ନୂଆଦିଲ୍ଲୀ/ଶ୍ରୀନଗର: ଗତ ବର୍ଷ ଜମ୍ମୁ-କାଶ୍ମୀରର ପହଲଗାମରେ ଘଟିଥିବା ସେହି କାପୁରୁଷୋଚିତ ଆତଙ୍କବାଦୀ ଆକ୍ରମଣକୁ ଆଜି ଏକ ବର୍ଷ ପୂରିଛି । ଏହି ଦୁଃଖଦ ଶ୍ରାଦ୍ଧ ବାର୍ଷିକୀ ଅବସରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଆକ୍ରମଣର ଶିକାର ହୋଇଥିବା ନିର୍ଦ୍ଦୋଷ ନାଗରିକ ଓ ସହୀଦ ସୈନିକମାନଙ୍କୁ ଗଭୀର ଶ୍ରଦ୍ଧାଞ୍ଜଳି ଅର୍ପଣ କରିଛନ୍ତି । ଏଥିସହିତ ସେ ସ୍ପଷ୍ଟ କରିଛନ୍ତି ଯେ, ଶତ୍ରୁର କୌଣସି ବି ଘୃଣ୍ୟ ଯୋଜନା ଭାରତର ସଂକଳ୍ପକୁ ଦୋହଲାଇ ପାରିବ ନାହିଁ ।
ସହୀଦଙ୍କ ବଳିଦାନକୁ ଭୁଲିବନି ଦେଶ:
ପ୍ରଧାନମନ୍ତ୍ରୀ ନିଜ ବାର୍ତ୍ତାରେ ଉଲ୍ଲେଖ କରିଛନ୍ତି ଯେ, ପହଲଗାମ ଆକ୍ରମଣ ଦେଶର ବିବେକ ଉପରେ ଏକ ଗଭୀର ଆଘାତ ଥିଲା । ସେ ଲେଖିଛନ୍ତି, "ଗତ ବର୍ଷ ଏହି ଦିନରେ ପହଲଗାମରେ ହୋଇଥିବା ଭୟଙ୍କର ଆତଙ୍କବାଦୀ ଆକ୍ରମଣରେ ପ୍ରାଣ ହରାଇଥିବା ନିର୍ଦ୍ଦୋଷ ଲୋକଙ୍କୁ ମନେ ପକାଉଛି । ସେମାନଙ୍କ ବଳିଦାନକୁ ଦେଶ କେବେ ବି ଭୁଲିବ ନାହିଁ । ଏହି ଅପୂରଣୀୟ କ୍ଷତି ସହୁଥିବା ଶୋକସନ୍ତପ୍ତ ପରିବାରବର୍ଗଙ୍କ ସହ ମୋର ସମବେଦନା ରହିଛି ।" ପ୍ରଧାନମନ୍ତ୍ରୀ ମୋଦି ଆତଙ୍କବାଦ ବିରୋଧରେ ଭାରତର ଜିରୋ ଟଲେରାନ୍ସ ବା ଶୂନ୍ୟ ସହନଶୀଳତା ନୀତିକୁ ଦୋହରାଇଛନ୍ତି । ସେ କହିଛନ୍ତି ଯେ, ଏକ ରାଷ୍ଟ୍ର ଭାବରେ ଆଜି ସମଗ୍ର ଭାରତ ଏକଜୁଟ୍। ଭାରତ କେବେ ବି ଆତଙ୍କବାଦ ଆଗରେ ମୁଣ୍ଡ ନୁଆଁଇବ ନାହିଁ । ଆତଙ୍କବାଦୀଙ୍କ କୌଣସି ବି ଷଡ଼ଯନ୍ତ୍ର ସଫଳ ହେବାକୁ ଦିଆଯିବ ନାହିଁ ବୋଲି ସେ ଦୃଢ଼ ଚେତାବନୀ ଦେଇଛନ୍ତି ।
ସୂଚନାଯୋଗ୍ୟ ଯେ, ୨୦୨୫ ମସିହା ଏପ୍ରିଲ୍ ୨୨ ତାରିଖରେ ପହଲଗାମରେ ଆତଙ୍କବାଦୀମାନେ ଏକ ଭୟଙ୍କର ଆକ୍ରମଣ କରିଥିଲେ । ଏହି ଘଟଣାରେ ଅନେକ ନୀରିହ ପର୍ଯ୍ୟଟକ ଓ ସାଧାରଣ ନାଗରିକ ନିଜର ପ୍ରାଣ ହରାଇଥିଲେ । ଏହି ଘଟଣା ପରେ ସୁରକ୍ଷା ବାହିନୀ ପକ୍ଷରୁ ସମଗ୍ର ଉପତ୍ୟକାରେ ବ୍ୟାପକ ସର୍ଚ୍ଚ ଅପରେସନ କରାଯାଇ ଆତଙ୍କବାଦ ବିରୋଧୀ ଅଭିଯାନକୁ ଜୋରଦାର କରାଯାଇଥିଲା ।
ସୁରକ୍ଷା ବ୍ୟବସ୍ଥା କଡ଼ାକଡ଼ି ଓ ସ୍ମାରକ ସେବା:
ପ୍ରଥମ ଶ୍ରାଦ୍ଧ ବାର୍ଷିକୀକୁ ଦୃଷ୍ଟିରେ ରଖି ବୈସାରନ ଘାଟି ସମେତ ସମଗ୍ର ପହଲଗାମ ଅଞ୍ଚଳରେ ହାଇ-ଆଲର୍ଟ ଜାରି କରାଯାଇଛି । ସୁରକ୍ଷା ବାହିନୀ ପ୍ରତ୍ୟେକ ପ୍ରବେଶ ପଥରେ ଯାଞ୍ଚ ପ୍ରକ୍ରିୟାକୁ କଠୋର କରିଛନ୍ତି । ମଙ୍ଗଳବାର ବରିଷ୍ଠ ପୁଲିସ ଅଧିକାରୀମାନେ ବିଭିନ୍ନ ସମ୍ବେଦନଶୀଳ ଅଞ୍ଚଳ ବୁଲି ସୁରକ୍ଷା ବ୍ୟବସ୍ଥାର ତଦାରଖ କରିଥିଲେ । ଲିଡର ନଦୀ କୂଳରେ ସମସ୍ତ ମୃତକଙ୍କ ସ୍ମୃତିରେ ଏକ କଳା ମାର୍ବଲ ସ୍ମାରକୀ ନିର୍ମାଣ କରାଯାଇଛି । ବୁଧବାର ସ୍ଥାନୀୟ ପ୍ରଶାସନ ପକ୍ଷରୁ ଏଠାରେ ଏକ ସ୍ୱତନ୍ତ୍ର ସ୍ମାରକ ସଭାର ଆୟୋଜନ କରାଯାଇଥିଲା, ଯେଉଁଠାରେ ଶହ ଶହ ଶ୍ରଦ୍ଧାଳୁ ଓ ପର୍ଯ୍ୟଟକ ସେହି ଅମର ଆତ୍ମାଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରିଥିଲେ ।
ଆହୁରି ପଢ଼ନ୍ତୁ... Heat wave: ଭୟଙ୍କର ହେଲାଣି ତାତି... ସଙ୍କଟରେ ଦେଢ଼ କୋଟି ଶ୍ରମିକଙ୍କ ଜୀବିକା, ପ୍ରଭାବିତ ହୋଇପାରେ କୃଷି ଉତ୍ପାଦନ
