ଦୁବାଇ,୦୩/୧୦: ସଦ୍ୟ ପ୍ରକାଶିତ ଆଇସିସି ଟେଷ୍ଟ ମାନ୍ୟତା ତାଲିକାରେ ଭାରତୀୟ ଖେଳାଳିଙ୍କ ରାଜୁତି ଜାରି ରହିଛି । ବ୍ୟାଟିଂ, ବୋଲିଂ ଓ ଅଲ୍ରାଉଣ୍ଡର ମାନ୍ୟତା ତାଲିକାର ଶ୍ରେଷ୍ଠ ୧୦ ମଧ୍ୟରେ ୩ଟି ଲେଖାଏଁ ସ୍ଥାନ ଭାରତୀୟ ଖେଳାଳି କବ୍ଜା କରିଛନ୍ତି ।
ଷ୍ଟାର୍ ପେସ୍ ବୋଲର ଯଶପ୍ରୀତ ବୁମରା ବୋଲିଂ ମାନ୍ୟତାର ଶୀର୍ଷକୁ ଫେରିଛନ୍ତି । ବାଂଲାଦେଶ ବିପକ୍ଷ କାନପୁର ଟେଷ୍ଟରେ ବୁମରା ୬ଟି ୱିକେଟ୍ ଅକ୍ତିଆର କରିଥିଲେ । ଚଳିତ ବର୍ଷ ବୁମରା ଦ୍ୱିତୀୟ ଥର ପାଇଁ ମାନ୍ୟତା ତାଲିକାର ଶୀର୍ଷ ସ୍ଥାନ ଦଖଲ କରିଛନ୍ତି । ଗତ ଜାନୁଆରୀ ଓ ଫେବ୍ରୁଆରୀ ମଧ୍ୟରେ ଅନୁଷ୍ଠିତ ଇଂଲଣ୍ଡ ବିପକ୍ଷ ଟେଷ୍ଟ ସିରିଜ ପରେ ବୁମରା ପ୍ରଥମ କରି ଶୀର୍ଷ ସ୍ଥାନ ଦଖଲ କରିଥିଲେ । ଭାରତର ପ୍ରଥମ ପେସ୍ ବୋଲର ଭାବେ ବୁମରା ଟେଷ୍ଟ ମାନ୍ୟତାର ଶୀର୍ଷ ସ୍ଥାନରେ ପହଞ୍ଚିଥିଲେ । ଗତ ସପ୍ତାହରେ ଶୀର୍ଷ ସ୍ଥାନ ଦଖଲ କରିଥିବା ରବି ଚନ୍ଦ୍ରନ ଅଶ୍ୱିନ ଦ୍ୱିତୀୟ ସ୍ଥାନକୁ ଖସିଛନ୍ତି । ସେହିପରି ରବିନ୍ଦ୍ର ଜାଡେଜା ମାନ୍ୟତା ତାଲିକାର ଷଷ୍ଠ ସ୍ଥାନରେ ରହିଛନ୍ତି ।
ବ୍ୟାଟିଂ ମାନ୍ୟତାରେ ଯଶସ୍ୱୀ ଜୈସ୍ୱାଲ୍ ତୃତୀୟ ସ୍ଥାନକୁ ଉନ୍ନୀତ ହୋଇଛନ୍ତି । ମାତ୍ର ୧୧ଟି ଟେଷ୍ଟ ଖେଳି ତୃତୀୟ ସ୍ଥାନ ଦଖଲ କରିବା ଜୈସ୍ୱାଲଙ୍କ ଦକ୍ଷତା ଓ ପ୍ରଦର୍ଶନକୁ ପ୍ରମାଣିତ କରୁଛି । ସେ କାନପୁର ଟେଷ୍ଟର ଉଭୟ ଇନିଂସରେ ଅର୍ଦ୍ଧଶତକ ଅର୍ଜନ କରିଥିଲେ । ସେହିପଯରି ବିରାଟ କୋହଲିଙ୍କ ମାନ୍ୟତାରେ ୬ଟି ସ୍ଥାନ ଉନ୍ନତି ହୋଇଛି ଓ ସେ ପୁନର୍ବାର ଷଷ୍ଠ ସ୍ଥାନ ଦଖଲ କରିଛନ୍ତି । ଅନ୍ୟ ଭାରତୀୟଙ୍କ ମଧ୍ୟରେ ରିଷଭ ପନ୍ତ ନବମ ସ୍ଥାନରେ ରହିଛନ୍ତି । ଇଂଲଣ୍ଡର ଜୋ ରୁଟ୍ ପୂର୍ବବତ୍ ଶୀର୍ଷ ସ୍ଥାନ ବଜାୟ ରଖିଛନ୍ତି । ଅନ୍ୟମାନଙ୍କ ମଧ୍ୟରେ ଶ୍ରୀଲଙ୍କାର କାମିଣ୍ଡୁ ମେଣ୍ଡିସ୍ ମାତ୍ର ୮ଟି ଟେଷ୍ଟ ଖେଳି ମାନ୍ୟତା ତାଲିକାର ୧୧ତମ ସ୍ଥାନରେ ପହଞ୍ଚି ଯାଇଛନ୍ତି । ସେ ନ୍ୟୁଜିଲାଣ୍ଡ ବିପକ୍ଷ ଦ୍ୱିତୀୟ ଟେଷ୍ଟରେ ଅପରାଜିତ ୧୮୨ ରନ୍ର ଇନିଂସ ଖେଳିଥିଲେ । ଅନ୍ୟ ଶ୍ରୀଲଙ୍କା ଖେଳାଳିଙ୍କ ମଧ୍ୟରେ ପ୍ରବଥ ଜୟସୂରିୟା ବୋଲିଂ ମାନ୍ୟତାର ସପ୍ତମ ସ୍ଥାନ ଦଖଲ କରିଛନ୍ତି ।
