ଇନ୍ଦୋର,୨୬/୦୭: ଅସହ୍ୟ ହେଲା ଯନ୍ତ୍ରଣା । ନିତିଦିନିଆ କାମ ବି ହୋଇପଡ଼ିଲା କଷ୍ଟକର । ଅସହାୟ ହୋଇ ଶେଷରେ ଇଚ୍ଛାମୃତ୍ୟୁ ପାଇଁ ମହାମହିମଙ୍କୁ କରିଲେ ଅନୁରୋଧ । ଏ ଘଟଣା ହେଉଛି ଇନ୍ଦୋରର । ଜଣେ ଭିନ୍ନକ୍ଷମ ସରକାରୀ ସ୍କୁଲ ଶିକ୍ଷୟିତ୍ରୀ କୁମାରୀ ଚନ୍ଦ୍ରକାନ୍ତ ଜେଥାନୀ ଇଚ୍ଛାମୃତ୍ୟୁ ପାଇଁ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କୁ ଆକୁଳ ନିବେଦନ କରିଛନ୍ତି ।
ହସ୍ପିଟାଲରେ ରହି ଚିକିତ୍ସା ହେଉଥିବା ସମୟରେ ଚନ୍ଦ୍ରକାନ୍ତ ଜେଥାନୀଙ୍କୁ ଭୁଲ୍ ମେଡିସିନ ଦିଆଯାଇଥିଲା । ଏଥିପାଇଁ ଆଜି ତାଙ୍କର ଏହି ଅବସ୍ଥା ହୋଇଛି ବୋଲି ସେ ଅଭିଯୋଗ କରିଛନ୍ତି । ଏହି ଘଟଣା ପରେ ତାଙ୍କୁ ଏକ ଆଶ୍ରମ ପଠାଯାଇଥିଲା ଏବଂ ସେଠାରେ ତାଙ୍କୁ ଆହୁରି ଅଧିକ କଷ୍ଟଦାୟକ ପରିସ୍ଥିତିର ସାମ୍ନା କରିବାକୁ ପଡ଼ିଥିଲା ।
ହେଲେ ବର୍ତ୍ତମାନ ସେ ଅତି ସାଙ୍ଘାତିକ ଯନ୍ତ୍ରଣା ଦେଇ ଗତି କରୁଛନ୍ତି । ଯନ୍ତ୍ରଣା ଅସହ୍ୟ ହେବାରୁ ଜେଥାନୀ ରାଷ୍ଟ୍ରପତିଙ୍କୁ ଏକ ଭାବପ୍ରବଣ ନିବେଦନ କରିଛନ୍ତି । ଏତେ କଷ୍ଟ ଆଉ ସେ ସହି ପାରୁ ନାହାନ୍ତି । ତେଣୁ ତାଙ୍କୁ ଇଚ୍ଛାମୃତ୍ୟୁ ଦେବାକୁ ସେ ଅନୁରୋଧ କରିଛନ୍ତି ।
ଜେଥାନୀ ହ୍ୱିଲ୍ଚେୟାରରେ ବସି ପ୍ରତିଦିନ ପାଠ ପଢାନ୍ତି । ଅସୁସ୍ଥ ଥିବା ସତ୍ତ୍ୱେ ସେ ୭ରୁ ୮ ଘଣ୍ଟା ଧରି ପିଲାଙ୍କୁ ପାଠ ପଢାଉଛନ୍ତି। ସେ ତାଙ୍କ ସମ୍ପତ୍ତିକୁ ସରକାରୀ ସ୍କୁଲ ପିଲାଙ୍କୁ ଦାନ କରିଛନ୍ତି । ଏଥି ସହ ଏମ୍ଜିଏମ୍ କଲେଜକୁ ତାଙ୍କ ଶରୀର ଏବଂ ଅଙ୍ଗଦାନ ପାଇଁ ସମସ୍ତ ପ୍ରକ୍ରିୟା ଶେଷ କରିଛନ୍ତି ।
