜାବେଥ,୧୦/୧୧: ଘରୋଇ ଦକ୍ଷିଣ ଆଫ୍ରିକା ଓ ଭାରତ ମଧ୍ୟରେ ରବିବାର ଖେଳାଯିବ ଦ୍ୱିତୀୟ ଟି-ଟ୍ୱେଣ୍ଟି । ୬୧ ରନ୍ରେ ପ୍ରଥମ ମ୍ୟାଚ୍ ଜିତିବା ପରେ ଭାରତର ନଜର ଏବେ ଟ୍ରଫି ଉପରେ । ଡର୍ବାନ ଭଳି ସେଣ୍ଟ ଜର୍ଜ ପାର୍କ ଗ୍ରାଉଣ୍ଡ୍ରେ ଆଧିପତ୍ୟ ଜାରି ରଖି ଆଉ ଏକ ବିଜୟ ପାଇଁ ଭାରତ ପ୍ରସ୍ତୁତ । ଘରୋଇ ଦଳ ମଧ୍ୟ ସିରିଜକୁ ଫେରିବା ପାଇଁ ବ୍ୟାକୁଳ । ଫଳରେ ରବିବାର ଏକ ସଂଘର୍ଷପୂର୍ଣ୍ଣ ମୁକାବିଲା ଦେଖିବାକୁ ମିଳିବ ।
ଡର୍ବାନରେ ସଞ୍ଜୁ ସାମସନ ଓ ସ୍ପିନରମାନେ ଭାରତକୁ ଏକତରଫା ଭାବେ ବିଜୟୀ କରାଇଥିଲେ ।ରବିବାର ମଧ୍ୟ ଦର୍ଶକଙ୍କ ନଜର ସଞ୍ଜୁଙ୍କ ଉପରେ ରହିବ । ଅନ୍ୟ ବ୍ୟାଟରମାନେ ମଧ୍ୟ ବିଧ୍ୱଂସୀ ବ୍ୟାଟିଂ କରିବାକୁ ପ୍ରସ୍ତୁତ ରହିଛନ୍ତି । ମାତ୍ର ଏଥର ଘରୋଇ ଦଳକୁ ହରାଇବା ସହଜ ହେବ ନାହିଁ । ପିଚ୍ରେ ଘାସ ରହିଛି । ଫଳରେ ପେସ ବୋଲରମାନେ ଆରମ୍ଭରୁ ବଲ୍କୁ ସୁଇଂ କରାଇବେ । ଦକ୍ଷିଣ ଆଫ୍ରିକା ଦଳରେ ଦକ୍ଷ ପେସ୍ ବୋଲର ରହିଛନ୍ତି ।
ଭାରତକୁ ହରାଇବାର ଯଥେଷ୍ଟ କ୍ଷମତା ଦକ୍ଷିଣ ଆଫ୍ରିକା ନିକଟରେ ରହିଛି । ବିଶେଷ କରି ଡେଭିଡ୍ ମିଲର, ହେନରିକ କ୍ଲାସେନ ଓ ଆଡେନ ମାରକ୍ରମଙ୍କ ଭଳି ଦୁର୍ଦ୍ଧର୍ଷ ବ୍ୟାଟର ଯେକୌଣସି ବୋଲିଂ ବିଭାଗକୁ ଧ୍ୱଂସ କରିପାରିବେ । ଅବଶ୍ୟ ପ୍ରଥମ ମ୍ୟାଚ୍ରେ ଭାରତୀୟ ସ୍ପିନରମାନେ ମିଲର ଓ କ୍ଲାସେନଙ୍କୁ ସହଳ ପାଭିଲିୟନ ପଠାଇବାରେ ସଫଳ ହୋଇଥିଲେ ।
ଆଜିର ମ୍ୟାଚ୍ରେ ଭାରତ ଏକାଦଶରେ ପରିବର୍ତ୍ତନ କରିବା ସମ୍ଭାବନା ନାହିଁ । ଘରୋଇ ଦଳ ସାମାନ୍ୟ ପରିବର୍ତ୍ତନ କରିପାରେ । ଫର୍ମରେ ରହିଥିବା ରିଜା ହେଣ୍ଡରିକ୍ସ ଏକାଦଶକୁ ଫେରିପାରନ୍ତି ।
ବ୍ୟାଟିଂ ପାଇଁ ଅନୁକୂଳ ପିଚ୍: ସେଣ୍ଟ ଜର୍ଜ ପାର୍କର ପିଚ୍ ପେସ୍ ବୋଲରଙ୍କୁ ବେଶ ସହାୟତା ପ୍ରଦାନ କରିବ । ତଥାପି ବ୍ୟାଟରମାନେ ପିଚ୍ର ଭରପୁର ଫାଇଦା ଉଠାଇ ପାରିବେ । ଡର୍ବାନ ଭଳି ମଧ୍ୟ ବିଶାଳ ସ୍କୋର ସଂଗୃହୀତ ହେବାର ଯଥେଷ୍ଟ ସମ୍ଭାବନା ରହିଛି । ମାତ୍ର ଟସ ବିଜୟୀ ଦଳ ଫିଲ୍ଡିଂ ନିଷ୍ପତ୍ତି ନେବା ଏକ ପ୍ରକାର ନିଶ୍ଚିତ ।
ସମ୍ଭାବ୍ୟ ଦଳ
ଦକ୍ଷିଣ ଆଫ୍ରିକା: ରିଜା ହେଣ୍ଡରିକ୍ସ, ର୍ୟାନ ରିକେଲଟନ, ଆଡେନ ମାରକ୍ରମ (ଅଧିନାୟକ), ଟ୍ରିଷ୍ଟନ ଷ୍ଟବ୍ସ, ହେନରିକ କ୍ଲାସେନ, ଡେଭିଡ୍ ମିଲର, ମାର୍କୋ ଜାନସେନ/ଗେରାଲ୍ଡ କୋଏଜି, ଆଣ୍ଡିଲ ସିମେଲେନ, ନକାବ୍ୟୋମଜି ପିଟର, କେଶବ ମହାରାଜ, ଓଟିନେଲ ବାର୍ଟନେଲ।
ଭାରତ: ସଞ୍ଜୁ ସାମସନ, ଅଭିଷେକ ଶର୍ମା, ସୂର୍ଯ୍ୟକୁମାର ଯାଦବ (ଅଧିନାୟକ), ତିଳକ ବର୍ମା, ହାର୍ଦ୍ଦିକ ପାଣ୍ଡ୍ୟା, ରିଙ୍କୁ ସିଂହ, ରମଣଦୀପ ସିଂହ, ଅକ୍ଷର ପଟେଲ, ଅଭେଶ ଖାନ, ଅର୍ଶଦୀପ ସିଂହ, ବରୁଣ ଚକ୍ରବର୍ତ୍ତୀ ।
