ସିଡ୍ନି,୦୯/୦୩: ଅଷ୍ଟ୍ରେଲିଆର ସିଡ୍ନିରେ ଦକ୍ଷିଣ କୋରିଆର ୫ ଜଣ ମହିଳାଙ୍କୁ ଦୁଷ୍କର୍ମ ମାମଲାରେ ଜଣେ ଭାରତୀୟ ନାଗରିକଙ୍କୁ ୪୦ ବର୍ଷ ଜେଲ ଦଣ୍ଡାଦେଶ ହୋଇଛି । ୩୦ ବର୍ଷ ପର୍ଯ୍ୟନ୍ତ ତାକୁ ପାରୋଲ ମିଳିବ ନାହିଁ । ଅଭିଯୁକ୍ତର ନାମ ବଲେଶ ଧନଖଡ଼ (୪୩) । ଶୁକ୍ରବାର ଡାଉନିଂ ସେଣ୍ଟର ଜିଲ୍ଲା ଅଦାଲତ ତାକୁ ଜେଲ ଦଣ୍ଡାଦେଶ ଦେଇଛନ୍ତି ।
ଅଭିଯୋଗ ମୁତାବକ, ପୂର୍ବତନ ଆଇଟି କନ୍ସଲଟାଣ୍ଟ ବଲେଶ ମିଥ୍ୟା ଚାକିରି ବିଜ୍ଞାପନ ଦେଇ ପୀଡ଼ିତାଙ୍କୁ ଫସାଇଥିଲା । ଦକ୍ଷିଣ କୋରିଆର ୫ ଜଣ ପୀଡ଼ିତା ତା’ ଜାଲରେ ଫସିବା ପରେ ସେମାନଙ୍କୁ ନିଶା ଦେଇ ଦୁଷ୍କର୍ମ କରିଥିଲା । ପୀଡ଼ିତା ମହିଳାଙ୍କ ବୟସ ୨୧ରୁ ୨୭ ବର୍ଷ ମଧ୍ୟରେ ହେବ । ଅଭିଯୁକ୍ତ ସେମାନଙ୍କୁ ନିଜ ସିଡ୍ନିସ୍ଥିତ ଘରେ ଓ ଘର ନିକଟରେ ଦୁଷ୍କର୍ମ କରିଥିଲା । ଜିଲ୍ଲା ଅଦାଲତ ଦଣ୍ଡାଦେଶ ଦେବା ପୂର୍ବରୁ ବଲେଶର କାର୍ଯ୍ୟକୁ ଗଭୀର ନିନ୍ଦା କରିଥିଲେ ।
ବିଚାରପତି ମାଇକେଲ କିଙ୍ଗ୍ କହିଥିଲେ, ଏହି ହରକତ ପୂର୍ବ ନିୟୋଜିତ, ସୁନିୟୋଜିତ, ଚାଲାକିପୂର୍ଣ୍ଣ ଓ ଅତ୍ୟଧିକ ହିଂସାପୂର୍ଣ୍ଣ । ଅପରାଧୀ ଯୌନ ସନ୍ତୁଷ୍ଟି ପାଇଁ ପୀଡ଼ିତାଙ୍କୁ ମିଥ୍ୟା ପ୍ରଲୋଭନ ଦେଖାଇଥିଲା । ତଦନ୍ତରୁ ଜଣାପଡ଼ିଛି ଯେ ବଲେଶ ଭିନ୍ନ ଭିନ୍ନ ସମୟରେ ଦକ୍ଷିଣ କୋରିଆର ୫ ମହିଳାଙ୍କୁ ବଳାତ୍କାର କରିଥିଲା । ତେବେ ୨୦୧୮ ଅକ୍ଟୋବରରେ ପଞ୍ଚମ ମହିଳାଙ୍କୁ ବଳାତ୍କାର କରିବା ପରେ ଘଟଣା ଲୋକଲୋଚନକୁ ଆସିଥିଲା । ପୁଲିସ ତା’ର ସିଡ୍ନିସ୍ଥିତ ବ୍ୟବସାୟିକ ଶାଖାକୁ ଯାଇ ଏକ କ୍ଲକ୍ ରେଡିଓରେ ଭିଡିଓ ରେକର୍ଡର ଲଗାଇଥିଲା। ଏଥିରୁ ତା’ର କାରନାମା ପଦାକୁ ଆସିଥିଲା । ସେ ଏବିସି, ବ୍ରିଟିଶ ଆମେରିକାନ୍ ଟବାକୋ, ଟୟୋଟା ଓ ସିଡ୍ନି ଟ୍ରେନ୍ସ ଭଳି ପ୍ରମୁଖ କର୍ପୋରେଟ୍ ସଂସ୍ଥାରେ ଡାଟା କନସଲଟାଣ୍ଟ ଭାବେ କାର୍ଯ୍ୟ କରୁଥିଲା ।
୨୦୦୬ରେ ସେ ଜଣେ ଛାତ୍ର ଭାବେ ଅଷ୍ଟ୍ରେଲିଆ ଆସିଥିଲା । ଭଲ କ୍ୟାରିୟର ମିଳିବା ପରେ ସେ ଅପରାଧ ଘଟାଇବା ଆରମ୍ଭ କରିଥିଲା । ବଲେଶ ନାମରେ ଅନେକ ମାମଲା ରହିଛି । ସେ ମୋଟ ୩୯ ଅପରାଧରେ ସମ୍ପୃକ୍ତ । ୧୩ଟି ଦୁଷ୍କର୍ମ ମାମଲା ତା’ ନାମରେ ରହିଛି । ବଲେଶକୁ ଏବେ ୪୩ ବର୍ଷ । ୪୦ ବର୍ଷ ଜେଲରେ ରହି ବାହାରିବା ପରେ ତାକୁ ୮୩ ବର୍ଷ ହୋଇଥିବ ।
