ନୂଆଦିଲ୍ଲୀ : ମୁମ୍ୱାଇର ୨୬ / ୧୧ ଆତଙ୍କୀ ହମଲାର ଅଭିଯୁକ୍ତ ତହବୁର ରାଣାକୁ ଭାରତ ଅଣାଯାଇ ସାରିଛି। ପାକିସ୍ତାନରେ ଜନ୍ମିତ , ୬୪ ବର୍ଷିୟ କାନାଡାର ନାଗରିକ ତହବୁର ରାଣା ଆମେରିକାର ଜେଲ୍ରେ ବନ୍ଦୀ ଥିଲା। ପ୍ରତ୍ୟର୍ପଣ ସନ୍ଧି ଅନୁସାରେ ତାକୁ ଭାରତ ଅଣାଯିବା ପରେ ଏନଆଇଏ ଦ୍ୱାରା ଗିରଫ କରାଯାଇଛି। ତହବୁର ରାଣା ନାଁରେ ଭାରତରେ ୧୦ଟି ଗୁରୁତର ଅପରାଧିକ ମାମଲାରେ ମୋକଦମା ଚାଲିବ। ଯେଉଁଥିରେ ଷଡ଼ଯନ୍ତ୍ର , ହତ୍ୟା, ଆତଙ୍କୀ କାର୍ଯ୍ୟକଳାପ ଗୁଡ଼ିକରେ ସଂପୃକ୍ତି ଓ ଠକେଇ ଆଦି ମାମଲା ସାମିଲ ଅଛି।
ତହବୁର ରାଣାକୁ ଭାରତକୁ ପ୍ରଦାନ କରାଯିବା ମାମଲାରେ ୟୁଏସ୍ ଡିପାର୍ଟମେଣ୍ଟ ଅଫ୍ ଜଷ୍ଟିସ୍ର ବୟାନ ସାମ୍ନାକୁ ଆସିଛି। ବୟାନରେ କୁହାଯାଇଛି ଯେ, ଆମେରିକା ୨୦୦୮ର ମୁମ୍ୱାଇ ଆତଙ୍କବାଦୀ ହମଲାର କଥିତ ଷଡ଼ଯନ୍ତ୍ରକାରୀ ତହବୁର ହୁସୈନ ରାଣାକୁ ବୁଧବାର ଭାରତକୁ ପ୍ରଦାନ କରିଛି।
୨୬/୧୧ ଆତଙ୍କୀ ହମଲାରେ ଯାଇଥିଲା ୧୬୬ଲୋକଙ୍କ ଜୀବନ –
ମୁମ୍ୱାଇ ହମଲା ବେଳେ ୨୬ରୁ୨୯ ନଭେମ୍ୱର ୨୦୦୮ ମଧ୍ୟରେ ଲଶ୍କର-ଏ-ତୈୟବାର ୧୦ ଆତଙ୍କବାଦୀମାନେ ସହରରେ ୧୨ଟି ସ୍ଥାନରେ ହମଲା କରିଥିଲେ, ଯେଉଁଥିରେ ୧୬୬ ଜଣ ଲୋକଙ୍କ ଜୀବନ ଯାଇଥିଲା, ସେଥିରେ ୬ ଆମେରିକୀୟ ନାଗରିକ ମଧ୍ୟ ସାମିଲ ଥିଲେ। ଟ୍ରେନ୍, ଷ୍ଟେସନ, ହୋଟେଲ, ରେଷ୍ଟୁରାଣ୍ଟ ଓ ୟେହୁଦୀ କେନ୍ଦ୍ର ଗୁଡ଼ିକୁ ଟାର୍ଗେଟ୍ କରାଯାଇ ଥିଲା। ହମଲାରେ ଶହ ଶହ ଲୋକ ଆହତ ହୋଇ ଥିଲେ ଏବଂ ସହରକୁ ୧.୫ ବିଲିୟନ ଡଲାରରୁ ଅଧିକ କ୍ଷତି ହୋଇଛି।
ଭାରତର ଅଭିଯୋଗ ଯେ, ରାଣା ନିଜର ପିଲାଦିନର ବନ୍ଧୁ ଡେଭିଡ୍ କୋଲମ୍ୟାନ ହେଡଲୀକୁ ହମଲାର ଯୋଜନା ଓ ସ୍ଥାନ ଗୁଡ଼ିକରେ ରେକି କରିବାରେ ସାହାଯ୍ୟ କରି ଥିଲା। ରାଣା ମୁମ୍ୱାଇରେ ନିଜର ଇମିଗ୍ରେସନ ବିଜନେସ୍ର ଫେକ୍ ଶାଖା ଖୋଲିବା ସହ ହେଡଲୀକୁ ଏହାର ମ୍ୟାନେଜର ନିଯୁକ୍ତ କରି ଥିଲା। ଦୁଇଥର ଫେକ୍ କାଗଜପତ୍ର ଜରିଆରେ ଭିସା ଆବେଦନ ଦାଏର କରାଯାଇଥିଲା।
ତହବୁର ରାଣାର ବୟାନରେ ସ୍ପଷ୍ଟ ହୋଇଛି ଏହାର ଭୂମିକା ଓ ଉଦ୍ଦେଶ୍ୟ-
ମୁମ୍ୱାଇ ଆତଙ୍କୀ ହମଲାର ଯାଞ୍ଚ କ୍ରମରେ ଅନେକ ଏମିତି ରାଜ୍ ଖୋଲିଛି , ଯେଉଁଥିରେ ତହବୁରର ଭୂମିକା ଓ ଉଦ୍ଦେଶ୍ୟ ସ୍ପଷ୍ଟ ହୋଇଛି। ଯାଞ୍ଚ ମୁତାବିକ , ତହବୁର ରାଣା ଆତଙ୍କୀ ହମଲା ପରେ ହେଡଲୀକୁ କହିଥିଲା ଯେ, ‘ ଭାରତୀୟମାନେ ଏମିତି ହିଁ ପାଇବା ଉଚିତ୍ ଥିଲା ’ । କେବଳ ଏତିକି ନୁହେଁ, ତହବୁର ରାଣା ଏହି ହମଲାରେ ଭାରତୀୟ ଯବାନଙ୍କ ଦ୍ୱାରା ମରିଥିବା ଆତଙ୍କବାଦୀଙ୍କ ପାଇଁ ପାକିସ୍ତାନର ସର୍ବୋଚ୍ଚ ସାମରିକ ସମ୍ମାନ ‘ନିଶାନ-ଏ-ହୈଦର’ ଦିଆଯିବାକୁ ଦାବି ମଧ୍ୟ କରିଥିଲା।
୨୦୧୩ରେ ଡେନମାର୍କ ଆତଙ୍କୀ ହମଲାରେ ମିଳିଥିଲା ୧୪ ବର୍ଷର ସଜା –
ରାଣା ଉପରେ ଆତଙ୍କୀ ଷଡ଼ଯନ୍ତ୍ର ଅଭିଯୋଗ ହେବାର ଏହା ପ୍ରଥମ ଅବସର ନଥିଲା। ୨୦୧୩ରେ ଆମେରିକାର ଏକ କୋର୍ଟ ତାକୁ ଲଶ୍କର-ଏ-ତୈୟବାକୁ ସାହାଯ୍ୟ କରିବା ଓ ଡେନମାର୍କରେ ହମଲାର ଷଡ଼ଯନ୍ତ୍ର ରଚିବା ପାଇଁ ୧୪ ବର୍ଷର ସଜା ଶୁଣାଇ ଥିଲେ।
ଭାରତ ଜୁନ୍ ୨୦୨୦ରେ ଆମେରିକାକୁ ରାଣାର ପ୍ରତ୍ୟର୍ପଣ ନେଇ ଦାବି କରିଥିଲେ ଏବଂ ଏହାକୁ ରାଣା ବାରମ୍ୱାର ଆଇନଗତ ଚ୍ୟାଲେଞ୍ଜ ଦେଇଥିଲା। କିନ୍ତୁ ଆମେରିକାର ସବୁ କୋର୍ଟ , ଆପିଲେଟ୍ କୋର୍ଟ ଏବଂ ବିଶେଷକରି ସୁପ୍ରିମକୋର୍ଟ ସବୁ ଆବେଦନକୁ ଖାରଜ କରିଦେଇ ଥିଲେ। ଶେଷରେ ୯ ଅପ୍ରେଲ ୨୦୨୫ରେ ଆମେରିକାର ମାର୍ଶଲ ସର୍ଭିସ ତାକୁ ଭାରତୀୟ ଅଧିକାରୀଙ୍କୁ ପ୍ରଦାନ କରିଥିଲେ।
ଏହି ପ୍ରତ୍ୟର୍ପଣ ଆମେରିକାର ନ୍ୟାୟ ବିଭାଗ , ଏଫବିଆଇ , ବିଦେଶ ମନ୍ତ୍ରାଳୟ ଓ ନୂଆ ଦିଲ୍ଲୀ ସ୍ଥିତ ଆମେରିକୀୟ ଦୂତାବାସର ସହଯୋଗରେ ସମ୍ଭବ ହୋଇଛି। ୨୦୦୮ ମୁମ୍ୱାଇ ହମଲାର ଅଭିଯୁକ୍ତ ତହବୁର ରାଣାକୁ ଭାରତ ଅଣାଯିବାରେ ଭାରତୀୟ କୂଟନୀତିର ବଡ଼ ଉପଲବ୍ଧି ବୋଲି କୁହାଯାଉଛି।
