ମୁମ୍ବାଇ, ୩୧/୦୩: ଆଇପିଏଲ୍ର ୧୨ତମ ଲିଗ୍ ମ୍ୟାଚ୍ରେ ଆଜି ମୁମ୍ବାଇ ଇଣ୍ଡିଆନ୍ସ ଓ ଡିଫେଣ୍ଡିଂ ଚାମ୍ପିଅନ୍ କୋଲକାତା ନାଇଟ୍ ରାଇଡର୍ସ ସାମ୍ନାସାମ୍ନି ହେବେ । ମୁମ୍ବାଇ ଇଣ୍ଡିଆନ୍ସ ଘରୋଇ ଗ୍ରାଉଣ୍ଡ୍ ୱାଙ୍ଖଡ଼େ ଷ୍ଟାଡିୟମରେ ପ୍ରଥମ ମ୍ୟାଚ୍ ଖେଳିବାକୁ ଯାଉଛି । କ୍ରମାନ୍ୱୟରେ ୨ଟି ମ୍ୟାଚ୍ ପରାଜିତ ହୋଇ ସାରିଥିବା ପାଣ୍ଡ୍ୟା ବାହିନୀ ଆଜି ପଏଣ୍ଟ ଖାତା ଖୋଲିବାକୁ ଲକ୍ଷ୍ୟ ରଖିଛି । ଅନ୍ୟପଟରେ ନାଇଟ୍ ରାଇଡର୍ସ କଡ଼ା ଟକ୍କର ଦେବାକୁ ପ୍ରସ୍ତୁତ । ଫଳରେ ଉଭୟ ଦଳ ମଧ୍ୟରେ ଏକ ସଂଘର୍ଷପୂର୍ଣ୍ଣ ମୁକାବିଲା ଦେଖିବାକୁ ମିଳିବ ।
ମୁମ୍ବାଇ ଇଣ୍ଡିଆନ୍ସ ପ୍ରଥମ ୨ଟି ମ୍ୟାଚ୍ରେ ଯଥାକ୍ରମେ ଚେନ୍ନାଇ ସୁପରକିଙ୍ଗ୍ସ ଏବଂ ଗୁଜରାଟ ଟାଇଟନ୍ସଠୁ ପରାଜିତ ହୋଇଥିଲା । ଆଜି ଦଳ ଘରୋଇ ଗ୍ରାଉଣ୍ଡ୍ରେ ବିଜୟ ଖାତା ଖୋଲିବ ବୋଲି ଆଶା କରାଯାଉଛି । ଗତ ସିଜନରେ ରୋହିତ ଶର୍ମାଙ୍କୁ ବାଦ୍ ଦେଇ ହାର୍ଦ୍ଦିକ ପାଣ୍ଡ୍ୟାଙ୍କୁ ନେତୃତ୍ୱ ଦାୟିତ୍ୱ ପ୍ରଦାନ କରାଯାଇଥିଲା । ଦର୍ଶକମାନେ ଏହାକୁ ସହଜରେ ଗ୍ରହଣ କରିପାରି ନଥିଲେ ଏବଂ ପାଣ୍ଡ୍ୟାଙ୍କୁ ସବୁ ଗ୍ରାଉଣ୍ଡରେ କଡ଼ା ସମାଲୋଚନା କରିଥିଲେ । ଏବେ ସମୟ ବଦଳିଛି । ଗତ ଗୁଜରାଟ ଟାଇଟନ୍ସ ବିପକ୍ଷ ମ୍ୟାଚ୍ରେ ମୁମ୍ବାଇ ଇଣ୍ଡିଆନ୍ସ ସମର୍ଥକ ପାଣ୍ଡ୍ୟାଙ୍କୁ ଉତ୍ସାହିତ କରିଥିଲେ । ସେ ମଧ୍ୟ ଘରୋଇ ଗ୍ରାଉଣ୍ଡରେ ଶ୍ରେଷ୍ଠ ପ୍ରଦର୍ଶନ ଦେବାକୁ ପ୍ରତିଶ୍ରୁତିବଦ୍ଧ ।
ନାଇଟ୍ ରାଇଡର୍ସକୁ ହରାଇବାକୁ ହେଲେ ଦଳକୁ ସବୁ ବିଭାଗରେ ଶ୍ରେଷ୍ଠ ପ୍ରଦର୍ଶନ ଦେବାକୁ ପଡ଼ିବ । ଓପନିଂ ଯୋଡ଼ି ରୋହିତ ଶର୍ମା ଓ ର୍ୟାନ୍ ରିକେଲଟନ୍ଙ୍କ ଫର୍ମ ଚିନ୍ତାଜନକ ରହିଛି । ଉଭୟ ପ୍ରଥମ ୨ଟି ମ୍ୟାଚ୍ରେ ବିଫଳ ହୋଇଥିଲେ । ଉଭୟଙ୍କ ବ୍ୟାଟରୁ ବଡ଼ ଇନିଂସ୍ ଦେଖିବାକୁ ଦର୍ଶକ ଅପେକ୍ଷା କରିଛନ୍ତି । ମଧ୍ୟକ୍ରମରେ ତିଳକ ବର୍ମା ଓ ସୂର୍ଯ୍ୟକୁମାର ଯାଦବ ଫର୍ମରେ ଅଛନ୍ତି । ଗୁଜରାଟ ବିପକ୍ଷରେ ଯୁବ ସ୍ପିନର ବିଘ୍ନେଶ ପୁଥୁରଙ୍କୁ ନଖେଳାଇବା ମୁମ୍ବାଇ ଇଣ୍ଡିଆନ୍ସ ପାଇଁ ବୁମେରାଂ ସାବ୍ୟସ୍ତ ହୋଇଥିଲା । ଆଜି ସେ ଏକାଦଶକୁ ଫେରିବା ସମ୍ଭାବନା ରହିଛି ।
ନାଇଟ୍ ରାଇଡର୍ସ ପ୍ରଥମ ମ୍ୟାଚ୍ରେ ରୟାଲ୍ ଚ୍ୟାଲେଞ୍ଜର୍ସ ବେଙ୍ଗାଲୁରୁ ନିକଟରୁ ପରାଜିତ ହୋଇଥିଲା । ମାତ୍ର ଦ୍ୱିତୀୟ ମ୍ୟାଚ୍ରେ ରାଜସ୍ଥାନ ରୟାଲ୍ସକୁ ହରାଇଥିଲା । ଏହି ବିଜୟ ଦଳର ମନୋବଳ ଦ୍ୱିଗୁଣିତ କରିଛି । ଓପନର କ୍ୱିଣ୍ଟନ ଡି’କକ୍ ଅପରାଜିତ ୯୭ରନ୍ କରି ଦଳକୁ ବିଜୟୀ କରାଇଥିଲେ । ଆଜି ତାଙ୍କ ଉପରେ ନଜର ରହିବ । ଦଳରେ ଏକାଧିକ ଦୁର୍ଦ୍ଧର୍ଷ ବ୍ୟାଟର ରହିଛନ୍ତି । ଅସୁସ୍ଥତା ପାଇଁ ଦ୍ୱିତୀୟ ମ୍ୟାଚ୍ରୁ ବାଦ୍ ପଡ଼ିଥିବା ସ୍ପିନର ସୁନୀଲ ନାରାଏନ୍ ଫିଟ୍ ଘୋଷିତ ହେବା ଦଳକୁ ଆଶ୍ୱସ୍ତ କରିଛି । ସେ ଆଜି ଏକାଦଶକୁ ଫେରିବେ ।
ରେକର୍ଡ଼କୁ ଦେଖିଲେ ମୁମ୍ବାଇ ଇଣ୍ଡିଆନ୍ସର ପଲା ଭାରି ରହିବ । ଉଭୟ ଦଳ ୩୪ଥର ପରସ୍ପରକୁ ଭେଟିଛନ୍ତି । ଏଥିରେ ମୁମ୍ବାଇ ଇଣ୍ଡିଆନ୍ସ ୨୩ଟି ଏବଂ ନାଇଟ୍ ରାଇଡର୍ସ ୧୧ଟି ମ୍ୟାଚ୍ ଜିତିଛନ୍ତି । ଗତ ସିଜନରେ ଉଭୟ ଦଳ ୨ଥର ସାମ୍ନାସାମ୍ନି ହୋଇଥିଲେ ଏବଂ ନାଇଟ୍ ରାଇଡର୍ସ ଉଭୟ ମ୍ୟାଚ୍ ଜିତିଥିଲା । ଦଳ ବିଜୟଧାରା ଅବ୍ୟାହତ ରଖିବାକୁ ପ୍ରୟାସ କରିବ ।
ସମ୍ଭାବ୍ୟ ଦ୍ବାଦଶ
ମୁମ୍ବାଇ ଇଣ୍ଡିଆନ୍ସ: ରୋହିତ ଶର୍ମା, ର୍ୟାନ୍ ରିକେଲଟନ୍, ତିଳକ ବର୍ମା, ସୂର୍ଯ୍ୟକୁମାର ଯାଦବ, ରବିନ ମିଞ୍ଜ, ହାର୍ଦ୍ଦିକ ପାଣ୍ଡ୍ୟା, ନମନ ଧୀର, ମିଚେଲ ସାଣ୍ଟନର, ଦୀପକ ଚହର, ଟ୍ରେଣ୍ଟ ବୋଲ୍ଟ, ମୁଜିବ ଉର ରେହମାନ, ମିଚେଲ ସାଣ୍ଟନର/ବିଘ୍ନେଶ ପୁଥୁର ।
ନାଇଟ୍ ରାଇଡର୍ସ: କ୍ୱିଣ୍ଟନ ଡି’କକ୍, ସୁନୀଲ ନାରାଏନ୍/ମୋଇନ୍ ଅଲି, ଅଜିଙ୍କ୍ୟ ରାହାଣେ (ଅଧିନାୟକ), ଅଙ୍ଗକ୍ରୀଶ ରଘୁବଂଶୀ, ଭେଙ୍କଟେଶ ଆୟର, ରିଙ୍କୁ ସିଂହ, ଆନ୍ଦ୍ରେ ରସେଲ, ରମଣଦୀପ ସିଂହ, ସ୍ପେନସର ଜନସନ୍, ବୈଭବ ଆରୋରା, ହର୍ଷିତ ରାଣା, ବରୁଣ ଚକ୍ରବର୍ତ୍ତୀ ।
ରୋମାଞ୍ଚକର ମ୍ୟାଚ୍ରେ ଚେନ୍ନାଇକୁ ମାତ୍ ଦେଲା ରାଜସ୍ଥାନ, ସିଏସ୍କେର ଲଗାତାର ଦ୍ବିତୀୟ ପରାଜୟ
