ନୂଆଦିଲ୍ଲୀ: ପୁଷ୍ପା-୨ ରିଲିଜ ବେଳେ ଦଳାଚକଟାରେ ମୃତ୍ୟୁବରଣ କରିଥିବା ୩୫ ବର୍ଷିୟ ମହିଳାଙ୍କ ମୃତ୍ୟୁ ଘଟଣାରେ ପୁଣି ଏକ ରୋଚକ ମୋଡ। ମୃତ୍ୟୁ ପାଇଁ ଅଭିନେତା ଅଲ୍ଲୁ ଅର୍ଜୁନଙ୍କୁ ଦାୟୀ କରି ହାଇଦ୍ରାବାଦ ପୋଲିସ ସୋମବାର ଦିନ ଏକ ନୂଆ ସମନ ଜାରି କରିଛି। ଏହି ଦୁର୍ଘଟଣା ହାଇଦ୍ରାବାଦରେ ଥିବା ସଂନ୍ଧ୍ୟା ଥିଏଟରରେ ହୋଇଥିଲା।
ଏକ ଗଣମାଧ୍ୟମ ସଂସ୍ଥାକୁ ମିଳିଥିବା ସୁଚନା ମୁତାବକ, କାଲି ସକାଳ ୧୧ଟା ସୁଦ୍ଧା ପ୍ରଶ୍ନୋତ୍ତର ପାଇଁ ଅଲ୍ଲୁ ଅର୍ଜୁନଙ୍କୁ ଥାନାକୁ ଯିବାକୁ ପଡିବ ବୋଲି ସମନ ଜାରି କରାଯାଇଛି।
୪ ଡିସେମ୍ବରରେ ଅଲ୍ଲୁ ଅର୍ଜୁନ ନିଜ ଫିଲ୍ମ ‘ପୁଷ୍ପା ୨: ଦ ରୁଲ୍’ ର ପ୍ରିମିୟରେ ସାମିଲ ହେବାପାଇଁ ହାଇଦ୍ରାବାଦର ସନ୍ଧ୍ୟା ଥିଏଟରରେ ପହଁଞ୍ଚିଥିଲେ। ସେ ନିଜର ଫ୍ୟାନ୍ଙ୍କ ସହ ହାତ ମିଳାଇବାକୁ ଆଗକୁ ଆସିବା ମାତ୍ରେ, ଆରମ୍ଭ ହୋଇଯାଇଥିଲା ଦଳାଚକଟା। ଏହି ଘଟଣାରେ ଜଣେ ମହିଳାଙ୍କର ମୃତ୍ୟୁ ହୋଇଥିଲା।
ଦଳାଚକଟା ପରେ ଅଲୁ ଅର୍ଜୁନଙ୍କୁ ତେଲେଙ୍ଗାନା ପୋଲିସ ଗିରଫ କରିଥିଲା। କିନ୍ତୁ ସେହି ଦିନ ତେଲେଙ୍ଗାନା ହାଇକୋର୍ଟ ତାଙ୍କୁ ଚାରି ସପ୍ତାହ ପାଇଁ ମଧ୍ୟବର୍ତ୍ତୀକାଳୀନ ଜାମିନ ପ୍ରଦାନ କରିଥିଲେ। ଚିକଡପାଲି ପୋଲିସଥାନାରେ ଭାରତୀୟ ନ୍ୟାୟ ସଂହିତା (ବିଏନ୍ଏସ୍)ର ଅଧୀନରେ ଅଲ୍ଲୁ, ତାଙ୍କ ସୁରକ୍ଷା ଦଳ ଏବଂ ଥିଏଟର ପରିଚାଳନା ବିରୋଧରେ ଏକ ମାମଲା ରୁଜୁ କରାଯାଇଥିଲା।
ଏହି ମାମଲା ପରେ ଡିସେମ୍ବର ୧୩ ତାରିଖରେ ଅଭିନେତା ଅଲ୍ଲୁଙ୍କୁ ଗିରଫ କରାଯାଇଥିଲା। ସେହି ଦିନ ତାଙ୍କୁ ତେଲେଙ୍ଗାନା ହାଇକୋର୍ଟରୁ ମଧ୍ୟବର୍ତ୍ତୀକାଳୀନ ଜାମିନ ମିଳିଯାଇଥିଲା। ପରେ ତାଙ୍କୁ ଡିସେମ୍ବର ୧୪ ଦିନ ସକାଳେ ଜେଲରୁ ମୁକ୍ତ କରାଯାଇଥିଲା। ଏହି ଘଟଣାକୁ ନେଇ କିଛି ଲୋକ ରବିବାର ଅଲ୍ଲୁ ଅର୍ଜୁନଙ୍କ ଘର ବାହାରେ ଭଙ୍ଗାରୁଜା କରିଥିଲେ।
ଅଭିଯୁକ୍ତମାନେ ଓସମାନିଆ ବିଶ୍ୱବିଦ୍ୟାଳୟର ଛାତ୍ର ବୋଲି ଦାବି କରୁଛନ୍ତି। ଏହି ଗୋଷ୍ଠୀ ଅଭିନେତାଙ୍କ ଘରେ ପଶି ପୀଡିତାଙ୍କ ପରିବାରକୁ କ୍ଷତିପୂରଣ ବାବଦରେ ୧ କୋଟି ଟଙ୍କା ମାଗିଥିଲେ। ଅନ୍ୟପଟେ ସେମାନେ ଟମାଟୋ ଓ ଅଣ୍ଡା ଫିଙ୍ଗିବା ସହ ଅଲ୍ଲୁଙ୍କ ଘରେ ପଶି ଭଙ୍ଗାରୁଜା କରିଥିଲେ। ମୋଟ ୮ ଅଭିଯୁକ୍ତଙ୍କ ଭିତରୁ ୬ ଜଣଙ୍କୁ ସୋମବାର ଦିନ ହାଇଦ୍ରାବାଦ ନ୍ୟାୟାଳୟରୁ ଜାମିନ୍ ମିଳିଯାଇଛି।
