ଧର୍ମଶାଳା ୦୯/୦୫: ଘରୋଇ ପଞ୍ଜାବ କିଙ୍ଗ୍ସ ଓ ଦିଲ୍ଲୀ କ୍ୟାପିଟାଲ୍ସ ମଧ୍ୟରେ ଧର୍ମଶାଳା ସ୍ଥିତ ଏଚପିସିଏ ଷ୍ଟାଡ଼ିୟମ୍ରେ ଖେଳାଯାଉଥିବା ମ୍ୟାଚ୍କୁ ଅଧାରୁ ବାତିଲ କରାଯାଇଛି । ଭାରତ ଓ ପାକିସ୍ତାନ ସୀମାନ୍ତରେ ଲାଗି ରହିଥିବା ଯୁଦ୍ଧକୁ ନଜରରେ ରଖି ସୁରକ୍ଷା ଦୃଷ୍ଟି କୋଣରୁ ମ୍ୟାଚ୍କୁ ବାତିଲ କରାଯିବା ସହ ଖେଳାଳିମାନଙ୍କୁ ସୁରକ୍ଷିତ ସ୍ଥାନକୁ ନିଆଯାଇଛି । ପଠାନକୋଟ ଅଞ୍ଚଳରେ ପାକିସ୍ତାନର ଆକ୍ରମଣ ପରେ ଖେଳ ବାତିଲ କରାଯାଇଥିଲା। ପରେ ଖେଳାଳି, କୋଚିଂ ସଦସ୍ୟ, ବ୍ରୋଡକାଷ୍ଟ କର୍ମଚାରୀମାନଙ୍କୁ ସ୍ୱତନ୍ତ୍ର ଟେନ ଯୋଗେ ଧର୍ମଶାଳାରୁ ଫେରାଇ ଅଣାଯାଇଛି । ଆଇପିଏଲ୍କୁ ବାତିଲ କରିବା ପାଇଁ ମଧ୍ୟ ଯୋଜନା କରାଯାଉଛି । ଶୁକ୍ରବାର ଏହା ଉପରେ ଚୂଡ଼ାନ୍ତ ନିଷ୍ପତ୍ତି ନିଆଯିବ ।
ଆଇପିଏଲରେ ବହୁ ବିଦେଶୀ ଖେଳାଳି ସାମିଲ ଅଛନ୍ତି । ଏହା ଭାରତର ସବୁଠୁ ଲୋକପ୍ରିୟ ଟୁର୍ଣ୍ଣାମେଣ୍ଟ ହୋଇଥିବାରୁ ମ୍ୟାଚ ଦେଖବା ପାଇଁ ପ୍ରତି ଷ୍ଟାଡିୟମ୍ରେ ଦର୍ଶକ ଗହଳି ଲାଗି ରହୁଛି । ଆଜି ବର୍ଷା ଯୋଗଁ ଘଣ୍ଟାଏ ବିଳମ୍ବରେ ଖେଳ ଆରମ୍ଭ ହୋଇଥିଲା । ଟସ ଜିତି ବ୍ୟାଟିଂ ନିଷ୍ପତ୍ତି ନେଇଥିବା ପଞ୍ଜାବ କିଙ୍ଗ୍ସ ୧୦.୧ ଓଭରରେ ୧ ୱିକେଟ୍ ହରାଇ ୧୨୨ ରନ ସଂଗ୍ରହ କରିଥିବାବେଳେ ମ୍ୟାଚ୍ ଅଟକାଇ ଦିଆଯାଇଥିଲା । ଆୟୋଜକଙ୍କ ପକ୍ଷରୁ ଷ୍ଟାଡ଼ିୟମ୍କୁ ତୁରନ୍ତ ଖାଲି କରାଇବାକୁ ନିର୍ଦ୍ଦେଶ ଦିଆଯାଇଥିଲା ।
ଗୁରୁବାର ଟସ ଜିତି ପଞ୍ଜାବ କିଙ୍ଗ୍ସ ବ୍ୟାଟିଂ ନିଷ୍ପତ୍ତି ନେଇଥିଲା । ଦୁଇ ଓପନର ପ୍ରିୟାଂଶ ଆର୍ଯ୍ୟ ଓ ପ୍ରଭସିମରନ ସିଂହ ବିସ୍ଫୋରକ ବ୍ୟାଟିଂ କରି ଦିଲ୍ଲୀ କ୍ୟାପିଟାଲ୍ସ ବୋଲରଙ୍କ ଲୟ ବିଗାଡ଼ି ଦେଇଥିଲେ । ମିଚେଲ ଷ୍ଟାର୍କ, ଦୁଷ୍ମନ୍ତ ଚାମିରା, କୁଲଦୀପ ଯାଦବ, ଅକ୍ଷର ପଟେଲଙ୍କ ଭଳି ଅନ୍ତର୍ଜାତୀୟ କ୍ରିକେଟ୍ରେ ଯଥେଷ୍ଟ ଅଭିଜ୍ଞତା ରଖିଥିବା ବୋଲରମାନେ ମଧ୍ୟ ଉଭୟ ଯୁବ ଓପନରଙ୍କ ପ୍ରହାରରୁ ବର୍ତ୍ତି ନଥିଲେ । ୧୦ ଓଭରରେ ଉଭୟ ୧୨୨ ରନ ସଂଗ୍ରହ କରିନେଇଥିଲେ । ୧୧ତମ ଓଭରର ପ୍ରଥମ ବଲରେ ଟି ନଟରାଜନ ଯୋଡି ଭାଙ୍ଗି ଭ୍ରମଣକାରୀ ଦଳକୁ ଆଶ୍ୱସ୍ତ କରିଥିଲେ । ପ୍ରିୟାଂଶ ୩୪ଟି ବଲ୍ରୁ ୫ଚୌକା ଓ ୬ଛକା ବଳରେ ୭୦ ରନ କରି ଆଉଟ୍ ହୋଇଥିଲେ । ପ୍ରଭସିମରନ ୨୮ଟି ବଲ୍ରୁ ୭ଚୌକା ବଳରେ ୫୦ ରନ କରି ଅପରାଜିତ ରହିଥିଲେ । ଏହି ସମୟରେ ହଠାତ ଷ୍ଟାଡ଼ିୟମ୍ର ଫ୍ଲଡ ଲାଇଟ ଲିଭି ଯାଇଥିଲା । ୨ଟି ଟାୱାର ଲାଇଟ ଲିଭିଯିବା ପରେ ଆଇପିଏଲ୍ ଅଧ୍ୟକ୍ଷ ଅରୁଣ ଧୂମାଲ ଷ୍ଟାଡ଼ିୟମ୍ ସାରା ବୁଲିବୁଲି ଦର୍ଶକଙ୍କୁ ଫେରିଯିବାକୁ ଅନୁରୋଧ କରିଥିଲେ।
