ନୂଆଦିଲ୍ଲୀ,୨୫/୦୩: ଏକାଧିକ କାରଣ ଯୋଗୁ ଭାରତର ମଧ୍ୟବିତ୍ତଙ୍କ ଆର୍ଥିକ ସମସ୍ୟା ବଢ଼ିଚାଲିଛି । ସ୍ଥିର ଆୟ, ଅଟୋମେଶନ-ଚାଳିତ ନିଯୁକ୍ତି ହ୍ରାସ ଏବଂ ସାମ୍ପ୍ରତିକ ଅର୍ଥନୈତିକ ମାନ୍ଦାବସ୍ଥା ଯୋଗୁ ମଧ୍ୟବିତ୍ତମାନେ ଆର୍ଥିକ ବୋଝରେ ସନ୍ତୁଳି ହେଉଥିବା ମାର୍ସେଲସ୍ ଇନ୍ଭେଷ୍ଟମେଣ୍ଟ ମ୍ୟାନେଜର୍ସର ପ୍ରତିଷ୍ଠାତା ଏବଂ ମୁଖ୍ୟ ନିବେଶ ଅଧିକାରୀ ସୌରଭ ମୁଖାର୍ଜୀ ପ୍ରକାଶ କରିଛନ୍ତି ।
ଏହି ସମସ୍ୟାଗୁଡ଼ିକୁ ନେଇ ଆଲୋକପାତ କରିବା ସହ ଶ୍ରୀ ମୁଖାର୍ଜୀ କହିଛନ୍ତି ଯେ, ଏସବୁ ସମସ୍ୟା ବିଭିନ୍ନ ଉପାୟରେ ମଧ୍ୟବିତ୍ତଙ୍କ ଆର୍ଥିକ ସୁରକ୍ଷାକୁ ବାଧା ଦେଉଛି । ସେ କହିଛନ୍ତି ଯେ, ମଧ୍ୟବିତ୍ତଙ୍କ ଆୟ ଯେଉଁଠି ସେଇଠି ସ୍ଥିର ରହିଛି । ଏହା ଏକ ପ୍ରମୁଖ ସମସ୍ୟା । ଗତ ୧୦ ବର୍ଷ ଧରି ଏହି ବର୍ଗଙ୍କ ବାର୍ଷିକ ହାରାହାରି ଆୟ ପ୍ରାୟ ସାଡେ ୧୦ ଲକ୍ଷ ଟଙ୍କାରେ ସ୍ଥିର ରହିଛି । ବାସ୍ତବରେ ଯଦି ଦେଖାଯାଏ ତେବେ ମୁଦ୍ରାସ୍ଫୀତି ଯୋଗୁ ମଧ୍ୟବିତ୍ତଙ୍କ ଆୟ ଏବେ ଅଧା କହିଲେ ଚଳେ । ଏହା ଏକ ବଡ଼ ସମସ୍ୟା ।
ଲୋକେ ଏକ ଭଲ ଜୀବନଶୈଳୀ ଜିଇଁବାକୁ ଚାହାନ୍ତି । କିନ୍ତୁ ଦରଦାମ ବୃଦ୍ଧି ଯୋଗୁ ଭଲ ଜୀବନଶୈଳୀ ପାଇଁ ଲୋକଙ୍କୁ ମୋଟା ଋଣ କରିବାକୁ ପଡୁଥିବା ମୁଖାର୍ଜୀ ପ୍ରକାଶ କରିଛନ୍ତି ।
ଅଟୋମେଶନ ଯୋଗୁ ନିଯୁକ୍ତି ସମ୍ଭାବନା ବି ହ୍ରାସ ପାଇଛି । ଫ୍ୟାକ୍ଟ୍ରି ହେଉ କିମ୍ବା ଅଫିସ୍, ପାରମ୍ପରିକ ମଧ୍ୟବିତ୍ତ ବର୍ଗଙ୍କ ନିଯୁକ୍ତିର ଜାଗା ନେଉଛି ମେଶିନ୍ । ଉଦାହରଣ ଭାବେ ମୁଖାର୍ଜୀ ବ୍ୟାଙ୍କ ଟେଲର୍ଙ୍କୁ ଦର୍ଶାଇଛନ୍ତି । ସେ କହିଛନ୍ତି ଯେ, ଏଟିଏମ୍ ସହ ଅଟୋମେଶନ୍ର ପ୍ରଥମ ଲହର ଆସିଛି । ଦ୍ୱିତୀୟ ଲହର ହେଉଛି ବ୍ୟାଙ୍କ ଟେଲର୍ଙ୍କ ସ୍ଥାନ ନେବ ବଟ୍ । ଜେନେରେଟିଭ୍ ଏଆଇ ଦ୍ୱାରା ଚାଳିତ ଅଟୋମେଶନ୍ର ପରବର୍ତ୍ତୀ ପର୍ଯ୍ୟାୟରେ ଉଭୟ ମାନୁଫାକ୍ଚରିଂ ଏବଂ ହ୍ୱାଇଟ୍-କୋଲାର କ୍ଷେତ୍ରର ନିଯୁକ୍ତି ପ୍ରଭାବିତ ହେବ ।
ସେହିଭଳି ମଧ୍ୟବିତ୍ତଙ୍କ ଉପରେ ପ୍ରଭାବ ପକାଉଛି ଆର୍ଥିକ ମାନ୍ଦାବସ୍ଥା । କୋଭିଡ୍-ପରବର୍ତ୍ତୀ ଚକ୍ରାକାର ଅର୍ଥନୈତିକ ମାନ୍ଦାବସ୍ଥାର ସବୁଠାରୁ ବଡ଼ ପ୍ରଭାବ ମଧ୍ୟମ ବର୍ଗଙ୍କ ଉପରେ ପଡ଼ିବ ବୋଲି ମୁଖାର୍ଜୀ ପ୍ରକାଶ କରିଛନ୍ତି ।
ମୁଖାର୍ଜୀ ଆହୁରି କହିଛନ୍ତି ଯେ, ଅର୍ଥନୈତିକ ମାନ୍ଦାବସ୍ଥା କ୍ଷୀଣସ୍ଥାୟୀ । କିନ୍ତୁ ସ୍ଥିର ଆୟ ଏବଂ ଅଟୋମେଶନଚାଳିତ ନିଯୁକ୍ତି ହ୍ରାସ ଢ଼ାଞ୍ଚାଗତ । ଆସନ୍ତା ଦଶନ୍ଧିରେ ଏହାର ବୃହତ୍ ପ୍ରଭାବ ଦେଶର ମଧ୍ୟବିତ୍ତ ଅନୁଭବ କରିବେ ।
