ନୂଆଦିଲ୍ଲୀ: ଭାରତୀୟ ସେନା ବୁଧବାର ଦିନ ଲଦାଖ ସେକ୍ଟରରେ ୧୫,୦୦୦ ଫୁଟରୁ ଅଧିକ ଉଚ୍ଚତାରେ ସ୍ୱଦେଶୀ ଭାବେ ବିକଶିତ 'ଆକାଶ ପ୍ରାଇମ' ବାୟୁ ପ୍ରତିରକ୍ଷା ପ୍ରଣାଳୀର ଏକ ଉଚ୍ଚ-ଉଚ୍ଚତା ପରୀକ୍ଷଣ ସଫଳତାର ସହ ସମ୍ପନ୍ନ କରିଛି। ଏହି ପରୀକ୍ଷଣ ଭାରତୀୟ ସେନାର ବାୟୁ ପ୍ରତିରକ୍ଷା ଏକକ ଏବଂ ଡିଫେନ୍ସ ରିସର୍ଚ ଆଣ୍ଡ ଡେଭେଲପମେଣ୍ଟ ଅର୍ଗାନାଇଜେସନ (ଡିଆରଡିଓ) ର ବରିଷ୍ଠ ଅଧିକାରୀମାନଙ୍କ ଉପସ୍ଥିତିରେ କରାଯାଇଥିଲା।
ଏହି ପରୀକ୍ଷଣ ସମୟରେ, ଆକାଶ ପ୍ରାଇମ ସିଷ୍ଟମ ଉଚ୍ଚ-ଗତିରେ ଗତି କରୁଥିବା ଦୁଇଟି ଲକ୍ଷ୍ୟକୁ ସଫଳତାର ସହ ଧ୍ୱଂସ କରିଥିଲା। ଯାହା ହିମାଳୟ ଅଞ୍ଚଳର ଦୁର୍ଗମ ପାଗ ଏବଂ ପତଳା ବାୟୁ ପରିବେଶରେ ଏହାର କାର୍ଯ୍ୟକ୍ଷମତାକୁ ପ୍ରମାଣ କରିଛି। ଏହି ସଫଳତା ଭାରତର ବାୟୁ ପ୍ରତିରକ୍ଷା କ୍ଷମତାକୁ ନେଇ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ବୋଲି ବିବେଚନା କରାଯାଉଛି।
ଆକାଶ ପ୍ରାଇମ ସିଷ୍ଟମ ଭାରତୀୟ ସେନାର ତୃତୀୟ ଏବଂ ଚତୁର୍ଥ ଆକାଶ ରେଜିମେଣ୍ଟରେ ନିୟୋଜିତ ହେବ। ଯାହା ଦେଶର ସାମଗ୍ରିକ ବାୟୁ ପ୍ରତିରକ୍ଷା ଢାଲକୁ ଆହୁରି ଅଧିକ ଶକ୍ତିଶାଳୀ କରିବ। ଏହା ପୂର୍ବରୁ ମେ ୨୦୨୫ରେ ଅପରେସନ ସିନ୍ଦୁର ସମୟରେ ଏହି ପ୍ରତିରକ୍ଷା ବ୍ୟବସ୍ଥା ପାକିସ୍ତାନର ଚୀନ ନିର୍ମିତ ଯୁଦ୍ଧ ବିମାନ ଏବଂ ତୁର୍କୀ ନିର୍ମିତ ଡ୍ରୋନଗୁଡ଼ିକର ଆକ୍ରମଣକୁ ସଫଳତାର ସହ ରୋକିଥିଲା। ଯାହା ଏହାର ରଣନୀତିକ ଗୁରୁତ୍ୱକୁ ପ୍ରମାଣିତ କରିଥିଲା।
ଆକାଶ ପ୍ରାଇମ ହେଉଛି ମୂଳ ଆକାଶ ମିସାଇଲ ସିଷ୍ଟମର ଏକ ଉନ୍ନତ ସଂସ୍କରଣ। ଯାହା ଉଚ୍ଚ-ଉଚ୍ଚତା ଏବଂ ନିମ୍ନ-ତାପମାତ୍ରା ପରିବେଶରେ କାର୍ଯ୍ୟ କରିବା ପାଇଁ ଡିଜାଇନ କରାଯାଇଛି। ଏହାରେ ଏକ ସ୍ୱଦେଶୀ ଆକ୍ଟିଭ ରେଡିଓ ଫ୍ରିକ୍ୱେନ୍ସି (ଆରଏଫ) ସିକର ଅଛି। ଯାହା ଏହାର ସଠିକତାକୁ ବୃଦ୍ଧି କରିଛି। ଏହା ବ୍ୟତୀତ, ଏହାର ମୋଡିଫାଏଡ ଗ୍ରାଉଣ୍ଡ ସିଷ୍ଟମ ମଧ୍ୟ ଉନ୍ନତ କରାଯାଇଛି। ଯାହା ଏହାକୁ ଭାରତୀୟ ସେନା ଏବଂ ବାୟୁସେନା ପାଇଁ ଅଧିକ ନିର୍ଭରଯୋଗ୍ୟ କରିଛି।
ଏହି ସଫଳ ପରୀକ୍ଷଣ ଭାରତର 'ଆତ୍ମନିର୍ଭର ଭାରତ' ଅଭିଯାନ ଅଧୀନରେ ସ୍ୱଦେଶୀ ପ୍ରତିରକ୍ଷା ଉତ୍ପାଦନରେ ଏକ ମହତ୍ୱପୂର୍ଣ୍ଣ ଅଗ୍ରଗତି ଭାବେ ପରିଗମିତ ହେଉଛି। ବିଶେଷଜ୍ଞମାନେ ମତ ଦେଇଛନ୍ତି ଯେ ଲଦାଖ ପରି ଉଚ୍ଚ-ଉଚ୍ଚତା ଅଞ୍ଚଳରେ ଆକାଶ ପ୍ରାଇମର ମୁତୟନ ଚୀନ ସହିତ ଲାଇନ ଅଫ ଆକ୍ଚୁଆଲ କଣ୍ଟ୍ରୋଲ (ଏଲଏସି) ଏବଂ ପାକିସ୍ତାନ ସହିତ ଲାଇନ ଅଫ କଣ୍ଟ୍ରୋଲ (ଏଲଓସି) ପରି ଅସ୍ଥିର ଅଞ୍ଚଳରେ ବାୟୁ ଆକ୍ରମଣରୁ ରକ୍ଷା କରିବାରେ ଭାରତର କ୍ଷମତାକୁ ନିଶ୍ଚିତ ଭାବେ ବୃଦ୍ଧି କରିବ।
