ବର୍ମିଂହାମ, ୨୮/୦୬: ପ୍ରଥମ ଟେଷ୍ଟରେ ପରାଜୟ ପରେ ସିରିଜକୁ ଫେରିବା ପାଇଁ ଟିମ ଇଣ୍ଡିଆ ପ୍ରସ୍ତତି ଆରମ୍ଭ କରିଛି । ଆସନ୍ତା ବୁଧବାର ଠାରୁ ଦ୍ୱିତୀୟ ଟେଷ୍ଟ ଆରମ୍ଭ ହେବ । ୨ଦିନର ବିଶ୍ରାମ ପରେ ଭାରତୀୟ ଦଳ ଏଜବାଷ୍ଟନ ଗ୍ରାଉଣ୍ଡ୍ରେ ଅଭ୍ୟାସ କରୁଛି । ପ୍ରଥମ ଟେଷ୍ଟ ଖେଳିଥିବା ଦୁଇ ପ୍ରମୁଖ ପେସ ବୋଲର ଯଶପ୍ରୀତ ବୁମରା ଓ ପ୍ରସିଦ୍ଧ କ୍ରିଷ୍ଣାଙ୍କ ସମେତ ସର୍ଦୁଲ ଠାକୁରଙ୍କୁ ପ୍ରଥମ ଅଭ୍ୟାସ ଦିବସରୁ ବିରତ ରଖାଯାଇଥିବାବେଳେ ଆକାଶ ଦୀପ ଓ ଅର୍ଶଦୀପ ସିଂହଙ୍କୁ ନୂଆ ବଲ୍ରେ ବୋଲିଂ ଅଭ୍ୟାସ କରାଯାଇଛି ।
ଭାରତୀୟ ଦଳ ଶୁକ୍ରବାର ୱାର୍ମ ଅପ୍ ଓ ଫୁଟ ଭଲିରୁ ପ୍ରସ୍ତୁତି ଶିବିର ଆରମ୍ଭ କରିଥିଲା । ପ୍ରଥମ ଦିନରେ ବୋଲିଂ ବିଭାଗ ଉପରେ ଗୁରୁତ୍ୱ ଦିଆଯାଇଥିଲା । କୋଚ ଗୌତମ ଗମ୍ଭୀର ଓ ବୋଲିଂ କୋଚ ମର୍ଣ୍ଣ ମୋର୍କେଲ ସବୁ ବୋଲରଙ୍କ ଅଭ୍ୟାସ ତଦାରଖ କରିଥିଲେ । ଶ୍ରେଷ୍ଠ ବୋଲର ବୁମରା ଏହି ସିରିଜର ୩ଟି ଟେଷ୍ଟ ଖେଳିବେ ବୋଲି ପୂର୍ବରୁ ସ୍ପଷ୍ଟ କରି ସାରିଛନ୍ତି । ତେଣୁ ଏଜବାଷ୍ଟନରେ ସେ ବିଶ୍ରାମ ନେବା ଏକପ୍ରକାର ନିଶ୍ଚିତ । ତାଙ୍କ ଅନୁପସ୍ଥିତିରେ ବୋଲିଂ ବିଭାଗକୁ ସନ୍ତୁଳିତ କରିବା ପାଇଁ ଜୋରଦାର ପ୍ରସ୍ତୁତି ଚାଲିଥିବା ପ୍ରଥମ ଦିବସରୁ ସ୍ପଷ୍ଟ ବାରି ହୋଇପଡ଼ିଥିଲା । ଆକାଶ ଦୀପ ଓ ଅର୍ଶଦୀପଙ୍କୁ ନୂଆ ବଲ୍ରେ ଦୀର୍ଘ ସମୟ ଧରି ବୋଲିଂ ଅଭ୍ୟାସ କରାଯାଇଥିଲା । ମହମ୍ମଦ ସିରାଜ ପ୍ରଥମେ ବ୍ୟାଟିଂ ଅଭ୍ୟାସ କରିଥିଲେ ।
ପ୍ରଥମ ଅଧ ଘଣ୍ଟା ପର୍ଯ୍ୟନ୍ତ ବ୍ୟାଟିଂ କୋଚ ସୀତାଂଶୁ କୋଟକ ତାଙ୍କୁ ବ୍ୟାଟିଂ ଅଭ୍ୟାସ କରାଇଥିଲେ । ଏହାପରେ ସେ ସାଥୀ ଖେଳାଳିଙ୍କ ସହ ବୋଲିଂ ଅଭ୍ୟାସ କରିଥିଲେ । ମାତ୍ର ସେ ନେଟ୍ସରେ କେବଳ ଲୟ ଉପରେ ଗୁରୁତ୍ୱ ଦେଉଥିଲେ । ଛୋଟ ରନ୍ ଅପ୍ରେ ସେ ବୋଲିଂ କରୁଥିବା ଦେଖିବାକୁ ମିଳିଥିଲା । ଆଗକୁ ୪ଟି ଟେଷ୍ଟ ରହିଥିବାରୁ ସିରାଜଙ୍କ କାର୍ଯ୍ୟଭାର ନିୟନ୍ତ୍ରଣ କରାଯାଉଛି । ତେଣୁ ସେ ହାଲକା ବୋଲିଂ ଅଭ୍ୟାସ କରିଥିଲେ । ପ୍ରସିଦ୍ଧ କ୍ରିଷ୍ଣାଙ୍କୁ ମଧ୍ୟ ଅପେକ୍ଷା କୃତ ବିଶ୍ରାମ ଦେବାକୁ ଯୋଜନା କରାଯାଉଛି । ତେଣୁ ସେ ଅଭ୍ୟାସକୁ ଓହ୍ଲାଇ ନଥିଲେ । ପ୍ରଥମ ଟେଷ୍ଟରେ ୱିକେଟ୍ ନେଇଥିଲେ ହେଁ ପ୍ରସିଦ୍ଧ କ୍ରିଷ୍ଣା ବ୍ୟୟ ବହୁଳ ସାବ୍ୟସ୍ତ ହୋଇଥିଲେ ।
ସର୍ଦୁଲଙ୍କ ସ୍ଥାନରେ ନୀତିଶ: ଏଜବାଷ୍ଟନର ପିଚ୍ ଦେଖିବା ପରେ ଏକାଦଶ ଚୂଡ଼ାନ୍ତ କରାଯିବ । ପ୍ରାଥମିକ ପର୍ଯ୍ୟାୟରୁ ଯାହା ଜଣା ପଡ଼ୁଛି, ସର୍ଦୁଲ ଠାକୁରଙ୍କୁ ଏକାଦଶରୁ ବାଦ ଦିଆଯାଇପାରେ । ତାଙ୍କ ସ୍ଥାନରେ ନୀତିଶ କୁମାର ରେଡ୍ଡୀ କିମ୍ବା କୁଲଦୀପ ଯାଦବଙ୍କ ମଧ୍ୟରୁ ଜଣଙ୍କୁ ଏକାଦଶରେ ସ୍ଥାନ ମିଳିବା ଆଶା କରାଯାଉଛି । ଆଜି ନୀତିଶ ଦୀର୍ଘ ସମୟ ଧରି ନେଟ୍ସରେ ବୋଲିଂ ଅଭ୍ୟାସ କରିଥିଲେ ।
