ନୂଆଦିଲ୍ଲୀ: 'ଇଣ୍ଡିଆଜ୍ ଗଟ୍ ଲାଟେଣ୍ଟ୍' ମାମଲାରେ ରଣବୀର ଆଲ୍ଲାହାବାଦିଆ, ସମୟ ରୈନା ଏବଂ ଅପୂର୍ବ ମାଖିଜାଙ୍କ ସମସ୍ୟା କମିବା ପରି ଦୃଶ୍ୟମାନ ହେଉନାହିଁ। ଆଜି ସୁପ୍ରିମକୋର୍ଟରେ ଏହି ମାମଲାର ଶୁଣାଣି ହୋଇଥିଲା, ଯେଉଁଥିରେ କୋର୍ଟ ୟୁଟ୍ୟୁବର୍ସଙ୍କୁ ଖୁବ୍ ଭର୍ତ୍ସନା କରିଥିଲେ। ସୁପ୍ରିମକୋର୍ଟ ବର୍ତ୍ତମାନ ରଣବୀର ଆଲ୍ଲାହାବାଦିଆ, ସମୟ ରୈନା ଏବଂ ଅପୂର୍ବ ମାଖିଜାଙ୍କ କୌଣସି ଶୋ’ର ଅନ୍ ଏୟାର ବା ପ୍ରସାରଣ ଉପରେ ପ୍ରତିବନ୍ଧକ ଲଗାଇଛନ୍ତି।
ସୁପ୍ରିମକୋର୍ଟ ପଡକାଷ୍ଟର ଆଲ୍ଲାହାବାଦିଆଙ୍କୁ ତାଙ୍କ ପାସପୋର୍ଟ ଥାନେ ପୋଲିସ ଷ୍ଟେସନରେ ଦାଖଲ କରିବାକୁ ମଧ୍ୟ ନିର୍ଦ୍ଦେଶ ଦେଇଛନ୍ତି। କୋର୍ଟଙ୍କ ନିର୍ଦ୍ଦେଶ ଅନୁଯାୟୀ, ରଣବୀର ଆଲ୍ଲାହାବାଦିଆ କୋର୍ଟଙ୍କ ଅନୁମତି ବିନା ବିଦେଶ ଯାଇପାରିବେ ନାହିଁ। ଏହା ବ୍ୟତୀତ, ସୁପ୍ରିମକୋର୍ଟ ମହାରାଷ୍ଟ୍ର ଏବଂ ଆସାମରେ ପଞ୍ଜିକୃତ ଏଫଆଇଆର ତଦନ୍ତରେ ସହଯୋଗ କରିବାକୁ ଆଲ୍ଲାହାବାଦିଆଙ୍କୁ ନିର୍ଦ୍ଦେଶ ଦେଇଛନ୍ତି।
'ଇଣ୍ଡିଆଜ୍ ଗଟ୍ ଲାଟେଣ୍ଟ୍'ରେ ରଣବୀର ଆଲ୍ଲାହାବାଦିଆଙ୍କ ବିବାଦୀୟ ମନ୍ତବ୍ୟ ଉପରେ, ସୁପ୍ରିମକୋର୍ଟ ପଡକାଷ୍ଟରଙ୍କ ଓକିଲଙ୍କୁ ପଚାରିଲେ, 'ସେ ଯେଉଁ ଭାଷା ବ୍ୟବହାର କରିଛନ୍ତି, ଆପଣ ସେଥିରେ ସହମତ କି?' ଅଶ୍ଳୀଳତାର ମାନଦଣ୍ଡ କ’ଣ ? ଏହା ଦାୟିତ୍ୱହୀନତାର ଶୀର୍ଷ । ସେମାନେ ଭାବନ୍ତି ଯେ ସେମାନେ ଲୋକପ୍ରିୟ ହୋଇଗଲେଣି, ତେଣୁ ସେମାନେ କିଛି ବି କହିପାରିବେ । ତାଙ୍କ ମନରେ ମଇଳା ଅଛି। କୋର୍ଟ ଏପରି ବ୍ୟକ୍ତିଙ୍କ ପକ୍ଷ କାହିଁକି ନେବେ ? ଜଣେ ଭାବୁଛି ଯେ ସେ ଏତେ ଲୋକପ୍ରିୟ ହୋଇଗଲେଣି ଏବଂ ଯେକୌଣସି ପ୍ରକାରର କଥା କହିପାରିବେ, ସେ କ’ଣ ସମଗ୍ର ସମାଜକୁ ହାଲୁକା ଭାବରେ ନେଇପାରିବେ? ପୃଥିବୀରେ ଏପରି କେହି ଅଛନ୍ତି କି ଯିଏ ଏହି ଭାଷାକୁ ପସନ୍ଦ କରିବ?
ସୂଚନାଥାଉକି 'ଇଣ୍ଡିଆଜ୍ ଗଟ୍ ଲ୍ୟାଟେଣ୍ଟ୍' ମାମଲାର ଶୁଣାଣି ଜଷ୍ଟିସ୍ ସୂର୍ଯ୍ୟକାନ୍ତ ଏବଂ ଜଷ୍ଟିସ୍ କୋଟିଶ୍ୱର ସିଂହଙ୍କ ଦୁଇ ସଦସ୍ୟ ବିଶିଷ୍ଟ ଖଣ୍ଡପୀଠରେ ହୋଇଥିଲା। ଏହି ସମୟରେ, ଓକିଲ ଅଭିନବ ଚନ୍ଦ୍ରଚୂଡ଼ ରଣବୀର୍ ଆଲ୍ଲାହାବାଦିଆଙ୍କୁ ପକ୍ଷଭୁକ୍ତ କରିଥିଲେ । ତେବେ ଓକିଲ ଅଭିନବ ଚନ୍ଦ୍ରଚୂଡ଼ ହେଉଛନ୍ତି ଭାରତର ପୂର୍ବତନ ମୁଖ୍ୟ ବିଚାରପତି ଡିୱାଇ ଚନ୍ଦ୍ରଚୂଡ଼ଙ୍କ ପୁଅ ।
